گادتب: بولوت قاراچورلو 1305_جی ایلده ماراغا شهرینده آنادان اولدو.
دوغوم گونونده یاغیشین یاغماسی باعث اولدو آتاسی اونون آدینی “بولوت” قویسون ، اما پهلوی رژیمینین ثبت احوال اداره سی بو آدی نامأنوس بیلیب و اونون شناسنامه سین “بهلود” آدی ایله وئردیلر.
او ایلک شعر تجروبه لرینی 24–25-جی ایلر ده تبریز ده قورولان شاعیرلر مجلیسیندن باشلامیش.
او 25_جی ایلین 21آذر فاجعه سیندن سونرا دوستاقلارا و بوغونتولارا معروض قالمیش بیر چوخ آذربایجانلی كیمی چارا سیز تهراندا یاشامیش.
بولوت قاراچورلو پهلوی رژیمینین بوغونتوسوندا بوتون تورک دونیاسینین اؤلمز آبیده سی اولان دده_قورقود كتابینین آلتی بویونو گونوموزون شعر دیلی ایله “سازیمین سوزو” آدیندا قوشوب یایماقلا ایراندا یاساق اولموش تورک دیلینین گوجونو بیرداها اثبات ائدیب و آذربایجان میللتینه چیراغ كیمی یول گوسترن اولدو.
سهندین اثرلری پهلوی دؤورونون دیل و مدنییتیمیزه یاراتدیغی بوغونتولو گونلرین سولماز تابلولاریدیر او گونلری گؤرمیینلر اوچون :
طالعیمه باخ !
دوشونجه لریم یاساق ،
دویغولاریم یاساق ،
كئچمیشدن سؤز آچماغیم یاساق ،
گلجكدن دانیشماغیم یاساق ،
آتا و بابامین آدین چكمگیم یاساق ،
بیلیرسن ؟
آنادان دوغولاندا ، بئله ،
اؤزوم بیلمییه – بیلمییه ،
دیل آچیب ، دانیشدیغیم دیلده ،
دانیشماغیمدا ، یاساق ایمیش ، یاساق
سهندین شعرلرینده انسانلیق و بیرلیک دالغالانیر ، اونون شعرلری وطن عشقی ، آزادلیق ، میللی حقلر ، سئوگی و نی ترنم ائدیر.
سهند آنادیلینه و آذربایجانلی اولماغینا گوونیردی و بو دوشونجه دن اؤتور پهلوی دؤورونده خوش بیرگون گؤرمه دی و دائما مامورلارین طرفیندن اذیت اولوب و نظر آلتیندا ساخلانیردی ، اما اونون اینامی و اؤز.
وطنینه اولان عشقی بو فشارلارا اوستون گلیب و اولاری مایوس ائدیردی.
سهند 1346_جی ایلین بهمن آییندا شهریاری گورمک اوچون تهراندان تبریزه گلیر ، آمما شهریار كی بو ایللر دونیادان ال اوزوب و اؤز ائویندن ائشیكه چیخمیردی سهندی گؤرمک ایستمیر.
آمما شهریاری گورمک شوقو ، سهندی مجبور ائدیر اؤز آنا دیلینده شهریارا مكتوب شعرینی یازیب شهریارا گوندرسین و بو مكتوب “سهندیه” اثرینین یارانماسینا باعث اولور.
بو آزادایغا حسرت قالان دویغولو و دویوشجول شاعیر 1358_جی ایلین فروردین آیینین 22_ده دونیادان گئدیر و اونون وطن عشقینه دویونن اورگی دؤیونمكدن دایانیر و بوتون حق سئون انسانلاری ماتمه بورویور.
اونون روحو شاد و یولو داواملی اولسون.
بولوت قاراچورلودن بیر گوزل ایفا :
من دئمیرم اوستون نژاددانام
دئمیرم ائللریم ائللردن باشدیر
منیم مسلكیمده ، منیم یولومدا
میللتلر هامیسی دوستدور قارداشدیر
چاپماق ایسته میرم من هئچ میللتی
نه دیلین ، نه یوردون ، نه ده امگین
تحقیر ائله میرم ، هدله میرم
كئچمیشین ، ایندی سین ، یا گلجگین
من آییرمیرام ، آیری سالمیرام
قارداشی قارداشدان ، آروادی _ اردن
آنانی بالادان ، اتی دیرناقدان
اورهگی _ اورهكدن ، قانادی پردن
پوزماق ایسته میرم من بیرلیكلری
انسانلیق بیرلیگی ایده آلیم دیر
قارداشلیق ، یولداشلیق ، ادبی باریش
دونیادا ان بویوک آرزولاریمدیر
آنجاق بیرسوزوم وار ، من ده انسانام
دیلیم وار ، خلقیم وار ، یوردوم یووام وار
یئردن چیخمامیشام گوبه لك كیمی
آدامام ، حقیم وار ، ائلیم اوبام وار
قول یارانمامیشام ، یاراناندا من
هئچ كسه اولمارام ، نه قول ، نه اسیر
قورتولوش عصریدیر انسانا بو عصر
اسیر اولانلاردا بوخوون كسیر