ادتاج اتحادیه دمکراتیک ترک آذربایجان جنوبی
گادتب: آذر آیینین 21-ده قورولان آذربایجان میللی حکومتی مین ایللر بویو بؤیوک ایمطراتورلوق‌لار قوران آذربایجان تورکونون گونئی آذربایجانین معاصر دؤور دؤولتچی‌لیک مودئلینه کئچدی و غرب ایمپئریالیزمی‌نین چئوریلیشله فارس فاشیزمی‌نی حاکمیته گتیره‌رک ایتیریلمیش ایستیقلالینین برپاسینین باشلانغیجی ایدی. بو مقدس یولدا میللی حکومتی قوران سید جعفر پیشه وری دئییردی “اؤلدو وار دؤندو یوخ‌دور”. آذربایجان میللی حکومتی‌نین هر طرف‌دن شووینیست و جینایتکار فارس رئژیمی و اونون حمایه‌چی‌لری‌نین تضییقی و هوجومو نتیجه‌سینده سقوطون‌دان سونرا آزربایجانین دوشمن‌لری بو سؤزو لاغا قویا‌راق، “اؤلدو ده وار ایمیش دؤندو ده” دئییردی‌لر. لاکین باشا دوشموردولر کی، پیشه وری بو سؤزو تکجه بیر دؤنم اوچون یوخ، بلکه بو گون اوچون ده دئییرمیش. بو گون بو حرکات داوام ائدیر و آذربایجان تورک میللتی اؤز موستقیل‌لیگینی الده ائتمه ینه دک مباریزه‌دن ال چکمه‌یه‌جک.
میللی حکومتین قورولماسینین باشلانغیجی اولان 21 آذر حرکاتی صینفی مباریزه یوخ، میللی حرکات ایدی. حرکاتین باشچی‌سی پیشه وری دفعه‌لرله تکرار ائدیردی کی، بو حرکات میللی حرکات‌دیر، صینفی حرکات دئییل. آذربایجان تورک‌لری بیر-بیرینه قارشی موجادیله آپارمیرلار. بلکه فارس شووینیزمینه قارشی مباریز آپاریب، آذربایجان تورکجه‌سینده مکتب، اونیوئرسیتئت، مطبوعات و رادیونون آچیلماسینا چالیشیرلار و بونو دا ائتمیشدی‌لر. حرکاتین تکجه آماجی میللی حکومتین قورولماسی ایدی.
گونئی آذربایجاندا میللی حکومتین قورولماسی ایله گونئی آذربایجانا یئنی روح، دئموکراتیا و آزادلیق گلدی. بو دا ایرقچی و ایرتیجا‌چی فارس شووینیزمینی، ائله‌جه ده اونلاری دستکله‌ییب حاکمیته گتیرن باشدا اینگیلتره اولماقلا دونیا موستملکه‌چی‌لرینی قورخویا سالدی. بئله کی، ایمپئریالیزم و دونیا موستملکه‌چی‌لری موسکوا کونفرانسیندا آزربایجانین مختاریت قازانماسینا بئله ایجازه وئرمه‌دی‌لر. بونون آردین‌دان ایسه ایمپئریالیزمین یاردیمی ایله تهران رئژیمی بوتون آنلاشما‌لارا رغماً آذربایجانا هوجوما کئچیب، آذربایجانی ایشغال ائتمکله آذربایجان تورک‌لرینه قارشی دهشتلی سویقیریم تؤرتدی.
البته سید جعفر پیشه وری بهانه‌لرین بیر دفعه‌لیک اورتا‌دان قالخماسی اوچون دئموکراتیا، مختاریت، فئدئرالیزم و پارلامئنتاریزمی ده یوخلادی. لاکین تهرانین ایرتیجا‌چی-شووینیست فارس رئژیمی و اونون حمایه‌دارلاری گؤستردی‌لر کی، بو بؤلگه‌ده و قوندارما ایران آدی آلتیندا اولان اراضیده آذربایجان تورک میللتینه هئچ زامان اؤز مدنی و اینسانی حقوق‌لارینا چاتماغا ایجازه وئرمه‌یه‌جک‌لر. 21 آذر حرکاتینین باشلانغیجی و فاجعه وی سونو دا گؤستردی کی، آذربایجان تورک میللتی یالنیز اؤزونه گوونمه‌لی‌دیر. میللت اؤزونه گوونیب، ایراده‌سینی سرگیله‌سه هئچ بیر ایمپئریانین حمایه‌سینه ده محتاج اولماز. بیز اؤز میللتیمیزه گوونیریک. بیزیم لیدئرلریمیز محمد امین رسول‌زاده، پیشه وری، ابوالفضل ائلچیبی و آتاتورک ده گؤستردی کی، گوج تورک میللتینده‌دیر. آذربایجاندا دا آذربایجان تورک میللتی ایراده ائدنده اؤز مجلیسینی، اؤز دؤولتینی و اؤز اوردوسونو یارا‌دیر. سرحدلرینه، سینیرلارینا اؤزو صاحب چیخیر. بو گون 21 آذر حرکاتینین عنعنه‌سینه دایانا‌راق، آزربایجانین گونئیی‌نین تکجه بیر یولو قالیب. او دا اؤز ایستیقلالینی الده ائدیب و آزربایجانین موستقیل دؤولتینی یاراتماق‌دیر. بو حرکاتین بیزه تکجه بیر مئساژی وار. او دا فارسا، فارس شووینیزمینه اینانما‌دان یالنیز اؤز گوجوموزه دایانیب آذربایجانی آزاد ائتمک. بیر سؤزله پیشه وری دئمیشکن بو میللته موستقیل‌لیگینی الده ائدندک نه اؤلدو وار نه دؤندو.
گونئی آذربایجان دئموکراتیک تورک بیرلیگی (گادتب) آذربایجان تورک میللتینی گونئی آذربایجاندا میللی دؤولت‌چی‌لیگی و موستقیل‌لیگینی برپا ائتمک اوچون میللتیمیزی بیرلییه و ایستیقلال‌چی تشکیلات‌لار اطرافیندا بیرلشه‌رک حاقلی مباریزه‌میزی گوجلندیرمه‌یه چاغیریر. کیمسه‌یه سیرر دئییل کی، گونئی آزربایجانین یئگانه قورتولوش یولو ایستیقلال‌دیر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
