ادتاج اتحادیه دمکراتیک ترک آذربایجان جنوبی
گادتب: بیر نئچه گوندور آتابای فیلیمی پارساآبادا گلیب. هر زامان سینمانین اؤنوندن کئچنده، دوننه قدر خیاوان‌لاردا راسلاشدیغیم اینسان‌لاری گؤرورم: سحرین سرینیندن آخشامین سازاغینا قدر آیاق اوستو قالان آل‌وئرچی‌لر، زحمتله یئرییرکن نوه‌لری اونلارین قولتوغونا گیرن یاشلی اینسان‌لاری، دلی‌قانلی جاوان‌لار ، باخیش‌لاری سوال و سئوینج دولو اوشاق‌لار. بو فیلم نه‌دن بو قدر جوشقویلا قارشیلانیر؟! ایل‌لردیر ماغارا کیمی اونودولان سینما سالنی نه‌دن دولوب بوشالیر؟!
مملکتین قاریشیق دوروموندا چؤرک دردی چکن خالقین اینجه‌صنعته اولان ماراغی حیران ائدیجی‌دیر. منجه اینسان‌لاری بورا گتیرن عامیل، تکجه صنعتی، هنری اؤنمسه‌مک دئییل. بو میللت ایل‌لر سونرا ایتمیش یا ایتیریلمیش کیملییی‌نین بیر پارچاسینی آتابای فیلمینده گورور. آتابای بو خالقین اؤزودور ، او اؤزدن منیمسه‌له‌نیر، سئویلیر.
بو هیجانین ایچه‌ریسینده نیکی کریمی‌نی سورغولایان قزئتچی یادیما دوشور. او، فیلمی آلت‌یازی ایله [زیرنویس‌له] ایزله‌مکدن غضبلی‌دیر. بلکه‌ده حاقلی‌دیر، چونکو بیزلر ده آلت‌یازیلی فیلم‌لره باخماقدان خوشلانمازدیق.
نیکی کریمی بؤیوک بیر اینقیلابی ایش گؤردو. بلکه بیزیم مدنیتیمیزه اولان باخیش‌لارین توزو سیلینسین، سینما اوتوراجاق‌لاری‌نین توزو سیلیندی کیمی.
