گادتب: 31 دئکابر – دونیا آذربایجانلیلارینین همرأیلیگی گونو دئینده پارچالانمیش آذربایجان تورک میللتی و اونون وطنی آزربایجانین بوتؤولشمهسی اوغروندا همرأیلیک و بیرلیک نظرده توتولور. همرأیلیک گونئی آزربایجانین موستقیللیگینی برپا ائدیب، بوتؤو آزربایجانین یارانماسی و تورک دونیاسی ایله بیرلیک و بوتؤولوگو هدفلهین بؤیوک بیر آمالدیر.
31 دئکابر ایشغالچی اؤلکهلر طرفیندن پارچالانمیش آزربایجانین و آذربایجان تورک میللتینین 1989-جو ایلین سونلاریندا بیرلیک، بوتؤولوک و همرأیلیک ایسته یینین رمزی کیمی تاریخه دوشموشدور. قوزئی آزربایجانین ایستیقلالینی برپا ائتمه عرفهسینده آذربایجان تورک میللتینین آراز چایی بویونجا تیکانلی مفتیللری و سرحد مانعهلرینی داغیداراق، حسرتده یاشایان باجی-قارداشلارین گؤروشوب قوجاقلاشماسی، پارچالانمیش آذربایجان تورک میللتینین بیرلشمک ایسته یینین نئجه درین کؤکلره مالیک اولدوغونو بیر داها گؤسترمیشدیر. بو ایسه گولوستان و تورکمنچای مقاویلهسیندن یوز ایللر کئچسه ده آذربایجان تورک میللتینین بو پارچالانما ایله باریشمادیغینی گؤستریر. بو واسطه ایله آزربایجانین قوزئیی و گونئیینده یاشایان آذربایجان تورک میللتی اؤز بیرلیک و همرأیلیگینی عملده گؤستردی و 31 دئکابر – دونیادا آذربایجانلیلارینین همرأیلیگی گونو کیمی تاریخه دوشدو.
سؤزسوز کی، آزربایجانین بیرلیگی و بوتؤولوگونه اساس مانعه ایسه آذربایجان تورپاقلارینین بؤیوک بیر حیسهسینین ایشغالدا قالماسیدیر. قاراباغین ایشغالدان آزاد ائدیلمهسی آذربایجان دؤولتی ایله یاناشی بوتون دونیادا یاشایان آذربایجان تورک میللتینین اساس آمالی، مقصدی و وظیفهسی ایدی. آرتیق ائرمنی ایشغالچیلارین مغلوب ائدیلمهسی ایله آزربایجانین گونئیینین ایشغالدان آزاد ائدیلیب موستقیللیگینی برپا ائتمهسی اساس مانعه کیمی گوندمدهدیر. آذربایجان تورکو بیلمهلیدیر کی، آزربایجانین بؤیوک حیسهسی اولان گونئی آذربایجان تام ایشغالدادیر. گونئیین موستقیللیک قازانیب، بوتؤو آزربایجانین یارانماسی بو بیرلیک بایرامینین گئرچکلشدیگی گون اولاجاق. بو یولدا بؤیوک میللی-سیاسی بیرلیک و همرأیلیک طلب اولونور. موستقیل آذربایجان دؤولتی ده بو ایستیقامتده اؤز ایرادهسینی اورتایا قویماقدادیر .
گونئی آذربایجان دئموکراتیک تورک بیرلیگی (گادتب) 31 دئکابر – دونیا آذربایجانلیلارینین همرأیلیک گونونو پارچالانمیش آذربایجان تورکونون همرأیلیک و بوتؤولشمه پروسئسینده چوخ موهوم بیر حادثه کیمی ده یرلندیرهرک، بو موناسیبتله بوتون آذربایجان تورکلرینی تبریک ائدیر. اینانیریق کی، گونئی آزربایجانین اؤز موستقیللیگینی برپا ائتمهسی و بوتؤو آزربایجانین یارانماسی ایله آزربایجانین تورک میللتینین بیرلیک و بوتؤولوک ایسته یی گئرچکلشهجک. سؤزسوز کی، میللتیمیزین و وطنیمیزین عملده تام بوتؤولشمهسی اوغروندا بیرلیکده مباریزه آپارماق هر بیر آذربایجان تورکونون وظیفهسیدیر و گادتب بو ایستیقامتده اؤز فعالیتینه داوام ائدهرک، بؤیوک میللتیمیزی آزربایجانین حقیقی بوتؤولشمهسی اوغروندا سعیلرینی بیرلشدیرمهیه و همرأی اولماغا چاغیریر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی