گادتب: سانمایین «آنار»ین آتا-آناسی اونا آد آلماقدا باشیسویوقلوق ائدیب و بو گونه کیمی اونا شناسنامه آلماغا اقدام ائتمهییبلر!
یوخ…!
آنارین آتا- آناسی چوخلو تورکلر کیمی آذربایجانلی اولارکن تهراندا یاشاییرلار و بو شهرده اوشاقلاری دونیایا گلیب، آمما اونلارین سوچ و گوناهلاری اوشاقلارینا آنا دیللری اولان «تورک» دیلینده آد آلماقدادیر!
اونلار اؤز اوشاقلارینا اؤز دیل و مدنیتلریندن قایناقلانان و گؤزل آنلام و معناسی اولان «آنار» یعنی «فهیم» آدینی الماق ایسته دیکده اونلارا «ثبت احوال» ادارهسی ایندیه کیمی مثبت جاواب وئرمه ییب و بو اوشاق ایندیه کیمی، یعنی مدرسه یه گئتمه زامانینا یالنیز بیر نئچه آی قالانا کیمی شناسنامهسیز و اصلینده هویتسیز قالمیش و اگر بو قیسا مدتده اونا شناسنامه وئریلمهسه حتی مدرسهیه گئتمکدن بئله محروم قالا بیلَر!
شاشیردیجی و تعجّب ائدیجی بوراسیندادیرکی، «آنار» آدی «ثبت احوال» ادارهسینده وئریلمیش آدلار سیراسیندادیر و هر آتا- آنا اوشاغینا آد قویماغادا اختیار و حق صاحیبی دیر و کیمسه بو حقّی اونلاردان آلا بیلمَز!
بیز ١٣٨٧ جی ایل تهرانین «ثبت احوال» اداره سیندن قارداشیم اوغلونا «آنار راشدی زهرا» آدی ایله شناسنامه آلدیق، البته او زاماندادا بو آدی وئرمک ایستهمیردیلر آمما بیزیم علمی، منطقی و قانع ائدیجی دلیل لریمیزه باش اگمگ مجبوریتینده قالدیقدا بو آدی وئردیلر!
منیم قارداشیم موغاندا (پارساآباد» دا یاشاییر، موغان و اردبیل ثبت احوال ادارهسی «آنار» آدی ایله شناسنامه وئرمکدن امتناع ائتمیشدی، قارداشیمدا باشقا آدلا شناسنامه آلماغی قبول ائتمه دیکده پرونده تهرانین «ثبت احوال» ادارهسینه منتقل اولدوقدا، من بو اداره ده اونون باش مسئولو ایله دانیشیغا و دیالوگا گیریب «آنار» آدینین تورک دیلیمیزده نه قدر آنلاملی و گؤزل معنالی اولدوغونو یازیلی اولاراق اونلارا آنلاداندان سونرا اونلار بیر کمیسیوندا «آنار» آدیندا شناسنامه وئریلمهسینه بویون قویدولار! بو جریاندان سونرا سانیرام ثبت احوال ادارهسینده چوخلو شناسنامه،«آنار» آدیندا ثبت اولونوب و بوعزیز بالامیزا یئددی ایله یاخین «آنار» آدیندا شناسنامه وئریلمهمهسی، گئرچکدن غیر انسانی و آچیق – آیدین نژادپرستلیک اولاراق محکومدور!