ادتاج اتحادیه دمکراتیک ترک آذربایجان جنوبی
گادتب: کئچن گونلرده خوی، تبریز، ماراغا، زنگان، مرند، قوشاچای، اورمو، مئشکین و سولدوز اهالیسی ایران قزئتهسینین میندار اهانتینه اعتراض ائدرک خیاوانلارا چیخمیشدیلار. آما اوچونجو آیین دؤردونده، ایکی شهرین دورمو تام فرقلی ایدی. مئشکین اؤزونو تاریخی بیر آددیما حاضیرلاییردی و سولدوز دا اؤز شانلی تاریخینین اوچونجو حماسهسینی یاراتماغا حاضیرلاشیردی.
سولدوز اؤنجهلر عباس میرزا یانیندا روسلارا و سونرالار کوردلره قارشی ساواشدیغی گونلری خاطیرلاییردی. آیین اوچونده سولدوز اهلی، یونیورسیتهده اولان اعتراضلارا قاتیلیب، یونیورسیتهدن شهره قدر اولان اوچ کیلومئتیرلیک مسافهنی «آند اولا ستارخانا، قان سالاریق تهرانا» دئییرک فرمانداری قاباغینا گلمیشدیلر و فرماندار اونلارا صاباح ارشاد قاباغیندا اعتراض ائتمهیه جاواز وئرمیشدی. بونا گؤره، اوچونجو آیین دؤردونه چیخان گونش تام فرقلی چیخیردی.
اعتراضلارین ائله همن ایلک گونونده، نئچه تبریزلی ایگید اؤز جانلارینی آذربایجانا قوربان وئرمیشدی و اونون صاباحی اورمو «قالخ آیاغا وطنداش، تبریزده اؤلدو قارداش» دئییرک، ایکی باشقا شهیدی بو یولا تقدیم ائتمیشدی. آما او پنجشنبهده باش قالدیران شهرلرین دورومو فرقلی اولاجاقدی. چونکو دؤولت رسمیلری دالبادال «قزئته مودورو و ارشاد وزیری عوذور دیلهییب و بوردان بئله اعتراضین یئری یوخدو» دئیهرک اقتدارین سرت اوزونو گؤستریب، صاباحکی جومه نامازینا قدر، اؤز خیاللارینا ایشی بیتیریب، هرنهیی دوشمنلرین بوینونا آتماق ایستهییردیلر.
بئله بیر آغیر دورومدا سولدوز و اونون آردیجا مئشکین، خایینلرین خیاللارینا «باطیل اولدو» مؤهورو ووروب، «بو عصیان، بو قان» یئرده قالماییب، هله هله سورهجک مسئاژینی یایدیلار. سولدوزدا باش وئرن جنایتی قلم یازابیلمز، کاغاذ دؤزهبیلمز. جلادلار الی بوش خالقیمیزا سیلاح آچیب، سولدوز بالالارینی قانلی لالهلر کیمی یئره تؤکدولر. سولدوزدان بیر آز اوزاقلاردا، آذربایجانین باشقا قوربانی دا مئشکیندن گلدی و اوچونجو آیین دؤردو نئچه ساعات ایچینده، «شهیدلر گونو» عنوانینا یوکسلدی.
