ادتاج اتحادیه دمکراتیک ترک آذربایجان جنوبی
گادتب: نئچه ایل اؤنجه، تبریزده گؤزل بیر درگی چیخاردی، آذربایجان ادبیات، دیل، فرهنگ و سیاست قونولاریندا. دهیرلی و اثرلی بیر موقعیته صاحاب اولموشدو.
بیزی سئویندیریب، چوخلارین آجیشدیران بیر درگیایدی؛ ان چوخ دا سانسور ادارهسینین معذور مأمورلارینی.
بیرگون او معذورلارین بیری، منی جلسهیه چاغیریب بیر ایش پیشنهادی وئردی؛ همن مجلهنین سردبیرلیغی!
عجیبی دی! منیم گوجومنن چوخ یوخاری بیر ایشیدی همیده او آغا بیرآز چوخ معذورودو و من دئدیم به مجلهنی حمایت ائتمک قصدی وار!
محلهنین لوطوسونا یوخ دیهن آدام نئجه ساختا سایغی دویار، منده عینا، احترامینان دئدیم حاج آآ چوخ ساغولون بو پیشنهادیزدان، آنجاق منیم الیمنن گلن ایش دئیل، تورک ادبیاتیندا ساوادیم یوخ همیده فوقلیسانس اوخوماق قصدیم وار، بو ایش یئرده قالار.
گولموسهییب دئدی هئچ ده چتیند دئیل، تورکجه یازان معرفی ائلهرم سنه، بیرده کی بو مجله بیر نئچه شماره آنجاق چیخاجاق، قراردی تعطیل اولا. خرجینده دیهرم فلانی، شهرداریدن آگهی وئرر، دوغرولار!
ایش داها زور اولدو! دئدیم اجازه وئرین فیکیرلشیب عرض ائلییم. نئچه گون سورا تلفوندا بهانه گتیریب، عوذر ایستهدیم!
آنجاق، ژورنالیستلرین بیری اومجلهنین یئنی سردبیری اولدو، تیم قوروب، ایکی اوچ سایی، بیری بیریندن ضعیف، منتشر ائلهدی. ائلهکی او گؤزل درگی گؤزدن دوشدو.
داها بیلمهدیم نه زامان مجله تعطیل اولدو… معذور مأمورلارین هامیسی دا گیژ دئیل، بعضا ایشی بئله سلقهلی یاپارلار. اؤزلری دالدا، محترم پروکسیلار ویترینده. نه ایسه؛ تراختورون بوگونکو احوالاتی او آجی خاطرهنی یادیما سالدی…
