گادتب: بیر دیلی اینجهلهییب قوراللارینی اورتایا قویارکن منطیقسال ایشلئولرین ده گؤز آردی ائدیلمهمهسی گرهکیر. بللک، گؤرولن، ائشیدیلن، حیسس ائدیلن و اؤیرهنیلنلرین دئپولاندیغی زئهینسل بیر یئتهنکدیر. اینسان سؤزلری ائشیدیر و ائشیدیلن سسلری نسنهلره ائیلملره و قاوراملارا باغلاییر یا دا بو قاوراملار ائشیدیلن سؤزلره باغلانیر.
آنلاتماق ايستهديیيم شئی: اينسان اولماقدير. اينسانين بير اؤزهلليیی وارسا، بو ايلهتيشيمدير. ايلهتيشيمين آنا عونصورو ديل ده، اينسانين سوپر يئتهنهییدير. يئر اوزونده بير موعجيزه گؤرمک ايستهييرسهنيز اينسانين ديلينی اينجهلهمهنيز یئتر. بوتون موعجيزهلر اونون ايچينده آنجاق کیچیک بير جوملهدير.
بير نازی سئمپاتيزانی هايدگئر بئله: «ديل، وارليغين ائویدير» دئيير. ديلله وار اولور هر شئی. اينسان ديلیيله وارليق گؤسترير. دونيا اونون اوچون، ديلله آنلام قازانير. اونو ايتيردییينده ايسه آنلاماییر، آنلادا بیلمهییر. اوکتاويو پاز’ين: “بيزی اينسان قيلان، ديلدير.” دئدییی کیمی. دوغانين و تاريخين آنلامسيز گورولتوسو و سسسيزليیی قارشیسيندا ديلده چاره آراريق.
اينسانين دونيايلا تانيشماسی، اونو آنلاملانديرماسی، قاورامساللاشديرماسی، اؤزونو دونيايا ايفاده ائتمهسی، يالنيزجا ديل آراجیلیغییلا اولابيلهجککن، ديلين ياساغی توم بونلارين دا اينساندان آلينماسی آنلامينا گلير. ديلين حبسی سادهجه اينسانی لال قيلمايير، توپلوملاری کار ائدير.
کاتالان يازیچیسی، “ژوزئفينا پيقوئت” بو دورومو بئله ايفاده ائدير:
«فرانکو، اوشاقلیغیمی حبس ائتميش چوخ پیس بير اؤرنکدير حافيظهمده… کاتالان آرخاداشلاريملا بير آرادا کاتالانجا اوينايا بیلمهمک، اؤز ديليمده ائیيتيم آلا بیلمهمک بير شیکنجه کيمیيدی… آناديل اینسانين وار اولوشونون تمل ديرهییدير. يانی ايلييیدير. اومور ايليکده باسقی، زدهلنمه و يا قوپوقلوق آدامین فلج اولماسينا نهدن اولار. دولايیسييلا من فلج بؤيودوم، آما آرتيق يئريییر، قاچیر، آنا ديليمده سئمينارلار وئريرم… آناديلين ياساقلانماسی وحشی دوشمانليقدير! آما ان اؤنمليسی ده یاساق ائدهن گوجون، او ديلی دانیشانلاردان قورخماسیدير. فرانکو ديليميزی ياساقلاياراق اؤزونه و بو گؤزهل اؤلکهيه ان بؤيوک پیسلییی ائتدی.»
اينسانين، ياشاميندا، اینسانليغینين گليشمهسينده و شخصیتینین یئتیشمهسینده آنا ديلینین نه درهجهده اؤنملی بير يئری اولدوغو بللیدیر. ديلی يئترلی دوزئیده اولان شخصلر گئنلليکله داها ساغليقلی ايليشکی قورورلار، حياتدا داها باشاريلی اولورلار. اؤز ديلينی یاخشی بيليب دوزگون قوللانمانين اؤنملی بير ياراری دا، يابانجی بير ديلی اؤیرهنمهيی آسانلاشديرماسیدير. گئرچکدن، ائتکيلی بير يابانجی ديل اؤیرهتيمینين آلتياپيسينی، یاخشی بير آنا ديلی اؤیرهنیمی اولوشدورور.
بير ميللتی آیاق اوسته ساخلایان، اونون وارليغينی و دوامينی ساغلايان، ميللی شعورو بسلهين، بير ميللته منسوب اولما هززينی وئرهن و بيرئیلرينی(فردلرینی) بير-بيرينه ياخینلاشديراراق اونلار آراسيندا بيرليک يارادان عونصور اولاراق ديلين، ميللت حياتينداکی يئری چوخ اؤنملیدير. ائله کی، ميللتين وارليغی، ديلين وارليغیيلا اولاسیدیر.
________
*[بو یازی، چیراق کانالینین اوولرینده وئریلمیش، اوزون بیر مقالهدن، بیر پارچادیر. “کورهسل آنا دیلی گونو” موناسیبتی ایله، اؤزهتله وئریلدی.]