ادتاج اتحادیه دمکراتیک ترک آذربایجان جنوبی
گادتب: بیلدیییمیز کیمی مونیخ گوونلیک(امنیت) توپلانتیسی هر ایل دؤولت نماینده لری و باشقا قوروم لارین اؤزللیکله چئوره چی و اکونومی نماینده لری ایله کئچیریلیر. بو توپلانتی نین اساس آماجی دونیادا گوونلییی ساغلاماقدان عبارت دیر.
بو ایل ایلک دؤنه اولاراق ایران دؤولتی نین نماینده سینین یئرینه باتی(غرب) دستکله ین دیرناق آراسی مخالف لر اورایا چاغریلمیش لار.
دئییلن مخالفت توپلوسوندا تاپ مدل، آکتیور(بازیگر) و باشقا سلبریتی لری گؤرمک اولور. آنجاق سؤزسوز رضا پهلوی نین اوردا اولماسی تام فرقلی بیر مساله نی اورتایا قویور و اودا اونون کئچمیش ایران حاکیمییتینین وارث اولماسیندان ایره لی گلیر.
بیراز اؤنجه وکالت پروژه سی و ساییرا گیریشیم لردن سونوج آلمایان پهلوی لر و باشقا داییره لر هله ده سیاست اویونوندا اؤنملی فاکتور کیمی گؤرونمه یه چابا گؤستریرلر.
باتی دونیاسی چئشیدلی ندن لر اوزوندن هله ده ایران جغرافیاسیندا دموکراتیا و میللت لرین حقوقونو تمثیل ائدن سیاسی فورماسیون -ون یارانیب قورولماسینا راضی دئییل لر.
ایران جغرافیاسی نین گرچک قووه لرینی اؤرنه یین میللت لر( اتنیک لر)، قادین لار، سول آخیملاری، چئوره و مذهبی کسیم و گروپ لار و دموکرات قووه لر هله ده گؤز آردی ائدیلیرلر.
بعضی لری دئیه بیلر هله لیک دیشاریدا(خارجده) آذربایجان میللی حرکتینین سانباللی بیر تمثیلچی سی یوخ دور و او اوزدن بو سیاسی اویونلاردا اونلاردان هئچ بیر ایز گؤرمک اولمور، آنجاق دئمک اولار باشقا میللت لر و سیاسی کسیم لرین نماینده لری یئترینجه گؤزه چارپماقدادیر. او زامان نییه باتی اونلاری دئییل او گولونج مجموعه نی دستکله ییر؟
منجه باتی دونیاسی نین یارار(فایده) و چیخاری( منفعتی) هله ده فارس استیلا و هگمونیاسینی ساغلایان(تامین) بیر سیاست دن سو ایچمک ده دیر.
اونلار اوچون بؤلگه ده دوزن(نظم) و گوونلیک مرکزچی بیر سیستمین قورونوب داوام ائتمه سیندن یارانا بیلر.
نییه کی بو بوتوؤ فارس (ایران) سیستمی دییشیرسه بؤلگه دنگه سی بیله دییشه بیلیر و بودا ان آزی تورک لرین داهادا گوجلنمه سینه ندن اولا بیلیر.
بئله اولان حالدا هم تاریخی اولاراق همده سون زامان لار تورک لرین داهادا گوجله نیب بؤلگه ده آکتیولشمه سینه راضی اولمایان باتی دونیاسی، تورک قاتقیسینی آزالدیب و اونلاری گوجسوزلشدیرمه یی هدف آلمیش دیر و او پازل- ین اؤنملی پارچاسی ایران بوتؤولویو و مرکزچی بیر سیستمی قوروماقدادیر.
