ادتاج اتحادیه دمکراتیک ترک آذربایجان جنوبی
گادتب: بو گون‌لر چوخ آجی اولای‌لار یاشاماق‌داییق. خوی زلزله‌سی‌نین سارسینتی‌لاری و آجی ماجرالاری دوام ائدر کن، تورکیه و سوریه‌ده باش وئرن دهشت‌لی و قورتونج زلزله هامیمیزی چوخ دریندن کدرلندیردی.
بو گون‌لر، اولای‌لار و آجی‌لیق‌دان گورمه‌سی بئله چوخ چتین اولان صحنه‌لر بیزیم تاریخیمیزین چوخ اونملی بیر بولومو اولاراق، اولدوقجا بوتون امکان‌لارلا سندلشدیریلمه‌دیرلر. خوی‌دا باش وئریب چوخ دا آغیر اولمایان زلزله‌ده، جان ضرری آز اولسادا مال ضرری چوخ‌دور. ائولرین چوخو اوزللیکله کندلر و شهرین کنار محله ائولری اوتورما و یاشاما امکان‌لارینی ایتیریب‌لر و ضرر گورن‌لره جدی یاردیم ائدن بیر دولت اولماسادا، اونلارین دردینه قالان بیر ملتین اورتادا اولدوغو اونملی بیر گرچک‌دیر.
بئله بیر اولای‌لار هر نه قدر بیزه جان و مال ضرری وئرسه‌لرده، بیزی بیز ائتمک و بیزیم ملت‌لشمه‌میز اوزره بویوک بیر آددیم ساییلیرلار. بو ساحه‌ده ایلک تجربه‌نی قره داغ زلزله‌سینده یاشادیق آما بو گون‌لر اونونلا باش باشا قالدیغیمیز خوی زلزله‌سی، بیزی بیر داها آیاقلاندیردی.
خوی‌دا یاشانان سورونو اینجه‌له‌ییر کن کیمین نئجه داوراندیغی، کیمی‌لرین یاردیم الی اوزاتدیغی و کیمی‌لرین دویارسیز قالاراق باشاردیقجا بو غریبان‌لاری یالنیز بوراخمایا قالخیشدیغی، چوخ بویوک و عبرت دولو بیر درس‌دیر. بیز تورک و آذربایجان‌لی‌لار هئچ زمان هئچ بیر ملت‌له بئله داورانمادیق، داورانماریق. ایرانین هانسی بولگه‌سینده هر هانسی ملت بئله بیر بلایا دوچار اولسا ال‌دن گلن قدر یاردیما چالیشاراق، الیمیزدن بیر یاردیم گلمه‌سه ده ان آزی محبت و شفقتیمیزی اسیرگه‌مه‌میشیک، اسیرگه‌مه‌ریک آما قارشیلیق نه آلدیق؟
خوی مقدورلارینا تورک‌لر و آذربایجانلی‌دان باشقا جدی یاردیما گلن اولمادی. ایران دولتی تورکیه و آذربایجانین یاردیم اونری‌لرینی رد ائتدی و ایران- فارس آیدین‌لاری و مدیاسی جدی‌یه آلمادی بو سورونو. خوی زلزله‌سی‌نین آردیندان تورکیه‌‌ده باش وئرن چوخ داها بویوک و وهیم زلزله سارسیلمیش روح‌لاریمیزی بیرداها دریندن سارسیب جان‌لاریمیزی یاخدی. دونیانین باشاباشیندان تسلی مئساژلاری و یاردیم‌لار گلمه‌یه باشلادی. هر کس‌دن اونجه و هرکس‌دن داها چوخ آذربایجان جمهوریتی و تورک دولت- ملت‌لر سفر بر اولدولار.
مسلمان ملت‌لر و دولت‌لر، هر زمان اومید ائولری اولان تورکیه‌‌یه اوزولمه یانینداییق مئساژی وئردی‌لر، یاردیما باشلادی‌لار. پاکستان جان قارداشی‌نین یانیندا دوردو قارداشجاسینا. اوزو فلاکت ایچینده اولان افغانستان‌‌دا یاردیما گلمه‌یه کابل شهری‌نین هاوا لیمانینا توپلانان‌لار اولدو. یوزلر بلکه مین‌لرجه تای‌سیز شفقت سیمگه‌سی اولان خبرلر و عکس‌لر یایینلاندی دونیا مئدیاسیندا. تورکیه‌ایله هر زمان گرگین‌لیک و سورون یاشایان یونان بئله بوتون سورون‌لارا رغماً خصومتی بیر کنارا بوراخیب تورکیه‌ایله تام انسانی بیر شفقت‌له داورانمایا باشلایاراق محبت و یاردیم الی اوزاتدی. عین حال‌دا تورکیه بویوک دولت- ملتی ایچی بوش و یالان غرورا توتونماییب بوتون یاردیم‌لاری دَیَرلَندیریب قبول ائتدی و سوریه‌لی‌لرین ده پناهی اولدو. چون بو بویوک دولت- ملت هر زمان شفقت سیمگه‌سی اولموشدور اوزللیکله تورک و مسلمان ملت‌لره.
آما بوتون بونلار یاشانیر کن، ایران- فارس شعوبی‌چی‌لیگی انسانی اخلاق‌دان تماماً آرینیب دونیانین ان چیرکین فاشیسمینه مبتلا اولدوغونو بیر داها گوز اونونه سرگی‌له‌دی. بونلارین ان دموکرات و ان مدنیت‌لی‌سی بئله، تورکیه‌‌ده باش وئرن بو فلاکت‌دن آز دا اولسا سئویندیگینی گیزله‌ده‌بیلمه‌ییب “بو بلا اردوغانین تنبیهی‌دیر” کیمی رذالت دولو ساچما پروپاگاندالار یایماغا باشلادی‌لار.
بو اولای‌لار بیر طرف‌دن اورتا دوغونون ان بویوک بلاسی‌نین ایران- فارس فاشیسمی اولدوغو و بیزیم‌له بونلارین چوخ داها بویوک سورون‌لار یاشایاجاغیمیزی اثبات ائتدی. دیگر طرف‌دن ده بوتون ضررلری‌ایله بیرلیک‌ده بیزی بیزلشدیرمه‌یه دوغرو بویوک بیر آددیم اولدو. بونلاری گوروب، دویوب درس آلمایان‌لار نه زمان اوزلرینه گله‌جک‌لر گوره‌سن؟
