ادتاج اتحادیه دمکراتیک ترک آذربایجان جنوبی
گادتب: تیراختوروموزون پیروزی له اویونو اولان گۆن، بیر سیرا اؤزل ایشلریم اۆچون ایستادیومدا اولا بیلمه دیم آنجاق تیراختورلا پیروزی نین مودیرعامیل لریندن چوخ ایستادییوملارا گئدن بیریسی اولاراق، بونا اینانیرام
سهند ایستادییوموندا توتولان هر تصمیم ائله اوردا زمان ـ مکان تابعی دیر.
او اتمسفرده یاشایانلار گؤرۆلن هر بیر ایشین سونوجلارینی، ائوده اوتوروب تحلیل لر یازیب بیانیه وئرن آیدین باخیشلاردن؟!!! داها دا دوغرو دۆشوب آتدیقلاری هر بیر آددیمی عئشق له گؤتورورلر.
فوتبال اویونلاری لا تانیش اولانلار ۲۰۰۲ جی ایل لوییس فیگونون، نیوکمپ ایستادییوموندا باشینا یاغدیریلان نسنه لری هله ده اونوتماییبلار.
او گئجه بارسا آزارکئش لری(طرفدارلاری) دمیر پوللار، سو قابی لارلا، مین بیر جور ایتی و کسکین نسنه لرله بیرگه، بیر اۆتولموش دونقوز(دوغوز) باشینی دا فیگونون اۆستونه آتدیلار
سونرالار قازئتا دئلوا اسپورت بئله یازدی؛ «او گئجه سانکی گؤی یارالیب دمیر پول یاغیردی»
بو دونقوز باشی فیگویا تحقیر اۆچون مئیدانا آتیلمادی، ایسپانیادا گئدن سیاستلره قارشی بیر اعتیراض ایدی، آنجاق بونلارین هامیسینا رغما حاکیم اویونو دوردورماییب و بارسایلا کاتانلارا قارشی هئچ کس بیانیه لر یازمادی، تام ترسینه اولاراق فیگونون توپو الینه آلیب کورنئر وورماغا گئتمه یینی تحریک عامیلی آدلاندیردیلار.
ان آزی کاتالانلاردان هئچ بیری ژنرال فرانکونون میراثی اولان رئال تیمینه اولونان اهانت لره گؤره اؤز میللتینی قینامادی، اونلار بئله داورانیشلاری فاشیست دۆشونجه لرله، عدالتسیزلیگه قارشی موباریزه نین بیر قولو بیله رک بیر سس ـ بیر میللت اولدولار
فوتبال مئیدانیندا جانلا باشلا موجادیله وئرن گواردیولادان توت گلسین جئرالد پیکه یه کیمی، کاپتان پویولا دک و…..
اونلار، اۆزدن ایراق کریم باقری له دایی لر، آقایی لر و… یۆزلر ساتقین کیمی میللتلری قارشیسیندا دییل، خالقلاری نین یانیندا دوروب، اؤدول لرینی ده میللی قهرمان اولاراق آلدیلار.
بو سطیرلری یازارکن بیلیرم اسپانیا فوتبالی لا بورانین فوتبالینی توتوشدورماق دۆز بیر ایش دییل، آنجاق هر ایکی اؤلکه ده فاشیستدن یانا بیر تیم له میللی ایستکلر گؤسترگه سی اولان بیر تیم قارشی ـ قارشی یا دانیر.
آنجاق اوردا آزارکئش لرین ائتدیگی هر حرکت و توتدوقلاری هر تصمیم خالق طرفیندن ساوونولور، بوردا یئرلی ساتقین لارلا فارسلارا قویروق بولایانلار طرفیندن قینانیلیر، اؤرنک اۆچون بولاندیریق سودان بالیق توتماق ایسته ییب تبریزلی لر آدینا قوندارما بیانییه یازیب و داش آتانلاری تبریزلی یوخ، باشقا شهرلردن گلن آزارکئش لر تانیداراق بیرلیگی پوزماق ایسته ین میندارلارین چیرکین ایشی.
سؤزومو یئنی دن تیکرارلاییرام او گۆن سهند ایستادییوموندا توتولان هر تصمیم و گؤرونن هر ایش، هابئله آتیلان هر داش، فاشیست قوللوغوندا اولان فوتبال فدراسیونونا یوخ، اؤلکه ده تۆرکلره قارشی تؤره دیلینن تبعیض لرله، عدالت سیزلیکلره بیر اعتیراض سیمگه سی ایدی.
نه تئهراندا تیراختورا قارشی آتیلان ال بومبالارینا جاواب ایدی نه باشقا شئی، تکجه بیزیم فارسلارلا آچیلدیغی آرانین درین لیگیندن خبر وئرن موشتولوق قارانقوشلاری ایدی.
او اۆزدن مئیدانی بوش بوراخمایان ایگیدلریمیزه گۆوه نیب اونلارا عئشق اولسون دئییرم.
