ادتاج اتحادیه دمکراتیک ترک آذربایجان جنوبی
گادتب: ۱۸ اوکتیابر آذربایجانین دؤولت موستقیللیگینین برپاسی گونودور. قدیم دؤولت‌چی‌لیک تاریخی و عنعنه‌سینه مالیک اولان آذربایجان تورک میللتی دونیانین ایمپئریالیست دؤولتلرینین ایشغال‌چی‌لیق سیاستی نتیجه‌سین‌ده پارچالاناراق بیر حیسه‌سی روس، بیر حیسه‌سی ایسه ایرقچی فارسلارین اسارتینه دوشموش‌دو. لاکین داهی محمد امین رسولزاده نین باشچی‌لیغی ایله ۱۹۱۸-جی ایل مای آیینین ۲۸-ده آذربایجانین دؤولت‌چی‌لیک عنعنه‌لری معاصر و مودئرن جهوریت فورماسین‌دا برپا ائدیلمیش‌دیر. روس موستملکه‌چیلری ۲۳ آی سونرا آذربایجانی یئنی‌دن ایشغال ائتمکله ۷۰ ایل مدتینه آذربایجانین موستقیللیگینه خلل گتیردیلر. بونا باخمایاراق آذربایجان تورک میللتینین موستقیل‌لیک عزمینی قیرا بیلمه‌دیلر. سووئت اتفاقینین چورومه‌سی قوزئی آذربایجان‌دا آذربایجان تورک میللتینین موستقیل‌لیک مباریزه‌سینی گوجلندیردی و آذربایجان تورک میللتی ۲۰-جی یوز ایل‌لیک‌ده ایکینجی دفعه موستقیللیگینی برپا ائتدی.
آذربایجان تورک میللتینین موستقیللیگینی برپائتمه اوغرون‌دا مباریزه‌سینین داوامین‌دا آذربایجان رئسپوبلیکاسینین عالی سووئتینین ۱۹۹۱-جی ایلین ۱۸ اوکتیابر تاریخ‌لی سئسییاسین‌دا «آذربایجان رئسپوبلیکاسینین دؤولت موستقیل‌لیگی حاقین‌دا» کونستیتوسییا آکتی یئکدیل‌لیکله قبول ائدیلدی.
آذربایجان رئسپوبلیکاسین‌دا ۱۹۹۱-جی ایل دئکابرین ۲۹-دا رئفئرئندوم کئچیریلدی. رئفئرئندوم بوللئتئنینه بیر سوال یازیلمیش‌دی: «سیز «آذربایجان رئسپوبلیکاسینین دؤولت موستقیل‌لیگی حاقین‌دا» آذربایجان رئسپوبلیکاسی عالی سووئتینین قبول ائتدیگی کونستیتوسییا آکتینا طرفدارسینیزمی؟» آذربایجان تورک میللتی یئکدیل‌لیکله آذربایجان رئسپوبلیکاسینین دؤولت موستقیللیگینه طرفدار چیخدی.
هله موستقیللیگین برپاسین‌دان آیلار اول جمهوریتین اوچرنگ‌لی بایراغی دؤولت بایراغی اعلان ائدیلمیش، ۱۹۹۲-جی ایلین مایین‌دا آذربایجان میللی مجلیسی طرفین‌دن آذربایجان رئسپوبلیکاسینین دؤولت هیمنی (موسیقی‌سی اوزئییر حاجیبیلینین، سؤزلری احمد جاوادین)، ۱۹۹۳-جو ایلده ایسه ایچین‌ده آلوو اولان سککیز گوشه‌لی اولدوز تصویرلی دؤولت گئربی تصدیق ائدیلدی. ۱۹۹۱-جی ایل اوکتیابرین ۱۸-دن آذربایجان موستقیل، سووئرئن بیر اؤلکه‌دیر و خالق بو تاریخی بایرام کیمی قئید ائدیر.
دونیا آذربایجان‌لیلارینین یئگانه موستقیل دؤولتی اولان آذربایجان رئسپوبلیکاسی گوج‌لنه‌رک ایشغال‌دا اولان اراضیلرینی ائرمنی ایشغالین‌دان آزاد ائتمیش‌دیر. آرتیق اوچرنگ‌لی آذربایجان بایراغی شوشادا، خانکندی‌ده، آغدره‌ده و بوتون آذربایجان اراضیلرین‌ده دالغالانیر. گونئی آذربایجان دئموکراتیک تورک بیرلیگی (گادتب) ۱۸ اوکتیابر – آذربایجان رئسپوبلیکاسینین موستقیللیگینین برپاسی گونو موناسیبتیله آذربایجان تورک میللتینی تبریک ائدیر، گونئی آذربایجانین دا اؤز موستقیللیگینی برپا ائتمه‌سینه و آذربایجان رئسپوبلیکاسی ایله بیرلیک‌ده بوتؤو آذربایجانین قورولاجاغیجاغینا اینانیر.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
