گادتب: «خالق شاعیری» آدینا لاییق گؤرولن خلیلرضا اولوتورکـو تانیتماق لازیم دئییل، چونکو او ۴۲ جیلید شعر کیتابی ایله آذربایجان ادبیاتینا اؤز ایمضاسینی ووران شاعیرلردن و استقلال یولوندا چکدیگی زیندانلارلا باشقا آکادئمیکلردن فرقلهنن بیریسیدیر. خلیلرضانی داها یوکسکلره اوجالدان باشقا عامیل ده، اونون بیرینجی قاراباغ ساواشیندا شهید اولوب «میللی قهرمان» عنوانی قازانمیش اوغلو «تبریز» ایدی.
بو عاییلهنین باشقا نهنگ اینسانی ۲۰ جیلیده یاخین کیتابین یازاری، نظامی آدینا ادبیات اینستیتونون فخری فیلولوگییا دوکتورو، خلیلین یول یولداشی و تبریزین آناسی فیرنگیز خانیم ایدی. فیرنگیز بو عاییلهنین قورولدوغو گونلرینی بئله خاطیرلاییردی: «خلیل باجیملا بیر یئرده اوخویوردو. باجیما یئمک آپارمالی اولوردوم. منی ده اوندا گؤرموشدو. قلبینی مکتوبلار واسیطهسیله منه آچدی. خلیلین مکتوبلارینی اوخودوقدان سونرا، آنامدان قورخدوغوم اوچون، آنام بیلمهسین دئیه اؤزونه قایتاردیم. او دا همین مکتوبلاری اؤزونده ساخلادی. و بیز ۱۹۵۶.جی ایل دئکابرین ۷.سی عاییله قوردوق.»
اونلار ۳۸ ایل بیرگه یاشادیلار. اؤنجه تبریز سونرا رضا دونیایا گؤز آچدی. اؤنجه تبریزی سونرا خلیلی تورپاغا تاپشیردیلار. فیرنگیز خلیلدن سونرا ۲۸ ایل یاشادی و تبریزی قوربان وئردیگی قاراباغین آزادلیغینی گؤروب، بو خبری تبریزه و خلیله آپاردی.
فیرنگیز، خلیل و تبریزدن سونراکی گونلرینی تمامیله یازیب یاراتماغا حصر ائتدی. ماددی دورومو هئچ ده یاخشی دئییلدی و قوهوملار و یاخینلار اونا کؤمکلیک ائدیردیلر. آما او یازیب یاراتماقدان قالمادی و تکجه خلیلرضا حاقدا اون جیلید کیتاب یازیب یاییملادی. خلیلین اثرلرینی، مکتوبلارینی و اونا یازیلمیش یازیلار و مکتوبلاری اونلار جیلید سالنامهلرده توپلاییب دوزنلهدی.
تانیشلارین «بو واختیندا، بو یاشیندا نییه بئله گئجهلی گوندوزلو چالیشیرسان» سورغوسونو بئله جاوابلادی: «تورپاق، وطن اوغروندا موباریزهده بیری قلم، او بیری ایسه سلاحی ایله وورشان خلیلین، تبریزین نفسلری دویولان ائوده الیمی، قولومو ساللاییب واخت کئچیرمهیه معنوی حاققیم چاتمیر. بونو هئچ اؤزوم ده باجارمارام. نه قدر جانیم ساغدیر، من ده بو خالق اوچون بیر ایشلر گؤرمهلییم.»
ایتیب- باتماق اوچون یارانمامیشام،
دوننم، بوگونم، گلهجهیم من.
بیر گون بو دونیادان کؤچسم ده نه غم،
دونیایا یئنیدن گلهجهیم من…