ادتاج اتحادیه دمکراتیک ترک آذربایجان جنوبی
گادتب: «رازهای سرزمین من» رومانیندا بئله بیر روایت واردیر:
آشیق رحمانین سسی تبریزده مشهور ایدی، اوغلو ناصر ده، یوزلرجه تورکجه شعر ازبرلهمیشدی و یاخشی سسه مالیک اولدوغونا گؤره، آتاسی کیمی آشیق اولماق ایستهییردی. آما آتاسی اونو درس اوخوتماق ایستهییردی. ناصر یونیورسیتهده درس اوخودوغو زامان، بیلینمز حالدا اؤلدورولدو.
رحمان خبرلی اولاندان سونرا، سازینین تئللرینی آچیب، همهشه اوخودوغو قهوهخانانین قاباغینداکی توت آغاجینا باغلادی و کیمسهنین دیققتینی جلب ائتمهدن، ساز تئللریندن بیر حالقا دوزلدیب، بوینونا سالیب، آغاج قیراغیندان سورعتله قهوهخانایا ساری قاچدی و سازینین تئللری بوغازینی بیچدی.
تیمسار شادان هؤوشنه ده ایدی کی ناصرین قتلینده، اونون دا الی اولدوغو بیلینهجک. بیر ایکی دفعه آشیقلارا قوناقلیق وئردی. آما آشیقلاردا اوخوماق حالی- حؤوصلهسی قالمامیشدی. سونرالار هئچ ندنی اولمادان، آشیقلارین اوخوماسینا قاداغا قویدولار. سانکی آشیقلارین بیری ناصر و رحمانین اؤلومو حاقدا، بیر شعر سؤیلهییب اوخوموشدو و او شعر معروف اولوب دیللره دوشموشدو.
رضا براهنینین یاراتدیغی ناصر و اونون معمالی اؤلومو، صمدین اؤلومونو و آشیقلارین اونون اؤلومو مناسبتیله شعرلر قوشوب اوخودوقلارینی خاطیرلادیر منجه. چونکو صمدین ده یادی، حتتا اؤلوموندن سونرا، دوشمنلری قورخودوردو و بیر مدت آشیقلارین قهوهخانالاردا اوخومالارینا قاداغا قویولدو و بو حقیقتی گؤرن اوختای بئله سؤیلهدی:
دوشمن طعنه وورسا صمد هاردادیر؟
الیمی سینهمه چالیب دئیهرم:
صمد کؤنلومدهدیر، اورهییمدهدیر
دؤیوشور، اؤلسه ده دوغرو ائلیندن.
بو بیر ناغیلدیر کی ائللر سؤیلهییر
بیری سسدن دوشسه، او بیری دئییر
ناغیلچی دایانیر، سؤز دوام ائدیر
ائل اوچون یاشایار بوردا بسلهنن
