ادتاج اتحادیه دمکراتیک ترک آذربایجان جنوبی
گادتب: روسیه ایوان مخوفدان بویانا تورکلرین باش بلاسی، پوتین بو گونکو روسیه نین ناسیونالیست حاکیمی، ارمنستان روسیه نین آزربایجان توپراقلاریندا اکیدیگی موزآلان توخومو.
ارمنستان آدلی بیر دولت زوراکیلقلا آزربایجان توپراقلاریندا یارادیلیب کی، قفقازلاردا روس امپریالیستلرینین ال آلتی دایاناجاقلاری اولسون. قفقاز تورکلرینین ضعیفلدیب ایشدن سالماق اوچون نه خیانتلر کی ائرمنیلرین الیله آزربایجان میللتی و مملکتینه ائلمییبلر روسلار. یوز ایل اونجه روسلار زنگه زورو آزربایجاندان آلیب ارمنستانا الحاق ائتدیلر، بئله لیکله ارمنستانی عقرب قویورغو تک اوزالتیب آزربایجانین جانینی زهرلییب نخجوانی آزربایجاندان آیری سالیدیلار. بونا کفایتلنمه ییب، قره باغی خودمختارلیق آدیله ائرمنی لره وئریب آزربایجانین تام اوره یینین باشینا داها بیر یئنی خنجر سوخدولار.
یوز ایلدن آرتیقدی شمالی آزربایجان جمهوریتی بو عقربین زهرلی قویوروغو و بو خنجرین قان آخار یاراسیندان قورتولا بیلمیر.
شوروی داغیلاندا آزربایجان ان چتین و ضعیف بیر دوروما سالینمیشدی، ائرمنیلر بو ضعفلیکدن سواستفاده ائدیب روسلارین یاردیم ایله یوزده اییرمی فاییز آزربایجان توپراقلارین ایشغال و اوتوز ایل عرضینده بوتون آبادانلیقلاری محو و نابود ائتدیلر.
بو آرادا بیر کیشی، بیر جوانمرد، اردوغان آدلی بیر اینانجلی مسلمان تورک آزربایجانین هارایینا گلدی، اونون یاردیم ایله آزربایجان رهبرلیگی ایشغال آلتیندا اولان تورپاقلارین آزاد ائتدی. اما سون دیقه لرده یئنه ده روسیه ائرمنستان ایشغالچیلیغینا دستک وئریب، آزربایجان رهبرلیگینه گئجه ایله آتش کس آنلاشماسی ایمضالادیب حربی قووه لرین صلح مراملیلار آدیلا گتیریب قره باغا یئرلشدیردی. ایندی ایسه روس حاکمیتی الهام علی یف و پاشنیانی میز باشینا چاغریب روسیه یه پای چکمک ایسته ییر، دورد ساعات مذاکره دن سونرا پاشنیان چیخیب دییر قره باغین سرنوشتی هله نامعلوم دی و مینسک گوروپو اونون حل ینه کمک ائتملیدی. الهام علی یف دییر صلح مراملی قوه لرایله بیرآز پروبلملر وار و قراریمیزدی کی ارتباط یوللاری آچیلسین. پوتین دییر نگران قالمایین هر شئی یئرینده دی، روسیه نین صلح مراملی حربی قوه لری لاییقینجه اوز تکلیفلرینی یئرینه یئتیریرلر و قره باغدان قاچان ائرمنی لری قره باغا قایتاریرلار.
بو آردا سیزجه آزربایجان خالقینین اوره یینه دوشن قان لکه لری سیلمک اولارمی؟ حسن ارک ۹۹/۱۰/۲۳
