ادتاج اتحادیه دمکراتیک ترک آذربایجان جنوبی
گادتب: ۲۳ مای تاریخینده آوسترالییانین سیدنئی شهرینده آسیا مولتیکولتورال ایجماسینین تدبیری کئچیریلیب. آوسترالییا آذربایجان آسوسیاسییاسینین پرئزیدئنتی و گونئی آذربایجان دئموکراتیک تورک بیرلیگی (گادتب) بئین الخالق علاقهلر دئپارتامئنتینین صدری سایین میکائیل بی اویتا، گونئی آذربایجان دئموکراتیک تورک بیرلیگی (گادتب) اینسان حاقلاری دئپارتامئنتینین صدری سایین سارا خانیم آزرسون رسمی دعوتله همین تدبیره قاتیلیبلار.
تدبیر آسیا مولتیکولتورال بؤلمهسی اولان «بوندهو» تشکیلاتی طرفیندن تشکیل اولونوب. پروقرام چرچیوهسینده موختلیف خالقلار اؤز میللی گئییملرینی، میللی مطبخ نومونهلرینی و فولکلور رقصلرینی نوماییش ائتدیریبلر.
تدبیرده همچینین آشاغیداکی رسمی شخصلر ایشتیراک ائدیبلر:
برئندون آبوریگئن شوراسینین نمایندهلری
میللت وکیلی جئیسون یات-سئن لی
دئوید مئنسفورد شوراسینین نمایندهلری
دئوید، یئنی جنوبی اوئلس پارلامئنت عضوو
میللت وکیلی خانیم ساللی سیتو
تدبیرده تورکیه، آذربایجان، چین، کورئیا، مونقولوستان، بنگلادئش و ویئتنام ایجمالاری دا ایشتیراک ائدرک اؤز مدنیتلرینی تقدیم ائدیبلر.
تدبیرده سایین میکائیل بی اویتا اینگیلیسجه چیخیش ائدیب. چیخیشن ویدئوسونو و آذربایجان تورکجهسینه ترجومهسینی تقدیم ائدیریک:
حؤرمتلی خانیملار و جنابلار، ده یرلی قوناقلار،
آوسترالییا آذربایجانلیلاری آسوسیاسییاسی آدیندان — هانسی کی، من بورادا پرئزیدئنتییم و ائلهجه ده جنوبی آذربایجان دئموکراتیک تورک بیرلیگی (گادتب) اوزره بئین الخالق علاقهلر اوزره باش رهبر کیمی فعالیت گؤستریرم — بو چوخ مدنیتلی تدبیرین تشکیلاتچیلارینا صمیمی تشکورومو بیلدیریرم.
خصوصیله دؤکتور نازلئئ سئددیگوی و خانیم ایندئریللایا بیزی بو تدبیره دعوت ائتدیکلرینه و ایجمالاری دوستلوق، آنلاییش و حؤرمت چرچیوهسینده بیر آرایا گتیردیکلرینه گؤره تشکور ائدیرهم.
همچینین بو تورپاغین عنعنه وی صاحبلرینی حؤرمتله آنیر، کئچمیش و بوگونکو آغ ساققاللارا درین احتیرامیمی بیلدیریرم. بو تورپاق همیشه آبوریگئنلرین تورپاغی اولموشدور و بئله اولاراق قالاجاقدیر.
بیز هارادان گلمه ییمیزدن آسیلی اولمایاراق هامیمیز آوسترالیالیییق. بیز بو اؤلکهنی سئویر و اونا حؤرمت ائدیریک. آوسترالییا دونیانین ان بؤیوک چوخ مدنیتلی اؤلکهلریندن بیریدیر؛ بورادا موختلیف مدنیتلره، دیللره و اینانجلارا صاحب اینسانلار صلح و هارمونییا ایچینده یاشاییرلار.
بو گون قیسا اولاراق آذربایجان حاقیندا — بیزیم تاریخیمیز، مدنیتیمیز و ارثیمیز بارهده دانیشماق ایستردیم. آذربایجان «اودلار یوردو» کیمی تانینیر، چونکی زنگین طبیعی گاز و نئفت احتیاطلارینا مالیکدیر و بو دا تاریخ بویو بؤلگهمیزی شرق و غرب آراسیندا موهوم بیر کؤرپو حالینا گتیرمیشدیر.
۱۹-جو عصره قدر آذربایجان قاجار دؤولتینین ترکیبینده واحید بیر اراضی ایدی. لاکین ۱۸۰۰-جو ایللرین اوللرینده روسییا ایشغالی و موداخیلهسیندن سونرا وطنیمیز ایکی حیسهیه بؤلوندو: شیمالی آذربایجان و جنوبی آذربایجان.
شیمالی آذربایجان ۱۹۱۸-جی ایله قدر روسییا نظارتینده قالدی و همین ایل آذربایجان خالق جومهوریتی قورولدو. جمعی ۲۲ آی مؤوجود اولماسینا باخمایاراق، بو رئسپوبلیکا موسلمان دونیاسیندا ایلک دئموکراتیک رئسپوبلیکالاردان بیری اولدو و بیر چوخ اؤلکهدن اول قادینلارا سس وئرمه حقوقو وئردی.
تأسف کی، ۱۹۲۰-جی ایلده قیزیل اوردو یئنیدن آذربایجانا داخیل اولدو، چوخسایلی اینسانین حیاتینا سون قویدو و اؤلکهنی سوئت ایتفاقینا بیرلشدیردی.
سووئت اتفاقینین داغیلماسیندان سونرا و آذربایجان خالقینین بؤیوک اعتراضلاری و فداکارلیقلاری نتیجهسینده آذربایجان رئسپوبلیکاسی ۱۹۹۱-جی ایلده یئنیدن موستقیللیگینی قازاندی.
لاکین بو گون ده ۴۰ میلیوندان چوخ آذربایجانلی جنوبی آذربایجاندا یاشاییر و بو اراضی حاضردا ایران رئژیمینین نظارتیندهدیر. اورادا اینسانلار اؤز آنا دیللرینده تحصیل آلا بیلمیرلر. جنوبی آذربایجاندا بیر چوخ اینسانلار مدهنی حقوقلار، آزادلیق و شیمالداکی — آذربایجان رئسپوبلیکاسی ایله بیرلیک آرزوسو ایله یاشاییرلار.
آذربایجان هم ده زنگین مدنیت و عنعنهلر اؤلکهسیدیر. بیزیم عنعنه وی یئمکلریمیزه دولما، کاباب، پلوو، موختلیف شوربالار (آش)، همچینین پاخلاوا داخیلدیر و بونلار قوناقپرورلیک و سخاوت رمزی اولاراق عائله و قوناقلارلا پایلاشیلیر.
عنعنه وی آذربایجان گئییملری رنگارنگ، ظریف و رئگیونون تاریخ و کیملیگی ایله سیخ باغلیدیر. ان سئویملی بایراملاریمیزدان بیری نووروز بایرامیدیر — یازین و یئنی باشلانغیجلارین بایرامی — موسیقی، رقص، عائله گؤروشلری و عنعنه وی یئمکلرله قئید اولونور.
آذربایجان همچینین ال توخونوشلو خالچالاری ایله مشهوردور، خصوصیله جنوبی آذربایجانداکی تبریز خالچالاری دونیانین ان اینجه خالچالاریندان ساییلیر. تأسف کی، بونلارین بیر چوخو بئین الخالق سوییهده «فارس خالچالاری» کیمی تانینیر، هالبوکی اونلارین کؤکو آذربایجان مدنیتینه عاییددیر. تبریز آذربایجان پیشیی ده گئنیش شکیلده «فارس پیشیی» آدی ایله تانینیر.
جنوبی آذربایجانین پایتاختی اولان تبریز شهری دونیانین ان قدیم و ان بؤیوک اؤرتولو بازارلاریندان بیرینه ائو صاحبلیگی ائدیر. حتی مارکو پولو اؤز سیاحتلرینده بو شهری تصویر ائتمیشدیر. بو بازار اؤز معمارلیغی، صنعتکارلیغی و تاریخی اهمیتی ایله مشهوردور.
شیمالی آذربایجان ایسه چوخ مدنیتلی و موختلیف بیر اؤلکهدیر. موسلمانلار، خریستیانلار، یهودیلر و دیگر دینلرین نمایندهلری عصرلر بویو بورادا صلح ایچینده یاشامیشلار.
آذربایجان هم ده داها گئنیش تورک دونیاسینین بیر حیسهسیدیر — تورکیه، قازاخیستان، اؤزبکیستان، قیرغیزیستان، تورکمنیستان، شیمالی کیپر تورک رئسپوبلیکاسی، شرقی تورکوستان، تاتارلار و بیر چوخ دیگر خالقلارلا بیرلیکده.
بو گون بیز بوتون خالقلار و میللتلر اوچون صلح، عدالت، اینسان حقوقلاری و مدهنی کیملیک اوغروندا دایانماغا داوام ائدیریک.
دقتینیزه گؤره چوخ تشکور ائدیرهم.
چیخیشین ویدئوسو:
