سیامک میرزایی: یانیق تورپاق

گادتب: آشاغیدان اۆستۆمۆزه قیسیر گرمیج اسیردی. یانقین یوردون ساری قوراقلیغی یاغیز توْرپاغی سارمیشدی‌. گؤيلردن ياغيش يئرينه سارى تيکان یاغیردی. توْزاناقلار ایلخی لاری ایسه یئرله گؤيۆن آراسيندا دليجه سينه دوْلانيردى. يئرين دوْداغى قوروموشدو و سوسوز باغرينا چات_ چات داغ باسیلمیشدی.

آجی گؤزلرين تالواساسيندا بير اودوم سويون سرينلييى چوْخورلانیردی. گرمیجین اوْد قامچیسی شیریق_شیریق یوْل سالیردی اؤلۆشگه ین دنیزلره.

آلین یازیلار ایستی لیین اؤگئی سسینده کی هنیرتییه تاپشیریلمیشدیرلار.

چوْراق یوردون آزغین الی سوْموروردو ایلیکلرین اؤزه يينده يووا سالان اومود داملالارينى.

فصيللر قارغانميشدى، ساعاتلارى قوم باسميشدى. گئجه گۆندۆز توْز ایچینده بوْغولموشدو.

ایستی قومون سرت آخینی کۆسکۆن قاپی باجالارین اۆز گؤزۆنۆ دوْلدوروردو.

يئردن گؤيه نيسگیل یاغیشی یاغیردی. هردن بیردن آلا_تالا ماهنیلارین آرغیلاری گرمیج چالاریندا آزالیب چوْخالیردی. دورولمایان قوْشوقلارین ایشیلتیسی پارلاییردی. آرا سیرا آلوْولانان اۆرکله ره سو بارداغین جالاییردی.

سانکی بیری تانیش ناغیل سسله رینی یاریم چیلپاق اوْخویوردو. هانسی سا، زامانین کئفلی لیگینی مۆرگۆله دیردی و سوسوز ایلغیمین گرچک گؤزۆنده دوْغرولوردو سويا دۆشن پلتک گۆلۆشلر.

سن ترسه آخان آخیملارین آجیماسیز نفسینده یوْغرولان دوْغما بیر ماهنی سان.سن سئوینجه بۆرۆنمۆش گؤزله ييشين شن سوْراغيندان دوْغولورسان ايپک تئللی دوْغمالیغیم، گورشاد یولون گور هارایی، آغ یاغیشی آخیداجاق کؤز_ كؤز اوْلان وارلیغینا چای سسینه قوْشولونجا. گل ساریلیم آرغین_یوْرغون قوْللارینا، گل دوْلانیم دیلک دوْلو شن بوْیونا.

✍️سيامک ميرزائى

اوین زیندانی ١٣٩٩/١١/٢٤