آزربایجانین تانینمیش میللی چالیشقانلارینین، ایشچی لر و اؤیرتمنلرین آغیرلاما گونو ایله ایلگیلی بیلدیری لری

گادتب: بؤیوک و قوجامان آزربایجان تورک میللتی

بیلدییینیز کیمی ایران آدلانان اؤلکه چوخ میللتلی بیر اؤلکه دیر. آنجاق بو گئرچگه باخمایاراق یوز ایلدن آرتیق دیر کی، بو سیاسی جوغرافییایا ‌حاکیم اولان فارس شووینیزمی، باشقا میللتلرین اینسانی و میللی حاقلارینی گؤز آردی ائده رک هر تورلو حاق ایسته یینی، تاپدالایاراق قان گؤلونده بوغماغا چالیشیبدیر. نئجه کی بو ظالیمجه سیاستلرین سونوجوندا، فارس اولمایان میللتلرین بوتون یئر آلتی و یئر اوستو وار اولان قایناقلارینی تالاییب و تالاماقدادیر.

کئچن یوز ایلده بوتون آلانلاردا(ساحه لرده)، سوردورولن بو شووینیستی آیری سئچکیلیک سیاستی، بو گون ایران آدلانان اؤلکه ده حاکیم اولان آغیر ایقتیصادی دوروما نَدن اولموشدور و بو آغیر دورومون بوتون آجیلیقلاری، قورخونج اوزونو گوسترمکده دیر. ایندی بوتون فارس اولمایان میللتلر و اؤزللیکله گونئی آزربایجان تورک میللتی بو شووینیستی آیری سئچگیلیگین سونوجوندا اورتایا چیخان یوخسوللوق فلاکتینین اؤددن آجی اولدوغونو ایلیک – سوموگو ایله یاشاییر. آنجاق باریندیریلمیش دوغمالار( فارس بؤلگه لری) بو ایقتیصادی فلاکتی، فارس اولمایان بؤلگه لردن داها راحات و داها آز سیخینتی ایلا کئچیرمکده دیرلر.

چوخ آیدین دیر بلوچ، عرب، تورک، تورکمن،  قاشقایی، گیلک، لور، کورد و… توپلوملاری داها آرتیق و قات-قات قاززو( ظُلم) آلتیندا اولدوقلارینا گؤره، بئللری قیریلماق حالیندادیر؛ ائله بیر حال کی، بیر آزربایجان تورک ایشچی سینین کئچینَجَک(معیشت) دورومو، اؤزللیکله فارس بؤلگه سینده چالیشان و نسبی اولاراق ایقتیصادی باخیمدان(ایش بوللوغو و چئشیدلی ایمکانلار) باریندیریلمیش بیر ایشچی(کارگر) ایله توتوشدوردوق دا (مقایسه ائدیلدیکده) فارس بؤلگه سینده چالیشانلارین رفاهی چوخ یوخاری بیر سویّه ده دیر. بو گئرچک بوتون صینفلر و قیشرلرده کئچرلی دیر. آنجاق یازیقلار اولسون کی، فارس شووینیزمی ائتکیسی آلتیندا اولان مرکزچی دوشونجه لر هر زامان بو اصلی گؤز آردی ائتمگه چالیشیبلار.

دونیانین بیلدییی کیمی اوُزون ایللردن بری اولاراق آزربایجان تورک میللتینه گئدن سایسیز  قاززولارا(ظُلملره وتضییقلره) قارشی دورماق و بو میللتین و بوتون توپلومسال قات و قاتمانلارینین (لایه و طبقه لرینین) تاپدالانمیش حاقلارینی هایقیرماق ایچین گونئی آزربایجان میللی حرکتی الیندن گلن هر بیر حاقلی چالیشمادان و ایشدن چکینمه ییب و هئچ زامان آزربایجان توپلومونا اولان آیری سئچگیلیک و ظُلملره سوسمایاجاق. اؤزللیک له ایشچیلرین (تولید و استحصال ایشچیلری و اداره لرده چالیشانلار)، اؤیرتمنلرین(معلیملرین)، اکینچیلرین و… معیشت باخیمیندان شیددت له آغیر سیخینتیدا اولدوغونو و دوروملارینین گونو- گوندن آغیرلاشماسینی گؤرور و حاکمیتین امنیتی باخیشینا و کوبود داورانیشلارینا رغمن گوندمه گتیریب و گتیره جکدیر و هر زامانکی کیمی آزربایجان میللتینین سسی اولاراق مئیداندا اولاجاق.

باشقا یاندان دا ایران آدلانان اؤلکه ده یاشایان توپلوملار، اؤزللیکله فارس اولمایان میللتلر آغیر تضییقلر آلتیندادیرلار؛ سؤز آزادلیغی، دینج و ساغلاملی(مسالمتلی) توپلانمالار و مدنی اعتراضلارین قارشی سی آلینیر و عدالت ایسته ینلر باسقی آلتیندا دیرلار. اینسان حاقلاری هر یؤنلو تاپدالانیر، ملی- مدنی چالیشقانلاری آردیجیل اولاراق قورخودوب و تهدیده معروض قویورلار.

چوخلاری ایستینطاق و سوروشدورما ایچین امنیتی دایره لره چاغیریلیرلار؛ قانوندان قیراق ساخلانیلیب دوستاق اولونورلار و اونلارا آغیر-آغیر جزا حُکملری وئریلیر. میللتلره قات-قات تبعیض و آیری سئچگیلیک تحمیل اولاراق میللی-مدنی حاقلاریندان او جومله دن؛ اؤز آنا دیللرینده تحصیل ائتمکدن محروم اولونوبلار و… بئله بیر دوروم اساسیندا هابئله ایللیک ایشچیلر گونو و اؤیرتمنلر گونونون آستاناسیندا بوتون بو ظُلملره اعتراض ائده رک زحمتکش و چالیشقان اؤیرتمنلرین و ایشچیلرین اؤزللیکله آزربایجان و تورک بؤلگه لرینده اعتراض ایچین دینج و مسالمتلی تجمع و ییغینجاقلاریندان، آنا یاسانین ۲۷-جی اصلینه دایاناراق آرخا دوُروب و حیمایه ائدیریک و شرایطین عموم کوتله لرین، اؤزللیکله اویرتمنلر، ایشچیلر و اکینچیلرین یارارینا(خیرینه) دَییشیلمه سینی ایسته ییریک.

هابئله بونو ایللر بویودور وورغولاماقداییق؛ آزربایجان میللی حرکتی هر زامان اولدوغو کیمی بوگون و گله جک ده ده بوتون سیاسی، اجتماعی، صنفی و طبقاتی اعتراضلار و حرکتلری او جمله دن؛ ایشچیلر حاققینی ساوونانلاری ، اؤیرتمنلر حرکاتینی ، قادین حرکاتینی ، یاشام چئوره سینی قوروماق حرکاتینی و… کی، اینسانلارین سعادتی ایچین چالیشیرلار، دستکله ییب، اونلارلا یول بیر اولوب، اونلارا آرخا اولاجاقدیر.

دوغال اولاراق بو حرکتلره و ایستکلره منسوب اولانلار، آذربایجان بؤلگه سینده داها آرتیق ظُلمه معروض قالدیغینا گؤره و بوتون بو حرکتلر آزربایجان تورک میللتینین چئشیدلی دردلرینی هایقیرمالاری ایچین آزربایجان میللی حرکتینین ایچینده یئر آلیرلار، نییه کی، میللی حرکتلر اوز ذاتیندا بیر میللتین بوتون توپلومسال، سیاسال، کولتورل و اقتصادی ایستک و مطالبه لری اوغروندا یارانان هر بیر جریان و حرکت ایچین ان اویغون بیر ظرف دیر، بو اوزدن میللت و میللی فعاللار بو حاقلی حرکتلرین یانیندا اولماغی اؤزونه بورج بیلیر .و اون مینلرجه گونئی آزربایجانلی نین خیابانلاردا و ایستادیوملاردا سَسلندیردیگی بو حاقلی شعاری:

“آزادلیق، عدالت، میللی حکومت”-ی دوغرولتماغا الیندن گلنی اسیرگه مه یه جک.

آزربایجان اولوسال حرکتی نین بیر سیرا چالیشقانلاری

۱.یعقوب تقوی

۲.اکبر آزاد

۳.عباس لسانی

۴.لطیف حسنی

۵.میرموسی ضیاگرگری

۶.آیت (یوروش) مهرعلی بیگلو

۷.علیرضا فرشی

۸.سیامک‌میرزایی