ادتاج اتحادیه دمکراتیک ترک آذربایجان جنوبی
گادتب: نئچه هفته بوندان اونجه رئیس جمهور جناب آقای رئیسی تبریزه گلنده، ایکی مهم خبر دولتی آژانسلار طرفیندن یاییلماغا باشلادی.
بیرینجی، شرکت مس سونگون تشکیل وئریلدی. ایکینجی، کاتد مس تولید کارخانهسی قورولوب، هیپ لیچینگ(اسید پاشی در آب) روش ایله ورزقاندا ایشه باشلادی.
بو ایکی خبر او دئمک اولمالیدی کی، اولا مس سونگون، مس کرمان دان آییرلیب و اوز املاکینین و درآمدینین مالیکی اولمالیدی، ثانیا سونگونون کنسانتره سی کرمانا داشینمامالیدی و ورزقاندا کاتد مس تولید اولمالیدی. البته کی بئله بیر خوش خبردن هانسی آزربایجان سئور سئوینمز کی؟ اما گویا نظره گلیر، بو ایکی خبر هرهسی بیر سایاق ایچی بوش ایمیشلار. شرکت مس سونگون یارانماغی عئیرتی ایمیش و تابلوسی اوزوندن چوخ گوز قاماشدیریرمیش. آقای بیگی تبریزین نمایندهسی انجمن مجله سینده یاییلان مصاحبهسینده دییب کی مس سونگونون دارائیسی هله حساب کتاب اولماییب و فقط اداری مدیریتلری مستقل اولوب. یعنی دارائی و املاک سویهده هله مس کرماندان مستقل اولماییب. ایکینجی خبره گوره ده ورزقانین نمایندهسی آقای دهقانپور یازاکو آژانس ایله مصاحبه سینده دییب: مسئولین مس سونگون تولید کاتد آدلی آچیلش مراسیمینده بازاردان حاضیری کاتد مس آلیب گتیریبلر و «هیپ چلینگ» آچیلیشیندا حاضری کاتدلاری اسید وانیندا سلوللارا باسیب چیخارتیرمیشلار. اوندان فیلم گوتوروب یاییب و جماعتی آلدادیبلار کی کاتد مس تولیدنین کارخانهسی قورموشوق.
– بئله بیر فیریلداقچیلغی آزربایجانین مسئول مقاملاری نجور قبول ائلییه بیلیرلر؟
– واقعا مس سونگونون مسئوللاری کیمدیلر و کیملری توولاییرلار؟
– آیا بیر مسئول یوخدو کی بو فیریلداقچیلیقلارا قارشی دوروب سون وئرسین؟
– آزربایجانین حقی هازامانا جان مس کرمانین بویون یوغونلارینین توسط ایله آیاقلار آلتیندا ازیله جک؟
– مخصوصا امنیتی مسئوللار نه یاخجی بو علنی فیریلداقلارا بیر چاره قیلمیرلار؟
– اینانین بو سایاق داورانیشلار بوتون آزربایجان خالقین عاصی لشدیریب، و سیزین علیهینه نیزه طغیان سویه سینه قالدیرا بیلر.
– ثروتلری تالاماق ستمکارلیقدی، اما میللته بو سایاق فیریلداق ساتماق شیطانی ایشلرین ان چیرکینلریندندی.
البته بوردا لازیمدی بیر تعداد مسئول لاردان کی مس سونگونون واقعی شکیلده، مس کرمان دان آیریلیب، مستقل اولماغینا چالیشیرلار قدردانلیق اولسون.
«حسن ارک»
