ادتاج اتحادیه دمکراتیک ترک آذربایجان جنوبی
گادتب: ۲۱ آذر ایللر بویو اسارت آلتیندا قالیب هئچ بیر حاق_حوقوقا صاحیب اولمایان، ایران آدلانان جغرافیادا، تکجه تورک قادینلاری اوچون یوخ بلکه بو جوغرافیادا یاشایان بوتون قادینلارین اسارتدن قورتولوب، اینسان یئرینه قویولوب حاق صاحیبی اولاراق تانیندیغی اؤنملی بیر گوندور.
میللی حوکومت تکجه گونئی آزربایجان و ایران آدلانان جوغرافیانی دئییل، بلکه شرق دونیاسینین دا قادينا اولان باخیشینی ائتکیسی آلتینا آلیب گونئی آزربایجان قادین حركاتينين يولونو ایشیقلاندیرمیش دیر. بو گون حدیث نجفی لر، آیلار حقی لر، اسرا پناهی لر کیمی شهیدلریمیزین تؤکوله ن قانلاری، آزادلیق اوغروندا یوزلرجه قادينيميزين توتوقلانیب، دؤیولوب و حبسه معروض قالدیقلاری، میلی حؤکومتیمیزین یوخلوغونو و بوشلوغونو بیزلره داها دا چوخ حیس ائتديرير.
آزربایجان دموکرات فیرقه سینین ۱۳۲۴جی ایلین ۷جی آینین ۱۰جو گونو یورورلویه کئچیردیی مرامنامه سینده اولان ۷جی مادهدن آچیق آیدین گؤرولور کی قادین و کیشی سئچمهک و سئچیلمهک ده ائشیت حاقلاری واردیر.
بئله کی ۲۰ یاشینا گلن قادین و کیشی مجلیس نمایندهلرینی سئچمکده و ۲۷ ایله ۸۰یاش آراسی قادین و ارکک لرین مجلیسه سئچیلمهلرینده هئچ بیر آیری سئچکیلیک اولمامالیدير.
او زامانین تاریخینی آراشدیریب باخدیقدا گؤرورک کی فرقهنین یورورلویه کئچیردییی ائشیتلیک ساغلایان بئلنچی قوراللار شرق دونیاسیندا چوخ چتین گؤرولوردو
و میللی حوکومت دونیادا اون اوچونجو دؤولت و باتی آسیادا بیرینجی دؤولت اولاراق بو حاققی قادینلارا تانیمیشدیر.
مریم خانیم جهانگیری دن بیر گؤزهل بيت لر ميللتيميزه ارمغان قالمیشدیر :
داغ و داشی پارلایان، الماس تک توپراغی زر
چایلاری جوشقون هامی بوستانلاريندا ثمر
پوزگینان بیگانهنین نقشهسین ائیله هدر
قویما نامحرم ائدہ عارضه بیرجه نظر
ای شرافت کانی ای غیرتلی آذربایجان
قهرمانلار یوردوسان شهرتلی آذربایجان
میللی حکومتین، او دؤنم آزادلیغین هئچ بیر یؤنونو یاشامامیش، اینسان کیمی یاشاماغین دادینی دادمامیش قادينلارا ارمغان ائتدییی حاقلار؛ بوگون گونئی آزربایجان قادينلارینا بیر بیر گوونج قایناغی اولموشدور.
آرتیق او قادينلار اؤزلرینه عایید دموکرات بیر میللی حوکومتی بیر دفعه لیکده اولسا یاشاییب و آزادلیق دئييلن او گؤزل دویغونون دادینی سویوت و سوموت بیر شکیلده آلیب و اوشاقلارینا، گلهجک نسیل لره آشيلاييب لار.
بوگون گونئی آزربایجانین چوخلو شهرلرینده حدیث نجفی نین سیمگهسی ایله ساچلارینی آرخادا بیغیب باغلاياراق اللری یوموراق، آزادلیق دوشمانلارینین اوستونه یورومهلری بونلارین آچیق آیدین گؤسترگهسيدير.
خیاوانلاردا جانلاری باهاسینا ساواشان بوقیزلار بیر زامان میللی حکومتی یاشایان قادينلارین تورونلاريدير.
