ادتاج اتحادیه دمکراتیک ترک آذربایجان جنوبی
گادتب: کئچن گون، یعنی پنج شنبه گونو آخشام اوستو، ساعت 18 حدودلاریندا آذربایجانین تانینمیش ملی فعاللاریندان اولان سایین مهندس حسن بَی راشدی، بیر موتورچو طرفیندن شدتله مضروب اولوب، صدمه گؤروب و یارالانمیشدلار. سایین مهندس راشدی او ساعتده «زبان ترکی و گسترۀ تاریخی جغرافیایی آن» آدلی بیر سئمینارا قاتیلماق اوچون تهراندا «آزادی خییابانی، شمالی خوش خییابانی، زارع خییابانیندا» قورولان سئمینار آدرئسینه مراجعه ده، زارع خییابانی¬نین اورتاسیندا غفیلدن موتور سوروجولر طرفیندن ووروموشدولار. (موتورا ایکی نفر مینمیشمیش، بیری سورورموش و بیری ده سوروجونون ترکینده ایمیش)
موتورچولار تصادفدن سونرا، حادثه باش وئره ن یئرده قالماییب قاچمیشدیلار. موتورچولاری تعقیب ائدن بیر شخصین دئدیگینه گؤره موتورون پولیس(شهربانی) نؤمره سی (پلاکی) یوخوموش و تعقیب ائدن شخصین اعتراضی قارشیسیندا کی: «سیز بیر انسانی ووروب یارالادیقدان سونرا نییه قاچیرسیز؟؛ بو نامردلیک دیر!»
دئییبلر: هامی ووُروب قاچیر، بیز ده قاچیریق. تعقیب شخصین دئدیگینه گؤره بو ایکی قولدور موتورچولار بو سؤزلردن سونرا قالماییب و قاچمیشدیلار.
سایین مهندیس حسن بی راشدی نین سول قیچی بالدیر ناحیه سیندن یارالانمیش و اون بخیه گؤتورموشدور. بوندان علاوه بئل و اونورغا مهره لری ده شدتله صدمه گؤرموشدور و حال حاضرده عصاسیز حرکت ائده بیلمیرلر.
گؤره سن پولیس بو حادثه نی آردینجا اولاجاق می؟
دوربینلرده(کامئرالاردا) فیلمی چکیلمیش موتورچولاری ایزله یه جک می؟
بو کیمی قانونا ضد اولان ایشلرین مسئول و سوروملوسو کیم دیر؟
اینتظاریمیز بودور پولیس سونا قدر مسئله نین آرخاسیندا اولا و جنایتچی مجرملری تاپیب محکمه یه وئره؟
