ادتاج اتحادیه دمکراتیک ترک آذربایجان جنوبی
گادتب-نین مطبوعات مرکزینه داخیل اولان معلوماتا گؤره، آوسترالیا-آذربایجان آسوسیاسییاسی پرئزیدئنتی و گونئی آذربایجان دئموکراتیک تورک بیرلیگی (گادتب) بئین الخالق علاقه‌لر دئپارتامئنتی صدری سایین میکائیل بی اویتا و گادتب قادین مسئله‌لری و اینسان حاق‌لاری دئپارتامئنتی‌نین صدری سایین سارا خانیم آزرسون آوسترالیادا بئین الخالق نوروز بایرامی تدبیرینه دعوت آلیب و همین تدبیره قاتیلیب‌لار.
تدبیر بو گون 23 مارتدا آوسترالیانین یئنی گونئی اوئلز (NSW) ایالتی‌نین پارلامئنتی‌نین باغچاسیندا کئچیریلیب.
آوسترالیا دؤولت رسمی‌لری و پارلامئنت نماینده‌لری‌نین ده قاتیلدیغی تدبیرده آوسترالیا-آذربایجان آسوسیاسییاسی طرفین‌دن همین آسوسیاسییانین پرئزیدئنتی سایین میکائیل بی اویتا نووروز بایرامی موناسیبتی ایله چیخیش ائدیب. او، بو بایرامین اؤزل‌لیک‌لرین‌دن دانیشا‌راق، بوتون ایشتیراکچی‌لاری بایرام موناسیبتیله تبریک ائدیب، اونلارا بول روزی-برکت آرزو ائدیب.
تدبیره گونئی آذربایجان دئموکراتیک تورک بیرلیگی (گادتب) طرفین‌دن ایسه گادتب قادین مسئله‌لری و اینسان حاق‌لاری دئپارتامئنتی‌نین صدری سایین سارا خانیم آزرسون قاتیلیب.
تدبیره آوسترالیانین یئنی گونئی اوئلز (NSW) ایالتی‌نین رسمی‌لرین‌دن، او جمله‌دن چوخلو میللت وکیلی و سیدنئی شهری‌نین بلدیه باشقانی، ائله‌جه ده نووروز بایرامینی قئید ائدن میللت‌لردن بعضی‌لری، او جمله‌دن افغانلار، پاکیستانلی‌لار، هیندلی‌لر و فارس‌لار قاتیلیب‌لار.
