ادتاج اتحادیه دمکراتیک ترک آذربایجان جنوبی
گادتب: ایرقچی فارس-موللا رئژیمی صرف آذربایجان رئسپوبلیکاسی و گونئی آذربایجانا یاشایان آذربایجان تورک میللتی ایله دوشمنچیلیک نیتی ایله ائرمنیستانا تبریزده کونسوللوق آچماغی قارشییا مقصد قویوب. سؤزسوز کی، ائرمنیستانی تبریز و گونئی آذربایجانلا باغلایاجاق هئچ بیر باغ مؤوجود دئییل‌دیر و ایران دؤولتینین بو جهدی صرف اونون آنتی‌آذربایجان سیاستین‌دن خبر وئریر.
اصلینده بو ایرانین ایرقچی فارس حاکمیتینین ایلک بئله غرضلی یاناشماسی دئییل. ایرقچی فارس-موللا رئژیمی ریاکارلیلا اؤزونو مسلمانلارین حیمایه داری کیمی قلمه وئرسه ده، اصلینده آذربایجانا قارشی خوجالی سویقیریمی تؤرتمیش ائرمنی ایشغال‌چیلارینی دایم دستکله‌ییب. ایکینجی قاراباغ محاربه‌سین‌ده آذربایجان اوردوسونون غالیب گلیب اؤز اراضیلرینی آزاد ائتمه‌سی ایسه ایرانی او درجه‌ده غضبلندیردی کی، آرتیق اؤز ماهیتینی گیزله‌ده بیلمه‌ییب ایچ اوزونو آچمیش‌دیر. ایران رئژیمی بو ایستیقامت‌ده ائرمنیستانین آذربایجانا حربی تجاووزونو پیسله‌ین آذربایجان‌لی فعالارا دا دیوان توتوب، اونلارا قارشی آغیر حبس جزالاری وئرمیش‌دیر. موللا رئژیمی ائرمنیستانی آذربایجانا قارشی سلاحلاندیرماقلا یاناشی، زنگه زور دهلیزینین باش توتماماسی اوچون الین‌دن گله نی ائدیب. بو ایستیقامت‌ده قافان‌دا اؤز کونسوللوغونو آچان موللا رئژیمی سون اولاراق آذربایجانین اوره یی اولان تبریزده ائرمنی کونسوللوغو آچماقلا بیر داها اؤزونون آنتی‌آذربایجان و آنتی‌تورک ماهیتنی تصدیقله میش اولاجاق. لاکین موللا رئژیمینین بو غرضلی جهدلری هئچ بیر مثبت نتیجه وئرمه‌یه‌جک و ائرمنیلرین آلته چئوریلمه‌سی موللا رئژیمینه هئچ بیر شئی قازان‌دیرا بیلمه‌یه‌جک.
گونئی آذربایجان دئموکراتیک تورک بیرلیگی (گادتب) ایرانین آذربایجانین گؤز ببه یی اولان تبریزده ائرمنیستانا کونسوللوق آچماسینی پیسله‌یه‌رک، آذربایجان و تورکیه‌نی، ائله‌جه ده تورک میللتینی ایرانین فارس-موللا رئژیمینین آنتی‌تورک و دوشمن خیصلتینی دوزگون دیرلندیرمه‌یه چاغیریر. گادتب همچینین ایرقچی فارس-موللا رئژیمینی ده بوندان آرتیق ایرنج‌لیک ائدیب، آذربایجانلا دوشمنچیلیک ائتمه‌مه‌سی اوچون اویاریر. ایرانین موللا رئژیمی اونوتماسین کی، جیزیغین‌دان چیخیب آذربایجانا قارشی هر هانسی ایرنج نیت‌ده بولونسا بوتون گونئی آذربایجانی اؤز قارشیسین‌دا گؤره‌جک.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
