ادتاج اتحادیه دمکراتیک ترک آذربایجان جنوبی
گادتب: آذربایجان اسکی و ایلکین یاشام یوردو اولدوغوندان آسیلی، بو تورپاقلاردا یاشایان میللتین ده اسکی اینانجلارلا باغلی چوخلو گؤزل دبلری اولوب و وار
بونلارین بیر چوخو اونودولوب آرادان گئتمیشسه ده، بیر پاراسی هله ده یاشاماقدادیر
قوشاچای ین بیر سیرا کندلرینده چرشممه آخشامی نین دبلرینین بیر سیراسی اونودولسا دا یازدیقلاریمیز هله ده یاشاماقدادیرلار
– بوگون چرشممه لیک آدلی پای لار، بؤیوکلر طرفیندن کیچیکلره گؤنده ریلر
چوخلوقجا بایرام پایینی دا ائله سه شنبه گونو گؤنده ررلر،
گنج اوغلانلار بو پایی آپارماغی چوخ سئوه رلر- آغ بوقچالارا بوکولن پایلاری(بی بی لری-بؤیوک آنالاری و باجی لاری ائولرینه آپاردیقلاریندا،
پای آلان; پای گؤنده رن ساغ اولسون/پای گتیرن وار اولسون دئییب; پای ین یئرینی بوش قویماییب و بیر جوت جوراب،گوللو دسمال(مندیل) و بویاقلی یومورتا وئریب، پای گتیره نی سئوینجله یولا سالارمیشلار
– بیر ایکی گون اؤنجه دن یئنی آداخلانمیش اوغلان ائوی طرفیندن،گلین لرینه چوخ گؤزل بیر حالدا(هرنه آلیب /پالتاردان توت، شیرنی و …) قوهومون خانیملاری لا بیرلیکده آپاریلیب شنلیک ائده رلر
( توی ائدیب اؤز ائولرینه کؤچدوکدن سونرا ایلک ایل قیز ائوی، موفصصل بایراملیق گتیرر و گلن ایللرده پایینی گؤنده ررلر)
– آخشام اوستو، ائوین بؤیوگو داما چیخیب و دامین دؤرد دؤوره سینی جیزیقلایارمیش-
دوشمانلار و گؤزه گؤرونمه ین پیسلیک و خبیث روحلاردان قورونسونلار
(اسکی لرده کندیمیزده بیر قوجا آرواد دئییردی; بیر ایل اری چیخیب دامی جیزیقلامامیشدی و ایکی نوه سینی او ایل شئشه ووردو؟!!)
– قووروغادان بیر چنگک دویونچه یه باغلاییب داما آتارمیشلار، روزی بول اولوب، خئیر-برکت گتیرسین
(دام اوجالیق-یوکسکلیک و بوللوق سیمگه سیدیر)
– ائوده (قیش ائولرینده) پالچیق دووارلاردا، اون لا(آرد) بیر قادین(چرشممه ننه سی) و بیر ارکک(چرشممه اوغلونون) رسملرینی ال-اله توتموش حالدا چکیب، بونلارین آغیزلارینا چرشممه یئمیشی قویارمیشلار(یاپیشدیرارمیشلار) آغزی شیرین لیک اولسون دئیه، بو شکیللر اؤزلری سیلینمه یینجک سیلمزمیشلر،
– چرشممه سیرفاسینی آچماق اوچون، چرشممه بازارلیغی ان اؤنملی ایشلردن ساییلاردی(بیر چاغلار چرچی و خره زی مالی، باغیران کیشی لر کنده وساییل گتیره ردیلر)
آینا(گوزگو)،داراق،شامشا(کیبریت)، سیرفا(بوغچا-مندیل)،چیراق و چرشممه یئمیشی،(بو گونه کیمی وارلیغینی قورویوب-بایرام آجیلی شور اولسا دا چرشممه آجیلی شیرین اولور)، سو تونگوله لری(کوزه لری) و چرشممه فیشدیراغی و….
– بو آخشام هرکس بورجلارینی اؤده ییب و قونشودان بیر یومورتا دا آلمیش اولسایدی بئله اونو قایتاراردی (یئرین ۱۳ گون سونرا داغیلماسینا اینانجدان آسیلی اولاراق-بورجلو قالماغی سئومزدیلر)
– سیرفا باشینا توپلانمادان اؤنجه، تونقاللار قالیب بؤیوک اود یاندیرارمیشلار
(گنج لر،
آتیل ماتیل چرشممه
آینا کیمی بختیم آچیل چرشممه)
و یاشلی لار،
آغیرلیغیم-اوغورلوم-
باش آغریم- دیش آغریم و… هامیسی بوردان قالسین
دئییب اودون اوستوندن آتیلارمیشلار،)
ان گؤزل ایشلردن چرشممه اودونون کؤزلرد اوستونه سو سپمه مکدیر (بئله اینانیرلار بو اودو ال له سؤندورمک، اوجاق سؤندورمکدیر، او اوزدن اؤزو قالیب کؤزه ریب سؤنر و کؤزلر مینجیق باغلایار)
– قونشولاری یاسلی اولدوغوندان دولایی، او ایل چرشممه سیرفاسی سالماییبلار دئیه، ائوین قادینی، بیر مئژمه یی ده اؤزلری اوچون نه واردیرسا،قونشویا داپای آپاریب، اونلارین بالاجا اوشاقلارینی سئویندیررمیشلر
(چوخ واختلار دا آغ بیرچکلر یاسدان چیخارتماق اوچون بیر باش اؤرتوسو و کؤینک آلیب گئدیب یاسلی لاری یاسدان چیخارارمیشلار
– چرشممه سیرفاسینین باشینا توپلانیب قووورغادان، یئمیشلردن یئییب یومورتا دؤیوشدوررلر،
– سونرا، بو آخشامین ان گؤزل دبی اولان، شال ساللاماق اوچون یولا چیخارلار
بو گونلر باجالارین اولمادیغیندان دولایی، قاپی لارا شال و لچک لر باغلانیلیر
ائو یییه سی ده چوخ گؤزل بیر شکیل ده، سئوینیب و شال ساللایانا، بادام-یومورتا-قوز(گیرده کان) و چرشممه یئمیشی ایله جوراب باغلاییب، باجادان ساللانان شالی بیر-ایکی دؤنه سیلکه له ییب و اوسته چکیلمه یین ایسترمیشلر
بو گونلر چوخلوقجا پول باغلانیلیر،
– اسکی لرده گنجلر سئودیکلری قیزلارین ائوینه شال ساللاسایدیلار، قیز آناسینا قاش-گؤز ائدیب و بیلدیررمیش سئودیگی اوغلان گیلدن گلیب بو شال (آلما قویولسایدی یانی قیزی وئره جه ییک/ چک شالینی تانیدیق- شالا آلما باغلادیق)
قیزی او ائوه گلین وئرمک ایسته مه سه یدیلر ده،
(آی باجادان یوللاما
شالینی چک ساللاما
سیزه وئرمه لی قیز یوخ
آلما آلیب یوللاما)
– بو گئجه بؤیوکلر ائوینه توپلانیلیب و بایاتی لا تاپماجا دئییب گئجه نی، شنلیک لره چئویررمیشلر
– قادینلار اوره کلرینده بیر سؤز یا حاجتی توتوب، قونشولاری نین ائوینه گیزلی جه قولاق آسماغا گئده رمیشلر او اوزدن بو گئجه چالیشارمیشلار خوش و اولوملو(موثبت) سؤزلر دانیشیلسین.
-صاباح ائرته دن هامی آخار سولار و چای باشینا گئدیب سویوق سودا ال-اوزلرینی یویوب و ساغلاملیق و ایشیق لیق سیمگه سی اولان سودان گوج آلیرلار،
– کوزه لرده سو گتیریب ائوین آستاناسینا تؤکوب ائوله حیه طی گؤزه لجه سینه سوپوررمیشلر،
آنالار صوبح آچیلدیغیندا قیزلارینا بئله دئییب اونلاری سو و بولاق باشینا آپارارمیشلار;
آناجان، دور گئدک چای باشینا
سن آتیل باختین آچیلسین
گلن ایل گلین گئت
گلین گولو باشینا ساچیلسین.
سو و بولاق باشیندان دان آتیلیب یئنی آلینمیش داراقلاری سویا باتیریب و گوزگویه باخیب تئل لرین داراییب، داراغا ایلیشه ن توک تئللرینی سویا تاپشیرارمیشلار.
بو دبلرین بیر سیراسی، بالاجا دییشیک لیکلرله هله ده یاشاماقدادیر و بیر سیراسی ده اونودولماغا گئدیر
و بیزلر بو دبلری قوروماقلا، گله جک سویوموزا پای وئره بیله ریک
– بو یازی اوچون درین سایغیلاریمی،
دوستوم بابک شیکاری و حؤرمتلی آناسی و اؤز سئویملی آناما (اؤز سؤیله دیکلری سؤزلر و دبلرله چوخ بؤیوک ائتگی لری اولدو) بیلدیریرم،
