ادتاج اتحادیه دمکراتیک ترک آذربایجان جنوبی
گادتب: گونئی آذربایجان دئموکراتیک تورک بیرلیگی (گادتب) باشقانی سایین اژدر بی تاغیزاده 8 مارت بئین الخالق قادینلار گونو موناسیبتیله آذربایجان و تورک دونیاسینین خانیملارینا تبریک مئساژی عنوانلاییب.
سایین اژدر بَیین تبریک مئساژینین بیر حیسه‌سینده دئییلیر:
“تورک خانیمی تاریخ بویو هر زامان چوخ بؤیوک سایغی و احتیراملا آنیلمیش‌دیر. تورک خاقان‌لاری قادین‌لارینی “او دا منیم خانیم و بییم” دئیه تانیدارمیشلار. بو دا تورک خانیمینین هر زامان یوکسک اجتماعی مؤوقعیه مالیک اولماسیندان خبر وئریر.
آرخئولوژی قازینتی‌لار زامانی دا تورک دونیاسی و آذربایجان اراضیسیندن تاپیلان سون تونج و ائرکن دمیر دؤورونه عاید یوزلرله سلاحلی قادین قبیرلری تورک قادین‌لارینین تاریخ‌ده کی رولونو گؤستریر. تورک جمعیتی‌نین تخمیناً یاریسینی تشکیل ائدن خانیم‌لار تاریخ بویو ایگید اوغوللار تربییه ائتمکله یاناشی، هم ده تورک کیشیسی ایله چیگین-چیگینه تورک جمعیتی‌نین اینکیشافیندا فعال ایشتیراک ائتمیش‌دیر. بو گون گونئی آزربایجانین ایستیقلال موجادیله‌سینده ده خانیم‌لارین چوخ بؤیوک رولونون اولماسی تصادفی دئییل‌دیر.
تورک خانیمی بو گون آذربایجان تورک میللتی‌نین حقوق‌لاری و موستقیل‌لیگی اوغروندا موباریزه آپارماقلا یاناشی ایران آدلانان یئرده محدودلاشدیریلمیش ان عادی حقوق‌لارینی الده ائتمک اوغروندا دا موباریزه آپارماغا مجبور اولموش‌دور. خانیم‌لاریمیزا بو مقدس موجادیله‌میزده اوغورلار دیلمکله، بوتون تورک قادین‌لارینین، او جمله‌دن آذربایجان خانیم‌لارینین و ایشغالچی ایران اسارتینه قارشی وطنیمیزین موستقیل‌لیگی اوغروندا موباریزه آپاران بوتون خانیم‌لاریمیزی بئین الخالق قادینلار گونو موناسیبتیله تبریک ائدیرم.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
