ادتاج اتحادیه دمکراتیک ترک آذربایجان جنوبی
گادتب: کورواغلو تاماشاسی ۲۸ دیدن اعتباراً ۱۰ گون بویونجا تبریزده نوماییش ائتدیریلهجک. ۲۰ ایل اؤنجه بینالخالق ایران زمین تئاتر فئستیوالیندا ان یاخشی تاماشا کیمی سئچیلن کوراوغلو تاماشاسی تبریزده ۲۹ بهمن مدنیت و اینجهصنعت مرکزینده اقبال آذر سالونوندا یئنیدن صحنهیه قویولاجاق.
تاماشانین بلیطلرینی آنلاین شکیلده “ebilit.com” سایتیندان آلماق مومکوندور.
تخمیناً ایکی ایل اول پوستری یاییلان کوراوغلو تاماشاسینین نوماییشی کورونا ویروس پاندئمییاسینا گؤره تاخیره سالینمیشدی. سئناریست و رئژیسسور یعقوب صدیق جمالی ایکی ایل سونرا یئنیدن تاماشانین صحنهیه قویولماسی اوچون حاضیرلاشدیقلارینی بیلدیریب.
کوراوغلو تاماشاسی ۱۳۷۹-جو ایلده نوماییش ائتدیریلنده بؤیوک ماراقلا قارشیلانمیشدی. تاماشا باشدا تبریز اولماقلا اؤلکهنین تهران و اهواز کیمی باشقا شهرلرینده ده نوماییش ائتدیریلمیشدی. داها سونرا ایسه آذربایجانین ناخچیوان موختار رئسپوبلیکاسی و تورکیه جمهوریتینده ده صحنهیه قویولموشدور.
