ادتاج اتحادیه دمکراتیک ترک آذربایجان جنوبی
گادتب: گونئي آذربايجان دئموکراتيک تورک بيرليگي (گادتب) گونئي آذربايجانين موستقيلليگي اوغروندا موباريزه آپارماقلا ياناشي دايما يئگانه موستقيل دؤولتيميز اولان آذربايجان رئسپوبليکاسينين دؤولتچيليگيني دستکله‌ميش، قوزئي آذربايجانين اقتدار-مخاليفت ايليشگيلرينه يالنيز آچيق توپلوم، حقوق اوستونلوگو و شفاف سياست پريزماسيندان ياناشميشدير.
گادتب، آذربايجان رئسپوبليکاسي وطنداشلارينين آزاد و هر تورلو سوسيال، سياسي باسقيلاردان اوزاق توتولان آزاد سئچيمينه عموم ميللي امانت کيمي ياناشميش، اونون قورونماسي اوچون بوتون گونئيلي-قوزئيلي سويداشلاري آييق-ساييق اولماغا چاغيرميشدير.
سؤزسوز کي، آذربايجان رئسپوبليکاسينين حقوق، دئموکراتيک، چاغداش و مودئرن دؤولت اولماسي 50 ميليونلوق مدني ميلتيميزين ان ايچدن آرزوسودور. و دوغرودور کي، توپلوم ايچينده آليشقانليغا دؤنوشن تپه‌دن آشاغايا روشوت، کارروپسييا، اؤزباشيناليق و يوخسوللوق بوتون ميلتيميز کيمي بيزي ده اينجيدير. آنجاق، بو بوشلوقلاري بهانه ائده‌رک، آشيري هيجانلا اقتدار آدينا آذربايجان دؤولتچيليگيني هدفه آلماغين اؤزو ده سياسي اخلاقا سيغمايان سياسي کارروپسييا ساييلير.
سون زامانلاردا گونئي آذربايجانا قارشي جسارتسيزليکده، غئيري ميللي ليکده و بيگانه‌ليکده ايتيهام ائديلمه بهانه سي ايله آذربايجان رئسپوبليکاسي پرئزيدئنتينين عنوانينا آغير سؤزلر سسلنديرن بير گونئيلي تشکيلات باشقانينين چيخيشلارينا سيخ-سيخ راست گلينير. بو سويداشيميز، قاپالي گؤزلريله آغيزينا گلن ائتيکسيز سؤزلريله ايلهام علييئوه و رجب طايب اردوغان جابابلاريني هدفه آلماقدادير. سياسي ائتيکادان اوزاق، سويداشليق، يوردداشليق و بوتؤولوک آماجينا قارشي اولان بئله دويغوسال چيخيشلارين آذربايجان ميللي حرکاتينا زياندان باشقا هئچ بیر فايداسي يوخدور.
اؤزونو گونئيين ليدئري کيمي گؤسترن بو سويداشين چيخيشلاريندا نه اينکي سياسي توتارليق و ديپلوماتيک ديل يوخدور، عئين زاماندا گونئيين ميللي داواسي ايله باغلي ان اوفاق ميللي-سياسي استراتئژيک درينليک بئله، گؤزه چارپمير.
گادتب، بئله حساب ائدير کي، گونئي آذربايجان داواسينين باشليجا داياغيني قوزئي آذربايجان و تورکيه قارداشليغيندا آراماق گره‌کير. اونوتماماق گره‌کير کي، گونئي داواسينين تملي تورکلوک و تورک قارداشليغينا سؤيکنميشدير. بو اوزدن، هر هانسي سياسي قارشيدورمالار اوزوندن تورک بوتؤولوگونون زدلنمه‌سينه ايزين وئريلمه مه‌ليدير. آچيقجاسي، گونئي آدينا عموم ميللي همرأي لييه ضربه ووراجاق کئچيجي سيياستلردن اوزاق دورماق گره‌کير.
شخصي احتيراس و حسابلار اوزونده آذربايجان و تورکيه پرئزيدئنتلرينه ايهانت دولو تحقيرلرين عصبي هيجاني سياسي کاريزمايا سيغمايان داورانيشلار اولاراق، گونئي داواسيني يؤنلنديرن آذربايجان ميللي حرکاتي ايله ياخيندان-اوزاقدان باغليليغي يوخدور.
گادتب گونئي آذربايجانين بوتون ميللي-سياسي تشکيلات و شخصيتلرينی آييق اولماغا، بوتون گوجلريني دويغوسالليقدان اوزاق توتاراق، صيرف گونئي آذربايجانين موستقيلليگي اوغروندا موباريزه آپارماغا و آذربايجانين دوشمنلرينين ايستيفاده ائده بيله‌جگي هر هانسي حرکته يول وئرمه‌مه‌يه چاغيرير.
گونئي آذربايجان دئموکراتيک تورک بيرليگي (گادتب)
