ادتاج اتحادیه دمکراتیک ترک آذربایجان جنوبی
گادتب: آذربایجان اوردوسونون رشادتی ایله 8 نویابر آذربایجان تاریخینه ظفر گونو کیمی دوشدو. موظفّر آذربایجان اوردوسو ایگیدلیکله همین گون دونیانین ساواش تاریخینده مومکون اولمایانی مومکون ائتدی. 28 ایل سونرا آذربایجان اوردوسو بؤیوک قهرمان‌لیقلا آزربایجانین موسیقی بئشیگی شوشانی ائرمنی ایشغالین‌دان آزاد ائتمیش‌دیر.
بیرینجی قاراباغ ساواشیندا ایشغالچی ائرمنیستانا گیزلی یاردیم ائدن ایرانین فارس-موللا رئژیمی ایکینجی قاراباغ ساواشیندا آذربایجان اوردوسونون ایلک گونلردن ایره‌لیله مه‌سینی گؤردوکده آرتیق ال-آیاغا دوشه‌رک آچیق شکیلده ایشغالچی ائرمنیستانا دستک وئرمیش‌دیر. ایران رئژیمی سلاح-سورسات دولو یوک ماشین‌لارینی ائرمنیستانا گؤندرمک و حتی پ ک ک تئررورچولارینی قاراباغا داشیماقلا ایشغالچی ائرمنیستانین مغلوب اولماسینا مانع اولماغا چالیشمیشدیر. لاکین گونئی آذربایجان ایران رئژیمی‌نین جدی تضییق‌لرینه باخمایا‌راق داواملی اولا‌راق آذربایجان اوردوسونا دستک نوماییش ائتدیریب، ایرانین ائرمنیستانا حربی یاردیم‌لارینی دایاندیرماسی و نوردوز گؤمروک منطقه‌سی‌نین باغلانماسینی طلب ائتمیش‌لر. ایران رئژیمی ایسه گونئی آزربایجانین دینج اعتراض نوماییشینه دیوان توتا‌راق چوخ سایدا آذربایجانلی فعا‌لی حبس ائتمیش‌دیر.
ایرانین، روسیانین، فرانسانین و بوتون ائرمنی‌پرست اؤلکه‌لرین سعی‌لرینه باخمایا‌راق، آذربایجان اوردوسو 44 گونده ایشغالچی ائرمنیستانی دیز چؤک‌دوره‌رک تاریخ یازدی. نویابرین 8-ده قاراباغین تاجی، آزربایجانین موسیقی بئشیگی – شوشانین آزاد ائدیلمه‌سین‌دن سونرا آرتیق ایشغالچی ائرمنیستانین بئلی بوکولدو. تسلیم اولان ائرمنیستان آزربایجانین آغدام، کلبه جر و لاچین رایون‌لارینی دا محاربه‌سیز آذربایجانا قایتارماغا مجبور اولدو.
گونئی آذربایجان دئموکراتیک تورک بیرلیگی (گادتب) آزربایجانین ظفر گونونو موناسیبتیله آذربایجان رئسپوبلیکاسینین پرئزیدئنتینی، آذربایجان دؤولتینی، آذربایجان تورک میللتینی و تورک دونیاسینی اورک‌دن تبریک ائدیر!
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
