باکی‌دا و استانبول‌دا آکسیا: «گونئی آزربایجان سیویل آکتیویست‌لری‌نین ایشکنجه‌سینه سون وئریلسین»

گادتب: باکی‌دا و استانبول‌دا محبوس گونئی آزربایجان فعاللاری‌نین آزادلیغی طلبی ایله تراکت‌لر یاییلیب.

۱۰ نفردن چوخ گونئی آزربایجانلی مدنی فعال  ایکی آیدان آرتیقدیر ایران رژیمی طرفیندن قانونسوز اولاراق حبس ائدیلیب‌لر. بو مودت ایچینده وکیل توتماق حاققیندان بئله محروم اولان فعاللار فیزیکی و روانی ایشکنجه‌یه معروض قالماقدادیرلار.

بو فعاللارین وضعیت‌لری عایله‌لری باشدا اولماقلا بوتون گونئی آزربایجان اجتماعیاتینی قایغیلاندیرماقدادیر.

قید ائتمک لازیم کی محبوس گونئی آزربایجانلی فعاللارین خبرلری بوگونه قدر ایران فارس مئدیاسی طرفیندن بایکوت ائدیلمیشدیر.