ادتاج اتحادیه دمکراتیک ترک آذربایجان جنوبی
گادتب: ۲۰ یانوار آذربایجان تورک میللتینین روس اسارتینه قارشی مباریزه و قهر‌مان‌لیق سالنامه‌سی‌دیر. ۲۰ یانوار فاجعه‌سی معاصر دؤورده آذربایجان تاریخینه عموم میللی حزن گونو کیمی دوشسه ده، اصلینده موستقیللیگی و آزادلیغی اوغروندا آیاغا قالخمیش آذربایجان تورک میللتینین موستملکه‌چی ایمپئرییا اوردوسو قارشیسین‌دا میثیل‌سیز قهر‌مان‌لیق گونو کیمی تاریخه دوشموش‌دور. ۲۰ یانوار فاجعه‌سینده روسلارین آذربایجانیمیزین قوزئیین‌ده موستقیللیگیه جان آتان آذربایجان تورک میللتینه دیوان توتدوغو کیمسه‌یه سیرر دئییل‌دیر. معاصر دؤوروموزده هر زامان تورکه قارشی روس و ائرمنی فیتنه کارلیغی، میللتیمیزه قارشی بؤیوک فلاکتلرله نتیجه لنیب.
۱۹۹۰-جی ایل یانوارین ۱۹-دان ۲۰-نه کئچن گئجه ده سووئت-روس اوردوسو و تانکلاری آزادلیغی اوچون آیاغا قالخمیش الی یالین آذربایجان تورک میللتینین اوزرینه هوجوما کئچمیش‌دیر. فاجعه زامانی باکی‌دا و قوزئی آذربایجانین دیگر بؤلگه‌لرین‌ده ۱۴۶ شخص اؤلدورولدو، ۷۴۴ نفر آغیر خسارت آلدی، ۸۴۱ نفر ایسه قانوسوز اولاراق حبس ائدیلدی. سووئت اوردوسونون عملیاتلاری نتیجه‌سین‌ده ۲۰۰ منزیل، ائو، شخصی و دؤولت املاکی داغیلدی. لاکین آذربایجان میللتی سووئت-روس اوردوسونا قالیب گلدی. آذربایجانین باشینا گتیریلن بو فاجعه بیر باشا روسییا طرفین‌دن تؤره دیلمیش‌دیر و روسلار هر دؤورده اولدوغو کیمی ایندی ده بوتون رئگیون‌دا دهشتلی قیرغینلار و فاجعه‌لرین سببکاریدیرلار.
۱۹۹۰-جی ایل یانوارین ۲۰-ده قوزئی آذربایجان‌دا آذربایجان تورک میللتی ثبوت ائتدی کی، الی یالین بیر میللت دونیانی قورخویا سالان سووئت-روس ایمپئرییاسی و روس قوشونونا سینه گریب، غالیب گله و موستقیللیگینی برپا ائده بیلر. میللتیمیزین قوزئی آذربایجان‌دا دونیانین ایکی بؤیوک گوجوندن بیرینین تانکلاری قارشیسین‌دا دایانیب میثیل‌سیز قهر‌مان‌لیق گؤسترمه‌سی، تکجه قوزئی آذربایجانین موستقیل‌لیک تاریخین‌ده قهر‌مان‌لیق صحیفه‌سی کیمی تاریخه دوشمه میش، هم ده موستقیللیگی اوغروندا مباریزه آپاران گونئی آذربایجانا و عمومیتله تورک دونیاسینا بؤیوک درس اولموش‌دور.
روسلار تاریخاً تکجه آذربایجانین قوزئیین‌ده دئییل، آذربایجانین گونئیین‌ده ده بؤیوک فلاکتلره سبب اولوبلار. تکجه اورمییا، سالماس و خوی بؤلگه‌لرین‌ده ۲۰۰ مین آذربایجان تورکو روسلارین بیر باشا تشکیلاتلاندیریب سیلاحلاندیردیغی ائرمنی-آیسورلارین الی ایله ۱۹۱۸-جی ایلده سویقیریمین قوربانی اولدولار. تبریز و آذربایجانین باشقا بؤلگه‌لرین‌ده ده یوزلرله آذربایجان اوغلو اؤلدورولوب، آذربایجانین ثروتلری تالانمیش‌دیر. هئچ بیر دؤورده روس آذربایجان تورکونه فلاکت و بدبخت‌لیک‌دن باشقا هئچ نه وئرمه میش‌دیر. گونوموزده ده روسلارین مختلیف بؤلگه‌لرده تورک میللتینه قارشی دوشمن‌چی‌لیگی داوام ائدیر. آذربایجان اوروسونون ایشغال ائدیلمیش آذربایجان اراضیلرینی ایشغال‌دان آزاد ائدرکن روسون بو مقدس وظیفه‌یه مانع اولماغل چالیشمیدیر.
گونئی آذربایجان دئموکراتیک تورک بیرلیگی (گادتب) ۲۰ یانواری آذربایجان تورک میللتینین روس ایشغالی و اسارتینه قارشی مباریزه و قهر‌مان‌لیق سالنامه‌سی کیمی ده یرلندیریر و اینانیر کی، آذربایجان تورک میللتی الی یالین روس ایمپئریالیزمینه غالیب گلدیگی کیمی بوتون ایشغال‌چیلاری یئنمه‌یه قادیردیر. بو گون آذربایجانین گونئیین‌ده ده آذربایجان تورک میللتی اؤز موستقیللیگی و آزادلیغی اوغروندا ۲۰ یانوار شهیدلرین‌دن ایلهام آلاراق مباریزه‌سینه داوام ائتدیب و غالیب گله جه یینه اینانیر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
