ادتاج اتحادیه دمکراتیک ترک آذربایجان جنوبی
گادتب: روسلارین آیاغینین بؤلگه‌یه آچیلدیغی دؤوردن بو یانا آذربایجان تورک میللتی‌نین فلاکت و فاجعه‌لری باشلمیش‌دیر. اونلارلا بیرگه غربین بعضی اؤلکه‌لری‌نین داغینیق شکیلده تورک اراضی‌لرینه کؤچموش ائرمنی‌لری تشکیلاتلاندیرماسی میللتیمیزه قارشی دهشتلی سویقیریم‌لارین تؤردیلمه‌سینه یول آچمیش‌دیر. خصوصیله سون ایکی عصردن آرتیق بیر مدتده تاریخی آذربایجان اراضی‌سی و شرقی آنادولودا تورک میللتینه قارشی مقصدلی شکیلده سویقیریملار تؤرتمکده‌دیرلر. آذربایجان و تورکیه اراضی‌سینده ائرمنی‌لرین تورک میللتینه قارشی سویقیریمی تؤرتمه‌سی‌نین مقصدی ایسه خزر دنیزی ساحل‌لریندن قوزئی و گونئی آذربایجان اراضی‌سینین بؤیوک حیسه‌سینی، ائله‌جه ده شرقی آنادولونو احاطه ائتمکله قارا دنیز و آرا‌لیق دنیزلری ساحیللرینه دک اوزانان بؤیوک بیر اراضیده ائرمنی‌لره دنیزدن دنیزه “بؤیوک ائرمنیستان” یاراتماق ایدی. لاکین بو اراضی‌لر آذربایجان و تورکیه اراضی‌سی اولدوغو اوچون بورادا یاشایان اها‌لی ده تورک‌لردن عبارت ایدی. اونا گؤره ده بورادا یاشایان آذربایجان تورکلرینی قیرماق و نتیجه‌ده دئموقرافیک ده ییشیکلییه ناییل اولماقلا ائرمنی‌لره دؤولت قورماغا رئال شرایط یاراتماغا چالیشدیلار. بونون نتیجه‌سینده ایسه شرقی آنادولو و آذربایجان اراضی‌لرینده تورکلره قارشی دهشتلی سویقیریملار تؤره دیلدی.
1905-1907-جی ایللرده ائرمنی‌لرین آذربایجان تورکلرینه قارشی تؤرتدیگی سویقیریمین بیرینجی مرحله‌سین‌دن سونرا ائرمنی‌لر بیرینجی دونیا محاربه‌سی ایللری، خصوصیله 1918-جی ایلده عثمانلی دؤولتی‌نین شرق حیصه‌سی و بوتؤو آذربایجان (گونئی و قوزئی آذربایجان) اراضی‌سینده یوز مین‌لرله تورکو سویقیریما معروض قویدولار. گونئی آذربایجاندا هله 1918-جی ایلین فئورال آیینین اورتا‌لارین‌دان باشلانان سویقیریمی مارت آییندا داها کسکینلشمیش و آوقوست آیینا قدر داوام ائتمیش‌دیر. تکجه گونئی آذربایجاندا 200 مین نفر آذربایجان تورکو ائرمنی‌لرین تؤرتدیگی سویقیریم نتیجه‌سینده محو ائدیلدی. قوزئی آذربایجاندا ایسه مارت آیی، خصوصیله مارت آیینین 31-ی آذربایجان تورکلرینین ائرمنی‌لر طرفین‌دن سویقیریما معروض قالماسینین پیک نقطه‌سی حساب ائدیلیر. یالنیز قوزئی آذربایجاندا دؤولتیمیزین موستقیل اولماسی نتیجه‌سینده آذربایجان تورک میللتینه قارشی ائرمنی‌لرین تؤرتدیگی سویقیریما حقوقی قیمت وئریلدی و 31 مارت آذربایجان تورکلرینین سویقیریمی گونو کیمی رسمیلشدی.
گونئی آذربایجان دموکراتیک تورک بیرلیگی (گادتب) ائرمنی‌لرین آذربایجان تورکلرینه قارشی سویقیریمی و ایشغال سیاستی‌نین گونوموزده ده داوام ائتمه‌سینی نظره آلا‌راق، آذربایجان دؤولتی و تورک میللتی‌نین منافعیی ایستیقامتینده آذربایجان تورکلرینین سویقیریمینین دونیا سویه‌سینده تانیدیلماسی اوچون الین‌دن گله نی ائدیر و آذربایجان تورک میللتینی ده بو ایستیقامتده فعال اولماغا چاغیریر.
اژدر تاغیزاده
گونئی آذربایجان دموکراتیک تورک بیرلیگی (گادتب) باشقانی
