ادتاج اتحادیه دمکراتیک ترک آذربایجان جنوبی
گادتب: ژاپون 1992 موسیقی فئستیوالیندا، تبریز موسیقی‌چیلری‌نین ایفالاری بوتون حاضیرلارین آلقیشی‌نی قازانیب، ژاپون تئلویزیالاریندان یاییملاندی، آما ایران تئلویزیاسی او حادیثه‌نی سانسور ائتدی و کیمسه او اوغوردان خبرلی اولمادی.
هله 1377جی ایلین آبان آییندا، بابا میرزایوفون کنسرتینه حمله ائدیب اونلاری دؤیوب سازلارینی سیندیردیلار. تبریز شهرینده اوز وئرن او حادیثه‌دن چوخ آز آدام خبردار اولدو، آما بوگونلر عصرجدید وئریلیشی طرفینده آذربایجان موسیقی و رقصینه قویولان سانسوردان، بوتون خالق خبرداردیر و بیز بو خبردارلیغی سانال ایمکانلارا بورجلویوق.
ابتدایی انسلانلار دا، تپه‌نین آرخاسیندان خبر تاپیب او خبرلری تکرار ائتمه‌یی سئویردیلر. هر گون دوسلاری ایله گؤروشن اینسانلار «نه خبر؟» دئمکله، خبر و معلومات آلیش‌وئریشی و او خبرلرله باغلی بیربیرینین فیکرینی اؤیرَنیرلر. انسانلار محض بو خبر و فیکیر موبادیله‌سی چرچیوه‌سینده، موناسیبتلرینی قورور و بعضن یولداشلارینی دا سئچیرلر.
آمریکالی جان مک‌کین خاطیره‌لرینده یازیر: «هانوی‌دا حربی اسیر اولدوغوم بئش ایل عرضینده، منی ان چوخ اینجیدن شئی راحاتلیق، یئمک، آزادلیق و حتتا عاییله و دوسلاریمدان محروم اولدوغوم دئییلدی، بلکه معلوماتسیزلیق ایدی. آزاد، سانسورسوز، تحریف اولمامیش و کیفایت معلومات.»
1991جی ایلده واتسلاو هاول (چئک باشقانی) بیر قوروپ ژورنالیسته دئییب: «ژورنالیسم؛ حوکومتلر تبلیغاتی اوچون اوغورلانمیش «دیلی»، گئری آلماقدیر» و لهستان باشقانی لئخ والسا بیر دفه ژورنالیستلره «خالقی قیرغینا وئرن باشقا بیر استالینین ظهورو مومکوندورمو؟» سئوالینی وئریب سونرا اؤزو بئله جاواب وئردی: «یوخ. کامپیوتر، پئیکلر، فاکسلار، ویدیو فیلیملری عصرینده بو ایش مومکون دئییل.»
ایندی، بیز بو کیچیک اینستاگرام، فیسبوک، تلگرام و… واسیطه‌سیله هر نه‌دن خبرلی اولوروق و بو صحیفه‌لر اولمادیغی حالدا، خالقی محو ائده‌بیلن استالینلرین اورتایا چیخماسی هئچ ده اوزاق دئییل و «صیانت» طرحلری، بو کیچیک صحیفه‌لرین گوجونه ایناناراق، حکومت و اونون مئدیالاریندان گئری آلدیغیمز بو «دیلی» یئنیدن اوغورلاماق اوچون اورتایا آتیلیر بلکه.
بیز، بو یاری آچیق سانال فضایا بیلدیگیمزدن داها چوخ بورجلویوق و حکومت سانسوروندان خاریج بیزه چاتان خبرلره داها دا احتیاجیمیز وار. بیز ده، ابتدایی انسلانلار کیمی تپه‌نین آرخاسینداکی خبری باشقالارینا چاتدیرمالی و بیلمه‌لییک کی «یازیلان سؤز یادیگاردیر» و یازیلمایان هر بیر شئی توستوله‌نیب گؤیه گئده‌جکدیر.
