ادتاج اتحادیه دمکراتیک ترک آذربایجان جنوبی
گادتب: یئنه مهر آیی گلدی و فارس اولمایان دیللرین تدریسی حاققیندا یازماغا باشلادیلار. هر کیمسه بو قونویا بیرآچیدان باخیب و فیکرینی سؤیله‌ییر.
انسان بو دونیایا گؤز آچدیغیندان اؤلن گۆنونه قدر فرقلی ائولرده یاشاییب و فرقلی ائولر تجربه ائدیر: آتا ائوی، ایکینجی ائو، بخت ائوی، آللاهین ائوی، ابدی ائو…
ائوین آدینی ائشیتدیکده انسانین بئینینه حضور و آرامش گلیر. بیر دینج یئر کی، انسان اورادا یاشاماغی هر یئردن اوستون توتور. آتا ائوی ایله ایکینجی ائو هر انسان اوچون چوخ اؤنملی ائودیر. چونکی انسانین تمل و اساس کارکتئری بو ایکی ائوده اولوشور و بو ایکی ائوین بیر-بیری ایله سیخ ایلگی‌سی وار. بیر انسانین باجاریقلی و اؤز‌گوونلی اولماسی اوشاقلیغینداکی دوزگون تربیه‌سینه قاییدیر.
پیسخولوق‌لارین آراشدیرماسینا گؤره بیر اوشاغین ۸۵٪ کارکتری ۹ یاشینا دک اولوشور. و بو اۆزدن آتا-آنانین و اؤیرتمن‌لرین سوروملاری آغیردیر. بیلدیگینیز کیمی اوشاق بیر ائیلمی دیلده دئییل عمل‌ده اؤیره‌نیر. یعنی آتا-آنا یاخود اؤیرتمن نه‌قدر تئوریک اولاراق بیر شئیی اوشاغا اؤیرتمه‌یه چالیشسا دا یئنه اوشاق اونلارین داورانیشینی نظره آلاراق اؤیرندیکلرینه آرتیریر. اوشاق هانسی دینه، مذهبه، دیله باغلی اولدوغونو ایلک دفعه ائوده اؤیره‌نیر. طبیعی اولاراق آتا-آنا اؤز دیلی ایله اوشاغلا ایلگی قورار. و اوشاق دا اطرافینداکی انسانلارلا ایلگی قورماق ایسته‌‌ینده ایستر-ایسته‌مز آنا دیلینده دانیشار.
اوخول اوشاغین ایکینجی ائوی آدلاندیغی حالدا ایکی دیللی اوشاقلار اوچون اصلا دینج و حضور یئری دئییل. چونکی او بیر غربیه انسانلا ( اؤیرتمن) قارشیلاشارکن، بوتون صینیف و اورادا اؤیرندیگی دیل بونا یاد و اؤزگه گلیر. بو دیل اوشاغا یاد گلدیگی اوچون دانیشماغا و نظر وئرمه‌گه جسارت ائده بیلمیر. باشقا دیلی اؤز دیلیندن اۆستون گؤرور (کتابلاردا یازیلیر، اوخوللاردا تدریس اولونور و …) بیلمه‌دن ایچه‌ریسینده اؤز دیلینه حقارت حیسی یارانیر. او زامان اؤزونو، دیلینی، کیملیگینی گیزلتمه‌یه چالیشیر. اؤیرتمنینی بیر ساوادلی و امین انسان گؤردوگو حالدا اونون دئدیکلرینی ده وحی منزل کیمی سانیر.
بئله‌لیکله اؤزگۆونلیگی‌نین آشاغیلانماسی، حقارت حیسی و … بونون وجودوندا کؤک سالیر. و بؤیوینده بیر ایچی بوش انسان کیمی توپلومدا یاشاییر. ایمکانی وار چالیشماقلا یوکسک علمی درجه‌لره چاتسین. آما انسانین آماجی یاشامدان تکجه بو باجاریق‌لارا وارماق دئییل، بلکه اؤزونو، کیملیگینی تانیماق و دوزگون یاشاماق‌دیر. اؤزونو، کیملیگینی، تاریخینی تانیان انسان ایچی‌بوش و کؤله کیمی دئییل آزاد بیر انسان کیمی یاشاییر.
