ادتاج اتحادیه دمکراتیک ترک آذربایجان جنوبی
گادتب: گونئی آذربایجان دئموکراتیک تورک بیرلیگی (گادتب) باشقانی سایین اژدر بی تاغیزاده ۸ مارت- بئین الخالق قادینلار گونو موناسیبتیله آذربایجان و تورک دونیاسینین خانیملارینا تبریک مئساژی عنوانلاییب.
سایین اژدر بیین خانیملارا تبریک مئساژینین بیر حیسهسینده دئییلیر: «تورک خانیمی تاریخ بویو هر زامان بؤیوک سایغی و احتیراملا آنیلمیشدیر. تورک خاقانلاری قادینلارینی «او دا منیم خانیم و بییم» دئیه تانیدارمیشلار. بو دا تورک خانیمینین هر زامان یوکسک اجتماعی مؤقعیه مالیک اولدوغونو گؤستریر.
آرخئولوژی قازینتیلار زامانی دا تورک دونیاسی و آذربایجان اراضیسیندن تاپیلان سون تونج و ائرکن دمیر دؤورونه عایید یوزلرله سلاحلی قادین قبیرلری تورک قادینلارینین تاریخدهکی یوکسک رولوندان خبر وئریر. تورک جمعیتینین تخمیناً یاریسینی تشکیل ائدن خانیملار تاریخ بویو ایگید اوغوللار تربییه ائتمکله یاناشی، هم ده تورک کیشیسی ایله چیین-چیینه تورک جمعیتینین اینکیشافیندا فعال ایشتیراک ائتمیشدیر. بو گون گونئی آذربایجانین ایستیقلال موجادیلهسینده ده خانیملارین چوخ بؤیوک رولونون اولماسی تصادفی دئییلدیر.
تورک قادینی بو گون آذربایجان تورک میللتینین حقوقلاری و موستقیللیگی اوغروندا مباریزه آپارماقلا یاناشی ایران آدلانان یئرده محدودلاشدیریلمیش ان عادی حقوقلارینی الده ائتمک اوغروندا دا مباریزه آپارماغا مجبور اولموشدور. خانیملاریمیزا بو مقدس موجادیلهمیزده اوغورلار دیلهمکله، بوتون تورک قادینلارینین، او جملهدن آذربایجان خانیملارینین و ایشغالچی ایران اسارتینه قارشی وطنیمیزین موستقیللیگی اوغروندا مباریزه آپاران بوتون خانیملاریمیزی بئین الخالق قادینلار گونو موناسیبتیله تبریک ائدیرهم.
عزیز خانیملار بایرامینیز موبارک!
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی»
