ادتاج اتحادیه دمکراتیک ترک آذربایجان جنوبی
گادتب: اوتوز اوچ گئجه ایدی کی توتوقلانمیشدیم.
اوتاقدا اوچ نفریدیک
من، آصلان آبی و داوود قاقاش(داوود بی شیری)
گئجه شامدان سونرا قاپی آچیلدی،
بیر آغ ساققاللی کیشی نی گتیردیلر.
دوردوق آیاغینا.
اؤپوش گؤروشدن سونرا
خوش گلدین دئدیک.
داوود قاقاش سوروشدو:
هن حاجی سنی نیه گتیریبلر بورا؟
حاجی گوله-گوله دئدی:
والله قارداش بیلمیرم کی، دوزون آختارساز من اهرلیم،
بوتون قاراداغ میللتی باشیما آند ایچر، اهردن نماینده یازیلیردیم، هریسلی لر ایستمیردیلر من نماینده چیخام.
بیلیرم کی حتما دوشمنلریم منی توتدوروبلار!!!
من دئدیم: حاجی من ده اهرلیم، آمما سنی تانیمیرام والله.
حاجی تئز سوروشدو: اده کیملردنسن؟؟؟
دئدیم: کاسانالی یام، آتام نیظامی دی
حاجی تئز دئدی: هن کاسانانی قشه تانیرام، آغاوا دئسن حاجی صولت حتما تانییار منی،
افسوووووس سیزین کند دن من چوخ رأی قازانا بیلردیم!!!
حئیییییف…
من گوله-گوله دئدیم:
حاجی سن بیر سؤزلر دئییرسن، ولی بیزیم کند ده چوخ رأی وئرمزلر، نه سنه ها، هئچ کیمه.
بیزیم کنده ماللا یوخدور، حاجی یوخدور، خوشلاری گلمز سیزلردن، کاسانا فرقیلی بیر ییردیر.
حاجی گولومسه دی و دئدی:
بابا کیم دئییر وئرمزلر!!! رأی گونو هامی گلیر صاندیق باشینا.
اده بو‌سؤزلری هله بوشلایین.
دئیین گؤروم سیزی نیه توتوبلار؟
داوود قاقاش دئدی:
بیز میللتچیییک.
حاجی تعجوبونان سوروشدو:
میللتچی؟؟؟
قاقاش دئدی: بله میللتچی، آزربایجان چی. مگر ائشیتمه ییبسن؟
حاجی یاواش دئدی: یوخ قارداش من بو سؤزلری بیلمرم.
دوروم تئز نامازیمی قیلیم، گلیم گؤروم نه دئییرسیز!!
آصلان آبی قورخا-قورخا دئدی:
بو حاجی ایمامدی والاهی
حاجی نامازی اوجادان قیلدی،
گلدی گئنه اوتوردوق دانیشدیق.
قاقاش دئدی حاجی دوغرودان نیه سنی توتوبلار؟
حاجی دئدی: بوجور اولماز کی قوی دوروم آیاغا سیزه هر نیی دئییم با…
حاجی دوواردا سیرامیکین اوستونده پرونده نی بئله قشه توضیح وئریردی سانکی تخته باشیندا ریاضی درسی وئریر.
من فیلان کسه بیر بئله یئر وئردیم،چک آلدیم و…
من اینقیلابی یم، جانبازام، سیپاهین فرماندهی اولموشام، مدیرعامل بانکام و…
اصلا منه یاراشماز بو‌ایشلر!!!
حاجی دانیشا-دانیشا منده قاقاشا باخیب هردن گیزلین گولوردوم…
حاجینین سؤزلریندن سونرا آصلان آبی تئز منی چکدی قیراغا قورخا-قورخا دئدی:
افندیم بو حاجی ایمامدی یاااا
شاهین قوزوم سن هئچ نه کونوشما بوندان. لوطفا، ریجا ائدیرم.
آدام سیپاهین باش کاماندورودور…
بیر آز سونرا یئمک قاپیسی آچیلدی،نیگهبان سسله ییردی:
تئز آلین بونلاری، چیلله گئجه سی دی ها، یئیین الله ها شوکر ائیله یین!!!
آصلان آبی او آندا بیزدن چیلله گئجه نین فلسفه سین سوروشوردو.
بیر بوشقابدا نار، نارنگی، پرتقال و بیر آز پشمک واریدی.
من شولوق اوشاقلار کیمین سئوینجیمدن فقط گولوب و میوه لری دانیشدیریردیم.
شانسدان حاجی دا پایین وئردی منه، اینانین کی دونیا او آن مینم اولدو!!!
قاقاشا دئدیم : میوه لری یئیه بیلمه سن اگر من خیتمتینده وارام!!!
قاقاش دا شوخلوخجا دئدی:
یئری گئت جهنم‌‌اول هاااا
آخی قاقاش دا دیشلرین چکدیرمیشدی و چوخ واخت یئمک لرین وئرردی منه!
او گئجه سحره کیمین من، آصلان ابی، قاقاش و حاجی دانیشدیق و بیزیم اوچون چوخ خوش بیر گئجه اولدو.
حاجی سونرالار نامازدان سونرا آشیق هاواسی اوخویاردی منده اوینویاردیم و هردن ده یالاندان بالابانچی اولاردیم…
او اوتاقدا ساعاتلار و دئدیک-گولدوک، تارتیشدیق، ساواشدیق، کوسدوک-باریشدیق…
و ایندی او گئجه دن دوز ایکی ایل سوووشور…
و بیزلر هر بیریمیز اؤز ائویمیزده ییک.
آنجاق بو گئجه ایطیلاعات دا اولان نیگهبانلار باشقا آدام لارا چیلله لیک حاضیرلاییرلار…
شاهین برزگر
مین دؤردیوز اینجی ایلین چیلله گئج سی
