گادتب: گونئی آذربایجانی موستملکه ائدیب یئر اوستو و یئرآلتی ثروتلرینی تالاییب فارس بؤلگهلرینه داشییان ایرقچی فارس-موللا رئژیمی، کؤله کیمی ایشلتدیگی آذربایجانلی ایشچیلرین عادی امک حاقلارینی دا منیمسهییر و وئرمک ایسته میر. اطراف محیطی چیرکلندیریلن، ثروتلری تالانان و کؤله وضعیتینه سالینمیش آذربایجانلی ایشچیلری ایشدن محروم ائدیب، یالنیز فصلی فورمادا آشاغی امک حاقی ایله ایشه گؤتورمک همین ثروتلرین صاحبی اولان آزربایجانلیلارا بیر یوخ،- بیر نئچه قات ظلمدور.
ایران رئژیمی و اونون ال آلتیلاری اوستهلیک اؤز حقوقلاری اوغروندا موباریزه و تعطیله باشلایان آذربایجانلی ایشچیلره قارشی تئررور تؤردیب. خوشبختلیکدن ایشچیلرین آییق-ساییق اولماسی ایله رئژیمین آذربایجانلی ایشچیلره قارشی تئررور عملی تلفاتسیز اؤتوشوب. لاکین ایران رئژیمی و اونون ال آلتیلاری گونئی آزربایجانین ورزیغان بؤلگهسینده فؤق العاده وضعیت اعلان ائدیب آذربایجانلی ایشچیلرین حاقلی اعتراضینی یاتیرماغی قارشی مقصد قویوب. اونلار چکینمهدن ایشچیلری رئژیمه قارشی چیخماقدا اتهام ائده رک، وحشیجهسینه هوجوملا هدهلهییبلر.
گونئی آذربایجان دئموکراتیک تورک بیرلیگی (گادتب) آذربایجانلی ایشچیلرین حاقلی اعتراضینی دستکلهییب، موستملکهچی ایران رئژیمی و اونلارین ال آلتیلارینین آذربایجانلی ایشچیلره ظلمو و تؤرتدیکلری تئررور عملینی پیسله ییر. گادتب آذربایجان تورک میللتینه و آذربایجانلی ایشچیلره قارشی موستملکه سیاستینین بیتمهسینین یئگانه یولونون گونئی آزربایجانین اؤز موستقیللیگینی الده ائتمهسینده گؤرور و آذربایجان تورک میللتینی موستقیللیک آمالی اوغروندا بیرلشمهیه چاغیریر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی