ادتاج اتحادیه دمکراتیک ترک آذربایجان جنوبی
گادتب: آوسترالییا-آذربایجان آسوسیاسییاسینین پرئزیدئنتی، گونئی آذربایجان دئموکراتیک تورک بیرلیگینین (گادتب) بئین الخالق علاقه‌لر دئپارتامئنتینین صدری میکاییل بی اویتا آذربایجان رئسپوبلیکاسی پرئزیدئنتی ایلهام علیئوه مراجعت عنوانلاییب.
مراجعت‌ده بیلدیریلیر:
“محترم جناب پرئزیدئنت!
ذاتی-عالیلرینیزین کوماندان‌لیغی آلتین‌دا ۴۴ گونلوک محاربه‌ده آذربایجانین مظفر اوردوسونون غلبه‌سی ایله نتیجه‌لنن اوغورلو دیپلوماتییانیزین سایهسینده، بو گون ۵۰ میلیونلوق آذربایجان خالقی، دونیانین هر یئرین‌ده آلنی آچیق و باشی اوجا بیر خالق کیمی یاشاماق‌دادیر.
۳۰ ایل عرضینده، تورپاقلاری ایله بیرلیک‌ده، شخصیتی، غرورو، منلیگی و اعتباری تاپدالانمیش مغلوب بیر خالقین، کوللر آلتین‌دان یئنی‌دن شعله‌لنمه‌سینی، یئنی‌دن دیرچلمه‌سینی، یئنی‌دن باشی اوجا و مظفر یاشاماغینی سیزه بورجلویوق. بو حقیقتی، قوزئی‌لی-گونئی‌لی آذربایجان خالقی تاریخ بویو اونوتمایاجاق‌دیر.
جناب پرئزیدئنت، سیز هر کس‌دن یاخشی بیلیرسینیز کی، نه یی، نئجه و نه واخت ائدجکسینیز، و یوروتدویونوز اوغورلو دیپلوماتییا بونو هر زامان ثبوت ائتمیش‌دیر. سیزین ۱۱ نویابر ۲۰۲۲-جی ایلده، سمرقندده تورک دؤولتلری تشکیلاتینین ۹-جو زیروه گؤروشون‌ده، ائله جه ده اوندان ۱۴ گون سونرا آدا اونیوئرسیتئتین‌ده کئچیریلن بئین الخالق کونفرانسین‌داکی چیخیشلارینیزدا، تورک دونیاسینین «قانایان یاراسی» اولان «گونئی آذربایجان» خالقینین دردلری و کدرلرینه توخونمانیز، بو خالقین اومید قایناغینا چئوریلمیشدی.
سیزین وورغولادیغینیز ۲۰۰ میلیون‌دان چوخ نوفوسا مالیک اولان تورک دونیاسینین، ۴۰ میلیونو گونئی آذربایجان‌دا چوخ آجیناجاق‌لی دوروم‌دا، دیلینی، کیملیگینی، مدنیتینی و بیر سؤزده معنوی وارلیغینی ایتیرمک‌ده‌دیر.
بیز بو گون چوخ خوشبختیک کی، سیزین کیمی بؤیوک سرکرده، دونیا چاپین‌دا دیپلوماتییادا، ائله‌جه ده محاربه‌ده اؤز ایمضاسینی ووران بیر لیاقت‌لی لیدئر و عالی باش کومان‌دان، اؤز سرحدلرین‌دن کناردا قالمیش خالقینین حاق سسینی بؤیوک تریبونالاردان اوجالتماق‌دادیر.
جناب پرئزیدئنت، بیز گونئی آذربایجان تشکیلاتلارینین بیری اولاراق، الیمیزدن گلدیگی قدر، آذربایجانچی‌لیق ایدئیالارینا صادق قالاراق، دیلیمیزی، عنعنه‌لریمیزی مدنیتیمیزی و کیملییمیزی قورویوب ساخلاماغا جان آتیریق. بوتون ظلملره، تضییقلره، آیری-سئچکی‌لیکلره، زیندانلارا، سورگونلره، دیدرگین‌لیکلره رغماً «جان آذربایجان» دئیه موجادیله وئرمکده ییک.
محترم جناب پرئزیدئنت!
سیزین مودریک سیاستینیز نتیجه‌سین‌ده اؤز کیملیگینی درک ائدیب و اوره یی آذربایجان دؤولتی سئوداسی ایله دؤیونن گونئی آذربایجان‌دا یاشایان آذربایجان‌لیلارین آذربایجان رئسپوبلیکاسی اراضی‌سین‌ده اولارکن عادی اجنبیلردن فرقلنمه‌سی و دؤولتلرینین حقیقتاً اونلارا صاحب چیخدیغینی حیس ائتمه‌لری گله‌جک‌ده آذربایجانین اؤز تاریخی تورپاقلارینا قاییتماسی، بوتؤو آذربایجان احتیشامینا نائل اولماق کیمی بؤیوک اوغورلارا یولا آچا بیلر. طالعیین حکمو ایله بو گون آذربایجان رئسپوبلیکاسیندان کناردا یاشایان هر بیر آذربایجانلینین اوره یینین آرزوسو موستقیل دؤولتلرین‌ده عادی اجنبی کیمی یوخ، داها یوکسک ایستاتوسا مالیک اولمالاری‌دیر. بو ایستاتوس دونیا آذربایجان‌لیلاری آراسین‌دا هئچ وجهله سارسیلا بیلمه‌ین همرأی‌لیک و بیرلیگین میدانا گلمه‌سینه سبب اولاجاق.
عینی زامان‌دا بو گون آذربایجان رئسپوبلیکاسیندان کناردا اولسا دا، تاریخی تورپاقلاریمیزدا یاشایان ۴۰ میلیون حدودون‌دا آذربایجانلینین اؤز موستقیل دؤولتلرینه باغلی‌لیقلارینین عملی آددیملارلا آرتیریلماسی ایستیقامتین‌ده آذربایجان رئسپوبلیکاسی ایله گونئی آذربایجان شهرلری آراسین‌دا گلیش-گئدیشین آسانلاشدیریلماسی، پارچالانمیش آذربایجان میللتی آراسین‌دا اینتئقراسییانین گوجله‌نمه‌سینه تکان وئره‌جک. بو ایسه سون نتیجه‌ده موستقیل و گوج‌لو آذربایجان دؤولتینین گوجو و نفوذونون داها دا آرتماسینا گتیریب چیخاراجاق. اینانیریق کی، بو مهم مسئله‌لر ده بؤیوک اوغورلارا ایمضا آتمیش محترم پرئزیدئنتیمیزین دقتی سایهسینده حل اولونا بیلر.
حؤرمتلی جناب پرئزیدئنت!
بیز صمیمی قلب‌دن اینانیریق کی، سیز تکجه آذربایجان رئسپوبلیکاسین‌دا یاشایان خالقین یوخ، بوتون دونیادا یاشایان ۵۰ میلیون آذربایجانلینین پرئزیدئنتیسینیز و بیز بیر آذربایجان تشکیلاتی اولاراق، هر زامان سیزین سیاستلرینیزی جانی-دیل‌دن دستکله ییریک. بیز اینانیریق کی، سیزین مودریک سیاستینیز سایهسینده گونئی آذربایجان‌لیلار دا اؤز ایستاتوسونو تاپاجاق‌دیر و بیز ده عهده‌میزه دوشن هر بیر وظیفه‌نی لایینقینجه یئرینه یئتیرمه‌یه حاضیریق.
جناب پرئزیدئنت، اؤز نؤوبه‌میزده ذاتی-عالیلرینیزه سونسوز تشکور و میننتدارلیغیمیزی بیل‌دیرمک‌ده شرف دویوروق».
حؤرمتله
میکاییل اویتا
گادتب بئین الخالق علاقه‌لر دئپارتمئنتینین صدری
و
آوسترالییا آذربایجان آسوسیاسییاسی پرئزیدئنتی
