ادتاج اتحادیه دمکراتیک ترک آذربایجان جنوبی
گادتب: ۱۳۷۹ الی ۱۳۸۲جی ایللره کیمی آذربایجانلیلار و ایرانین باشقا یئرینده یاشایان تورکلر تیر آیی نین ایلک پنجشنبه و جمعه سینده «بابک خرمدین» ین دوغوم گونونو قوتلایاراق کلیبر شهری و بابک قالاسیندا ان سالیم و مدنی بیر فضادا شعر ، فولکلور و موسیقی مراسیمی کئچیریردیلر و طبیعی کی، اؤلکه قانونلاری و آنایاسا چرچیوه سینده آنا دیلده تحصیل ایستکلری‌ده اولوردو.
آمما بو سالیم مراسیمه قارشی هر ایل او بیریسی ایله نسبت امنیّت قوه لری طرفیندن سیخینتی و بوغونتولار چوخالدی.
حتی آذربایجان شهرلرینده مینی بوس، سواری و اوتوبوس سرویس‌لرینه اخطار وئردیلر تیر آیی نین بیرینجی پنجشنبه و جمعه‌سینده ( بابکین دوغوم گونلری مراسیمینده ) حقلری یوخدور بابک قالاسینا مسافیر آپارسینلار!
ایش اورایا چاتدی کی، ۱۳۸۲ جی ایلده بابک قالاسی آیاغیندا «بابک هُتلی» اطرافیندا نظامی پادگان یاراتدیلار و مراسیمه گلن تانینمیش ملّی شخصیتلریمیزین بیر تعدادینی هئچ بیر سوچ و گوناهی اولمادان توتوقلاییب زیندانلارا سالدیلار ! آمما بوتون بو سیخینتیلارا رغما ، ۱۳۸۲ جی ایل یوز مینلر اینسان بابک قالاسی مراسیمینده و چوخ آغیر باسقی و فیشارلار آلتیندا شرکت ائدیب چوخ سالیم و مدنی بیر فضادا بو گونو شعر و موسیقی و فولکلور ایله عزیزله‌دیلر .
۱۳۸۳ جو ایلدن و بابک مراسیمی گونلری پولیسی فضا او قدر چوخالدی و یوللار باغلاندی کی ، یالنیز آز تعداددا اینسان و اؤزل یوللارلار بو گونده اؤزلرینی قالایا چاتدیردیلار ؛ آمما اونلاردا اؤزل قوه‌لرین نظارتی آلتیندا قالاراق اؤنملی بیر مراسیم کئچیرمه یه موفق اولمادیلار . نهایت ۱۳۸۴ جو ایلدن و بابکین دوغوم گونونده داها هئچ کیمسه‌یه اجازه وئریلمه‌دی بو قالایا گئتسین و حتی باشقا گونلر و آی‌لاردا، بو قالایا گئدنلری مختلیف سورغو – سئواللارا توتدولار!
۱۳۸۴ جو ایلدن سونرا ملّی فعاللار اؤز مدنی- فرهنگی ایستکلرینی ورزش مئیدانلارینا چکیب «تراختور» فوتبال تیمی سوپرلیگه آیاق قویاندان سونرا بو تیمی حمایه ائتمکله آنایاسانین ۱۵- جی ماده‌سی‌نین اجراسینی و آنا دیلینده تحصیل آلماق ضرورتینی ورزشگاهلاردا «تورک دیلینده مدرسه اولمالیدیر هرکسه» شعارینا چئویردیلر.
آذربایجان تورکلری، آذربایجانین ملّی قهرمانی «خرّمدین بابک» ه دوغوم گونو تعیین ائدیب مراسیم کئچیردیکدن سونرا فارس ناسیونالیستلری‌ده بو ابتکاردان اقتباس ائدیب نئچه ایل اؤنجه شیرازین پاسارگاد منطقه‌سینده و قرنلر اؤنجه «مقبره مادرحضرت سلیمان » (حضرت سلیمان آناسی‍نین مزاری) آدی‌ایله مشهور اولان، لاکین بیرینجی پهلوی زامانیندان «کوروش» قبری آدی ایله تانینان بنادا اؤزل بیر گونده مراسیم کئچیردیلر!
طبیعی کی، داها تیر آیی‌نین ایکینجی پنجشنبه- جمعه‌سینده بابک قالاسیندا مراسیم کئچیرمه‌یه اجازه وئریلمیر، آمما بو ابتکار،ملّی-مدنی چالیشمالاریمیزدا اؤنملی بیر حادثه اولاراق آذربایجان تاریخینده ثبت اولاراق واختی و زامانی گلدیکده مسلما یئنه کئچیریله جکدیر.
