جمعه , مارس 29 2024
azfa

بوگون آزربایجانین تایسیز اؤیرتمنی و یازیجی‌سی صمد بهرنگی نین وفات گونودور

گادتب: صمد بهرنگی ، معلم ، سوسیال منتقد و آزربایجان فولکلور آراشدیرماجیسی 1318 قوراپیشیرن آیین 2_نده تبریزین گونئی طرفینین قدیم توخوسوندان اولان چرنداب محله‌سینده کاسیب بیر عایله‌ده دونیا گلدی.

آتاسی عزت ، آناسی ایسه سارا ایدی.

اونون ایکی قارداشی ، اوچ باجیسی واردی.

آتاسی فصلی ایشچیلیکله عایله‌نی دولاندیراردی.

صمد ایلک اوخول و دبیرستانی بیتیرندن سونرا 1334_ده تبریزده اوغلانلار دانشسراسینا گئدیب ، 1336_دا اورادا تحصیلاتینی سونا وئردی.

همن ایلین خزل آییندا هله 18یاشیندا ایکن ، اؤیرتمن اولدو و قیسا عؤمرونون سونونا کیمی آزربایجان کندلرینده درس وئردی.

1337خزل آییندا اینگیلیز دیل و ادبیاتی ریشته‌سینده تحصیلاتینی داوام ائتدیرمک اوچون تبریزین ادبیات بیلیم‌یوردونا گیردی ، اؤیرتمنلیکله بیرگه تحصیلاتینی دا 1341_ده بیتیردی.

بهرنگی 19 یاشیندا ایکن “عادت” آدیندا ایلک حیکایه‌سین یازدی.

بیر ایل سونرا آزربایجان ناغیللاریندان آلدیغی “تلخون” حیکایه‌سینی “ص. قارانقوش” تاخما آدی ایله “کتاب هفته” ده یایدی و بو آدسیز یازماقلار 1342_یه کیمی و باشقا حیکایه‌لرینده ده داوام ائتدی.

سونرالار بهرنگی‌دن “مهدآزادی” ، “توفیق” و .. درگیلرینده ده مقاله‌لر یاییملاندی.

بو یازیلار مختلف آدلار و امضالارلا یاییلاردی او جمله‌دن : داریوش نواب مرغی ، چنگیز مرآتی ، بابک ، افشین پرویزی ، باتمیش و ..

بهرنگی‌نین اینگلیزجه و استانبول تورکچه‌سیندن فارسجایا و فارسجادان تورکجه‌یه ده ترجمه‌لری اولموشدو او جمله‌دن : مهدی اخوان ثالث ، احمد شاملو ، فروغ فرخزاد ، و نیما یوشیج‌دن.

هابئله بهرنگی‌دن آزربایجان فولکلورو و ائییتیم قونوسوندا دا یازیلار یاییملانمیشدی.

1341_ده خوشا گلمه‌ین ایفاده‌لر بیان ائتمه‌سی بهانه‌سیله ، دبیرستان دفترینده و دبیرلرین آراسیندا اخراج اولونوب ایلک اوخولا وئریلدی.

سونرالار صمدین مدنی چالیشمالاری آرتدیقجا ، آذربایجانین او واختداکی کولتور باشقانی‌نین قورغوسو ایله صمدین آیاغی محکمه‌یه چکیلدی آنجاق سوچسوز اولدوغو آچیقلاندی.

1342_ده آزربایجان مدرسه‌لری اوچون تورکجه الیفبا کتابینی یازدی و بو کیتاب چاپ اولماق اوچون ، جلال آل احمد_ین اؤنریسی ایله ساوادسیزلیقلا اولوسلاراراسی مبارزه کومیته‌سینه گؤندریلدی.

آما صمد بهرنگی او کومیته نین کیتابدا ده‌ییشیکلیکلر آپارماسی ایله کسین مخالفت ائله‌دی و کلان پول اؤنردیکلرینی ده رد ائتدی ، کتابی گئری آلدی و کیتابین چاپ اولماسیندا منفعتلری اولانلارین غضبی و نفرتینه سبب اولدو.

1343_ده صمد ، “پاره پاره” کتابینین چاپی اوچون تعقیبه آلیندی و اونا 6 آی خدمتدن اوزاق اولما حؤکمو وئریلدی.

بو ایلده او ، افشین پرویزی آدی ایله ایلک اوخول اوشاقلارینا ساده انشا کتابینی یازدی.

همین ایلین قیروو آییندا اونون تعلیق حؤکمو لغو اولوندو و صمد کیلاسا قاییتدی.

صمد بهرنگی اؤز اؤیره‌تیم طرزینده و حیکایه‌لرینین ایچریگینده حاکیم اولان نیظاما اعتراض ائتمه روحونو اؤیرنجیلرینده بسلمه‌یه چالیشیردی.

یالین آیاقلا کندلرده یولا دوشوردو ، کیمی کتاب ائوی ایجاد ائتمیشسه ، اونو آلقیشلاییب ، کتاب ائوینه یئنی کتابلار آرتیریردی.

اوشاقلاری اوخوماغا تشویق ائدیردی و باشاردیغی قدر ، گوجو یئتیردیگی قدر اوشاقلار و یئنی یئتمه‌لره کتابی سئودیرمه‌یه و اونو همیشه‌لیک بیر یولداش کیمی عؤمور بویونجا یانلاریندا داشیماغا تشویق ائدیردی.

همین دؤوراندا ساواک بهرنگی‌نین بعضی چالیشمالارینا حساس اولدو.

تهدیدلر باشلاندی ، دفعه‌لرجه توبیخ ، جریمه و حتی تبعید اولدو.

صمد بهرنگی 9 زومار 1347 آراز چاییندا شام گوالیک کندی ساحیلینده بوغولدو.

جسدینی 12زومار کلاله پاسگاهیندا ، بوغولدوغو یئرین نئچه کیلومترلیغیندا سودان توتدولار.

صمدین جنازه‌سی تبریزین امامیه قبریستانلیغیندا دفن اولوب.

صمد بهرنگی‌نین اؤلوموندن بیر آی اؤنجه “بالاجا قارا بالیق” کتابی چاپدان چیخمیش ، ایران و دونیا جماعتینین ایلگیسین چکمیشدی.

بالاجا قارابالیق کیتابیندان :

“اؤلوم چوخ راحات لاپ ایندی گله بیلر سوراغیما ، آنجاق من باشاردیغیم قدر اؤلومون اؤنونه چیخمامالییام.

البته بیر گون اؤلومله اوز_اوزه گلسم _کی گله‌جه‌یم ده_هئچ اؤنمی یوخدور ، اؤنملی اولان ، منیم اؤلوب قالماغیمین باشقالارینین یاشامینی نئجه ائتکیلمه‌سینده‌دیر ..”

دوباره امتحان کنید

ترکیه ششمین کشور برتر اروپا در فروش خودروهای برقی است

گادتب: ترکیه در عرصه فروش خودروهای برقی پس از برخی از کشورهای اتحادیه اروپا در …

مرگ مشکوک سارا تبریزی پس از احضار به اطلاعات

گادتب: به گزارش مرکز گادتب، سارا تبریزی ۲۰ ساله ۴ فروردین به وزارت اطلاعات احضار …