گادتب: 31 یانوار آذربایجان خالق جمهوریتینین بانیسی، بؤیوک تورکچو، دؤولت و اجتماعی خادیم، سیاستچی و پوبلیسیست، آذربایجان تورک میللتینین داهی اؤندری محمد امین بی رسولزادهنین دوغوم گونودور. محمد امین رسولزاده 1884-جو ایل یانوارین 31-ده باکینین نوخانی کندینده آنادان اولوب.
محمد امین رسولزاده 1918-جی ایل، مایین 28-ده قورولان آذربایجان خالق جمهوریتینین بانیلریندن بیریدیر. تورک دونیاسیندا ایلک دئموکراتیک پارلامئنتلی رئسپوبلیکا اولان آذربایجان خالق جمهوریتینین جمعی 23 آی عؤمور سورمهسینه و قیزیل اوردونون آذربایجانی ایشغال ائتمهسی نتیجهسینده سقوطا اوغراماسینا باخمایاراق، محمد امین رسولزاده نین قوردوغو دئموکراتیک آذربایجان دؤولتی اینسانلارا چوخ بؤیوک حقوق و آزادلیقلار وئرمیشدی. اینسانلارین برابرلیگی پرینسیپلرینه اساسلانان آذربایجان خالق جمهوریتی هله غربده بئله قادینلارین سئچمک و سئچیلمک حقوقو اولمادیغی بیر واختدا قادینلارا بو حقوقو وئرمیشدی. آذربایجاندا ایلک اونیوئرسیتئتین، اوردونون، دونانمانین اساسی محض بو دؤورده قویولموشدور.
محمد امین رسولزاده 1918-جی ایلده فتحعلی خان خویلو ایله بیرگه آزربایجان خالق جمهوریتینی قورماقلا معاصر دؤولت فورماسیندا آذربایجان دؤولتچیلیگینین اساسینی قویموشدور. بوگونکو آذربایجان رئسپوبلیکاسی محمد امین رسولزاده نین ایدئاللاری و آذربایجان خالق جومهوریتینین 3 رنگلی بایراغی ایله آذربایجان دؤولتچیلیگینی داوام ائتدیرمکدهدیر
محمد امین رسولزادهنین قوردوغو آذربایجان خالق جمهوریتی آذربایجان تورک میللتینین چوخ عصیرلیک دؤولتچیلیک تاریخینین پارلامئنتلی جمهوریت فورماسیندا معاصر دؤورده داوامی اولموشدور. گونئی آذربایجان دئموکراتیک تورک بیرلیگی (گادتب) موستقیل آذربایجان رئسپوبلیکاسینی محمد امین رسولزاده نین قوردوغو آذربایجان خالق جومهوریتینین واریثی کیمی تکجه قوزئیلی سویداشلاریمیزین دئییل، بوتون دونیا آذربایجانلیلارینین دؤولتی حساب ائدیر. بو دؤولت گونئی آذربایجاندا موستقیل آذربایجان دؤولتینین و عمومیتله بوتؤو آزربایجانین یارانماسی اوچون دایاق نقطهسی، ایدئیا قایناغیدیر. گادتب آزربایجانین گونئیینین میللی قورتولوشونو یالنیز و یالنیز ایستیقلال و جمهوریت ایداره اصولوندا گؤروب، آذربایجان خالق جمهوریتینی اؤزونه نمونه حساب ائدیر و محمد امین رسولزاده نین تورکچولوک ایدئاللارینا صداقتله گونئی آزربایجانین موستقیللیگی و بؤتوو آزربایجانین یارانماسی اوغروندا فعالیت گؤسترمه یی اؤزونه شرف بیلیر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی