ادتاج اتحادیه دمکراتیک ترک آذربایجان جنوبی
گادتب-نین مطبوعات مرکزینه داخیل اولان معلوماتا گؤره، آوسترالییا آذربایجان آسوسیاسییاسینین پرئزیدئنتی، گونئی آذربایجان دئموکراتیک تورک بیرلیینین (گادتب) بئین الخالق علاقه‌لر دئپارتامئنتینین صدری سایین میکاییل بی اویتا آذربایجانین قاراباغ بؤلگه‌سین‌ده وضعیت و آوسترالییادا موخالیفتینین لیدئری و کؤلگه خاریجی ایشلر ناظری کیمی تانینان سئناتور سیمون بیرمینگهامین لاچین یولون‌دا آذربایجان حکومتینین نظارتی ایله باغلی سون مکتوبون‌دا یئر آلان یانلیش معلوماتلارلا باغلی آوسترالییانین خاریجی ایشلر ناظری پئننی وونگا مکتوبلا مراجعت ائدیب.
سایین میکاییل بی مکتوبون‌دا یازیب:
حؤرمت‌لی ناظر،
آوسترالییا آذربایجان‌لی ایجماسی اولاراق، صلحون قورونماسی و بوتون خالقلارا عدالت‌لی رفتارین طرفداری کیمی گؤستردیگینیز فداکارلیغی و داوام‌لی سعیلرینیزی اعتراف ائد‌رک، بؤیوک تواضعکارلیق و حؤرمتله سیزه مکتوب یازیریق.
بوگونکو مکتوبوموز سیمون بیرمینگئم طرفین‌دن ۲۸ ایون ۲۰۲۳-جو ایل تاریخ‌لی سون یازیشمالارا عاییددیر و بورادا قاراباغ‌داکی مؤوجود وضعیت، خصوصاً ده آذربایجان حکومتی طرفین‌دن لاچین یولونون تنظیمله‌نمه‌سی ایله باغلی‌دیر.
بیز آوسترالییانین قلوبال مسئله‌لره گؤستردیگی فعال ماراغی، صلحه و ثابت‌لیگی قوروماق ایسته یینی یوکسک قیمتله‌ن‌دیریریک. بونونلا بئله، بیز حساب ائدیریک کی، مسئله‌یه داها احاطه‌لی بیر باخیشا احتیاجی وار. سیزدن تواضعکارلیقلا خواهیش ائدیریک کی، آذربایجان حکومتینین حرکتلرینین هانسی فون‌دا باش وئردیگینی نظردن کئچیره سینیز. لاچین یولونون تنظیمله‌نمه‌سی دوشمن‌چی‌لیک آکتی دئییل، داها چوخ بئین الخالق حقوقا و آذربایجانین اؤز اراضیلری اوزرین‌ده سووئرئنلیینی قوروماق عهدلیینه اساس‌لانان حاق‌لی آددیم‌دیر.
قاراباغ بؤلگه‌سی اون ایل‌لیکلر عرضین‌ده رئگیون‌دا ثابت‌لیگی پوزان و وطنداشلارین حیاتی اوچون جدی تهلوکه یارادان قانون‌سوز فعالیتلرین قوربانی اولوب. بو بؤلگه تئررور فعالیتلری، غیری-قانونی سلاح یاییلماسی و طبیعی ثروتلرین غیری-قانونی تیجارتی اوچون زمین اولموش‌دور. بو حادثه‌لر فونون‌دا لاچین-خانکندی یولو بویونجا حیاتا کئچیریله‌ن تهلوکه‌سیزلیک تدبیری سئچیم‌دن داها چوخ ضرورت‌دیر.
لاچین-خانکندی یولونون «بلوکاداسی» و اونون هومانیتار فسادلاری ایله باغلی ائرمنی ائیهاملارینا گلینجه، قئید ائتمک لازیم‌دیر کی، آوروپا اینسان حاقلاری محکمه‌سی و بئین الخالق عدالت محکمه‌سی اینسان حقوقلارینین تأمیناتلارینا موناسیبت‌ده یولون ایستیثماری ایله علاقداردیر. هر ایکی محکمه آذربایجانین اوچطرف‌لی بیاناتین ۶-جی مادده‌سینه اساساً «لاچین دهلیزی ایله هر ایکی ایستیقامت‌ده حرکت ائد‌ن شخصلرین، نقلیات واسطه‌لرینین و یوکلرین تهلوکسیزلیینه تأمینات وئرمک» عهدلیینی خاطیرلادیب.
سرحد تهلوکسیزلیینین گوجلندیریلمه‌سی ده داخیل اولماقلا غیری-قانونی ترانس سرحد فعالیتلرین قارشی‌سینین آلینماسی و اونلارا قارشی موباریزه تدبیرلری قوه‌ده اولان بئین الخالق اینسان حقوقلاری حقوقونا اویغون اولمالی‌دیر.
بونونلا بئله، سرحدلری مانعه‌سیز کئچمک حقوقو یوخ‌دور و اینسانین سربست حرکت حقوقو بونو طلب ائتمیر و طلب ائده بیلمز. نتیجه اعتباری ایله، سرحد نظارتی رئژیملرینین مؤوجودلوغو اینسان حقوقلارینا ضد دئییل.
هر بیر دؤولت اؤز سرحدلرینی قوروماق حقوقونا مالیک‌دیر، بو پرینسیپ بمت نیظامنامه‌سی و دیگر بئین الخالق موقاویله‌لر ایله تصدیق‌لنیر. اونا گؤره ده آذربایجانین اؤز سووئرئن اراضی‌سی داخیلین‌ده سرحد نظارتی یاراتماق قراری قانونی و عدالت‌لی‌دیر. اومید ائدیریک کی، بو نؤقتئیی-نظر بو وضعیتله باغلی قلوبال موذاکیره‌لرده تانیناجاق.
اوسته‌لیک، بو یول‌دا کئچید منطقه‌سینین یارادیلماسی آذربایجانین بئین الخالق تهلوکه‌سیزلیک عهده‌لیکلرینه اویغون‌دور. بو تدبیر لاچین-خانکندی یولو ایله حرکت ائد‌ن شخصلرین و یوکلرین تهلوکسیزلیینین قورونماسینا خیدمت ائدیر کی، بو دا ۹/۱۰ نویابر ۲۰۲۰-جی ایل تاریخ‌لی اوچطرف‌لی بیانات‌دا وورغولانیر.
سیزی امین ائدیریک کی، کئچید منطقه‌سی اینسانلارین و یا ماللارین سربست حرکتینه مانع اولماق مقصدی داشیمیر. اونون مقصدی یالنیز مولکی شخصلرین، خصوصاً ده تجی‌لی هومانیتار یاردیما احتیاجی اولانلارین تهلوکه‌سیز و قورونان کئچیدینی تعمین ائتمک‌دیر. آذربایجان حکومتی اؤز میللی تهلوکه‌سیزلیک اؤهده‌لیکلرینی اؤز خالقینین اینسان حقوقلاری ایله بالانسلاشدیرماغا و رئگیون‌دا صلحون قورونماسینا صمیمیتله صادق‌دیر.
بیز بئین الخالق ایجتیمایتین بو تدبیرلرین صلح دانیشیقلارینا پوتئنسیال تأثیری ایله باغلی ناراحات‌لیغینی باشا دوشوروک و حؤرمت ائدیریک. بونونلا بئله، بیز اینانیریق کی، رئگیون‌دا تهلوکسیزلیین و آساییشین قورونماسی داوام‌لی و اوزونموددت‌لی صلحون تامین ائدیلمه‌سی اوچون واجیب‌دیر.
بیز آوسترالییا حکومتینی اؤز مؤوقعیینی فورمالاشدیرارکه‌ن وضعیته بو پریزمادان باخماغا چاغیریریق. آوسترالییا صلحون و عدالتین چیراغی اولماقلا، حکایه‌نین فورمالاشدیریلماسین‌دا و علاقه‌لی مورککب‌لیکلرین باشا دوشولمه‌سین‌ده موهوم رول اوینایا بیلر.
بیز ناراحات‌چی‌لیقلاریمیزا دقتینیزی درین‌دن قیمتله‌ن‌دیریریک و آوسترالییا حکومتیمیزین قلوبال میقیاس‌دا صلحه و ثابیتلیگین مدافعه‌سین‌ده داوام‌لی ایشتیراکینی صبیرسیزلیکله گؤزله ییریک.
سایین میکاییل بیین مکتوبونون اینگیلیسجه تام متنینی تقدیم ائدیریک:
