ادتاج اتحادیه دمکراتیک ترک آذربایجان جنوبی
گادتب: بیر حالدا کی پازیریک فرشی یا همن پازیریق خالی‌سیندا ایشله‌دیلن موتیفلر، خالی‌نین توخونما و تاپیلما یئری هرنه‌یی آیدینجاسینا گؤسترمکده‌دیر، آما یئنه ده، تورک میراثینی اؤز آدلارینا وورماغا جهد ائدن فارس، ائرمنی و باشقالاری تاریخین شاه‌اثرلریندن ساییلان بو خالی‌نی دا اوغورلاماق ایسته‌ییرلر.
باسیریق لوغتی باسدیرما یئری و قبریستان آنلامیندادیر و داغلیق آلتایدا باسیریق آدلی بیر قبریستانلیق واردیر. ساکا/ساقا شاهلارینا عایید اولان بو ۲۵۰۰ ایللیک قبریستانا، آلتای تورکلری اؤز لهجه‌لرینده پازیریق یا پازیریک دئییرلر. هریاندا پازیریک آدی ایله مشهور اولان او قبریستاندان، اینانیلماز درجه گؤزل بزنمیش خالچا، خالی، کئچه، گبه، جئجیم، کیلیم، قیمتلی پارچا، یؤین- یهر، ترلیک، یهراوستو دؤشکچه، دؤشلوک و باشقا باشقا اثرلر تاپیلیب، پطربورگ آرمیتاژ موزه‌سینده ساخلانیلیر.
تاریخین درینلیگیندن بو گونه قدر، او پارچالارین ساغ سالامات قالماسی‌نین ساده بیر ندنی واردیر. پازیریق قبریستانی یئرلشن اولگئن یایلاغی ۱۶۰۰ مئتیر هوندورلوکده اولدوغونا گؤره، اورانین سویوق هاواسی و دؤنموش سویو، بو اشیالاری اوول گون کیمی ساخلاییب، بو گونوموزه ارمغان وئریبدیر.
بو اشیالاردان ایکی خالی و بیر دؤشکچه دونیا شؤهرتی قازانیب تاماهکار خالقلاری قیجیقلاندیردی. بو خالی‌لارین بیری ۲۴ خانایا بؤلونوب و هر خانادا فرقلی تامغالار توخونوبدور. تورکمن عالیمی آخمئت بئک‌میرادوو، تورکییه‌لی نریمان خانیم کیرزی‌اوغلو و فؤاد تکچه و آذربایجانلی فیریدون جلیلوو بو خالی حاقدا آراشدیرمالار آپاریب، اونون ناخیشلارینی ایکی فرقلی تورکمن خالی‌سی ایله موقایسه ائدیب ناخیشلارین بیر کؤکدن و بیر موتیفدن قایناقلاندیغینی اورتایا قویوبلار.
بو بیلگینلره گؤره، بو اورتاق کؤک و قایناق همن ۲۴ اوغوز بویلاری اسطوره‌سی و او بویلارین تامغالاریدیر. آما آجی اَتیمیزه شیرین داراشان، قونشو خالقلارین اوزلو عالیملری و اونلارین آردیجا سورونن جاهیللری، بو اثری نم هانسی ایتمیش بابالارینا پای وئرمک ایسته‌ییرلر و بیز بونلاری تانیدیب گوندم حایاتیمزا یئتیرمکله، اونلارینا قارا مَشقلرینه قیرمیزی قلم چکه‌بیلریک.
