ادتاج اتحادیه دمکراتیک ترک آذربایجان جنوبی
گادتب: بو گۆن، یئل‌گۆنۆ (شنبه) دی آیی‌نین ۱۶- سی رحمتلیک عاشیق قافار ابراهیمی نین بئشینجی ایل دؤنۆمۆدۆر.
اوستاد «عاشیق قافار ابراهیمی» گۆنش ایلی ۱۳۳۳-ده آذربایجانین گؤزل یوردو قاراداغ بؤلگه‌سی‌نین «مئشه پارا» ماحالیندا دۆنیایا گؤز آچمیشدیر. چوْخ گنج چاغلاریندان عاشیق صنعتی و موسیقی‌سی ایله ماراقلانیب بو صنعت ده فعالیته باشلامیشدیر. اوستادلاریندان «عاشیق رسول قربانی»، «عاشیق حسن غفاری» و «عاشیق علسگری» ساناماق اوْلار. حیاتی بوْیونجا بیر چوْخ ادبی محفل‌لرده فعالیت گؤسترمیش و بعضی ادبی انجمن‌لرین ده مؤسس‌لریندن اوْلموشدور، اوستاد اوروپادا، سوئد و سوئیس کیمی اؤلکه لرده عاشیق موسیقی‌میزی لاییقینجه تمثیل ائتمیشدیر، تۆرکیه ده و آذربایجان جمهوریتینده دفعه‌لرلجه عاشیق سمپوزیوملاریندا اشتراک ائتمیشدیر. باکی‌دا عاشیقلار بیرلیگی‌نین عضوو و ایراندا عاشیقلار ائوی‌نین عضوو و آغساققالی اوْلاراق مختلف استانلاردا سمینار و کنگره‌لرین اشتراکچی‌سی اوْلموشدور.
رحمتلیک عاشیق قافار ۲۵ کیتابین یازاری‌دیر و اوْنلاردان ساده‌جه ۴-ی چاپ اوْلوب و ایشیق اۆزۆ گؤرمۆشدۆر. کیتابلایندان: «ائل قوْشمالاری»، «سئوگی مقدس‌دیر» و «داغلار منیم اوْلدو من ده داغلارین» کیتابلارین ساناماق اوْلار.
عباس لیسانی، اینستاگرام و تلگرام صحیفه سی نین ادمینلری رحمت لیک «عاشیق قافار ابراهیمی»جنابلارینا اولو تانریدان رحمت دیله ییب و اوْنون ایل دؤنۆمۆنۆ بۆتۆن سایقی ایله آنیریق.
«مکانی اوچماق و یئنیدن آذربایجان میللتی نین باشی ساغ اوْلسون دئییریک»
