ادتاج اتحادیه دمکراتیک ترک آذربایجان جنوبی
گادتب: بئین الخالق آنا دیلی گونو موناسیبتی ایله تشکیلاتلارین یایدیغی اورتاق بیانات‌دا گونئی آذربایجان دئموکراتیک تورک بیرلیگینین (گادتب) ده بیزیم راضیلیغیمیزلا آدی وئریلمیش‌دیر. سایین محمود بی بیلگینین تشببوثو ایله بئین الخالق آنا دیلی گونو ایله باغلی بیلدیریش حاضیرلانیب و گادتب-یه ساده‌جه بیلدیریشین متنی گؤندریلمکله راضیلاشدیریلیب.
سؤزسوز کی، سایین محمود بی بیلگین آذربایجان میللی حرکاتین‌دا ایناندیغیمیز و تانیدیغیمیز مسلکداشیمیزدیر و گونئی آذربایجان تشکیلاتلارینین بیرلیگین‌ده اونلارین تشکیلاتلاری ایله امکداش‌لیق دا ائتمیشیک. سایین محمود بیین آنا دیلیمیزله باغلی گؤستردیگی تشببوثه دستک وئرمه یی و اونا قاتیلماغی گادتب اولاراق اؤزوموزه بورج بیلیب و قوشولدوق. بیلدیریشین متنی بیزه گؤندریلدیگی اوچون متن‌دن خبریمیز اولسا دا، نه متنین حاضرلانماسین‌دا ایشتیراک ائتمیشیک، نه ده راضیلاشدیریلدیغی تشکیلاتلار باره‌ده اؤنجه‌دن بیزه معلومات وئریلمه‌ییب. بیز بیلدیریشین آنا دیلیمیزله باغلی اولدوغو اوچون صرف آذربایجان تشکیلاتلاری ایله راضیلاشدیریلاجاغینی دوشونوب و اونلارلا دا همرأی اولماغی مقصده اویغون سایاراق راضی‌لیق وئرمه یی اؤزوموزه بورج بیلدیک. لاکین بیلدیریش، تشببوثکار تشکیلات طرفین‌دن ایجتیماعیت اوچون سایتلاردا یاییلان‌دان قیسا مدت اؤنجه شخصاً منه گؤندریلدی و من تصادفاً یارانمیش ساغلیق دورومو ایله باغلی اولاراق بیلدیریشه باخانا کیمی ایجتیماعیته یاییلدی و بئله‌لیکله بیز ده یارانمیش چتین وضعیتله علاقه دار ایجتیماعیتله عینی واخت‌دا بیلدیریش‌ده آدلاری گئدن تشکیلاردان خبریمیز اولوب.
گادتب-نین بیلمه‌دن و تصادفاً قارشیلاشدیغی بو چاتیشمازلیق قصداً باش وئره‌ن بیر حادثه دئییل و بیزیم موقعییمیز دگیشمز اولاراق قالیر. گادتب و عمومیتله بیز هئچ بیر شرایط‌ده آذربایجانا و حتی هر هانسی تورک دؤولتینه قارشی تورپاق ادعاسی اولان، میللتیمیزین قانینی تؤکموش شخص و تشکیلاتلارلا بیر آرایا گله و یا موذاکیره آپارا بیلمریک. بیزه یاخشی بللی‌دیر کی، کوردلر زامان-زامان ایستر ۱۹-جو عصر و ۲۰-جی عصرین اوللرین‌ده، ایستر سولدوز حادثه‌سین‌ده، ایسترسه ده سون دؤورلرده آذربایجانا هوجوم ائدیب قتل عاملار تؤره‌مه‌لری، تورکیه‌ده محمتجیکلریمیزی قتل عام ائتمه‌سی هئچ زامان اونودولا بیلمز. گادتب هئچ زامان بئله کورد تشکیلاتلاری ایله مذاکیره‌یه گئتمه‌ییب و هئچ بیر شرایط‌ده ده گئتمز. بیزیم آدی چکیله‌ن بیلدیریشی هئچ بیر تشکیلاتلا راضیلاشدیرماق اوچون مذاکیره آپارمادیغیمیز و یالنیز تصادفاً یارانان چتین شرایطله علاقه دار بیلدیریشین یاییلماسین‌دان سونرا اونون آلتین‌دا بیر کورد تشکیلاتینین آدینین گئتدیین‌دن خبریمیزین اولماسی بیر گئرچک‌لیک‌دیر. بو تصادفاً باش وئرمیش حال و ان یاخشی حال‌دا سهل انکارلیق، دوشمنلری سئویندیریب، دوستلاریمیزی پریشان ائتمه‌مه‌لی‌دیر. بیزیم و گادتب-نین موقعیی دگیشمه‌ییب و هئچ بیر شرایط‌ده ده دگیشمه‌یه‌جک.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
