ادتاج اتحادیه دمکراتیک ترک آذربایجان جنوبی
گادتب: بولود قاراچورلو، 1305-جی ایلده آزربایجانین قدیم علم و مدنیت مرکزی اولان ماراغا شهرینده آنادان اولموشدور. اصلی قاراچورلو طایفاسینا منصوب ایدی. آزساوادلی زحمتکش آتا و آناسینین اوخشامالاری، ناغیللاری، صحبت‌لری، اؤیودلری اونون قانینا، یادداشینا هوپور، ائلینی، اولوسونو سئون بیر گنج کیمی یئتیشدیریردی.
ایلک تحصیلینی ماراغا و تبریزده آلان بولود 17 یاشیندا ایکن تحصیل‌دن اوزاقلاشیر و اؤزونه سهند تخلصونو سئچیر و شعر یازماغا باشلاییر.
سهندین گنجلیک ایللری گونئی آزربایجانین خلقینین میللی اؤزگورلوغو اوغروندا آپاردیغی چتین موباریزه دؤورونه 40-جی ایللردن میللی آزادالیق حرکاتینا تصادف ائدیر.
بولود، میللی حؤکومت ده فعال ایشتیراک ائدیر. سهند همین ایللرده سئوینج و ایفتیخاردان دوغان شعرلر یازیردی. لاکن وطنین آزادلیغی اوزون سورمه‌دی.
سهند:
گرک‌دیر شرقده بوغولا بۇ سس،
دئیه کؤهنه دونیا وئردی ال-اله.
لوندوندا باشلادی گیزلی حرکات
واشینقتونداکی قوْشون، تداروکات
خلیجه یوللاندی حربی گمی‌لر.
تاریخده وطنه، هدفه یولا
جان قوربان ائدن‌لر هئچ ده آز دئییل…
آمّا بیر میلّتین قوربان اولماسی
تاریخ گؤسترمه‌میش هئچ واخت، هئچ زامان
قوی بیر ده سؤیلییم دونیالار بیلسین،
صولحه قوربان اولدو بۇ آزربایجان!؟
قیسا بیر مودتده ایستیقلالینی یاشایاراق چیچکله‌نیب دیرچه‌لن دیار یئنیدن زیندانا چئوریلیر. سهند هایقیراراق خلقینین باشینا گتیریلنلری بوتون دونیایا چاتدیریردی.
سهند:
قارغیش زمانه‌نین قانون‌لارینا،
قارغیش اورک‌لری آییران‌لارا
قارغیش اینسان‌لاری قفسه سالیب
بشر حوقوقوندان دم ووران‌لارا.
پهلوی شووینیسمینین فارس دیلینی زورلا قافالارا یئتیرمک سیاستی ایله هئچ جور باریشا بیلمه‌سین عصیانکار شاعیر “یاساق” شعرینده یازیردی:
سهند:
طالئییمه سن باخ!
دوشونجه‌لریم یاساق،
دویغولاریم یاساق،
کئچمیشیم‌دن سؤز آچماغیم یاساق،
گلجه‌ییم‌دن دانیشماغیم یاساق.
قاراچورلو حاقیندا: گؤی‌تورک دؤولتینی یارادان آشینا اوغوللاری دمیرچی ایدی و اونلارین ایکی طایفاسی خصوصی قیلینج بوراخیردی هر طایفا دا ایستیحصال ائتدییی قیلینجا اؤز آدینی وئرمیشدی تایفالاردان بیرینین آدی “بیلگه‌تکینی” دیگری ایسه “قاراچوری” ایدی. هر ایکی طایفانین نیشانی بوراخدیقلاری قیلینجین اوستونده خصوصی شکیلده حک اولونوردو. گؤی‌تورک ایمپراطورلوغو سرحدلری آزربایجانی دا احاطه ائدیردی بولود قاراچورلونون نسلی گویتورکلری یارادان همین قاراچوری طایفاسینا گئدیب چیخیر. ت.ر.ت
بولود قاراچورلو
