ادتاج اتحادیه دمکراتیک ترک آذربایجان جنوبی
گادتب: دیرلی آذربایجان تورک میللتی!
بیلدیینیز کیمی گونئی آذربایجان میللی حرکتینه منسوب ۹ تشکیلاتین بیرگه تشببوسو ایله ۱۷.۷. ۲۰۲۱-جی ایل تاریخ‌دن اعتباراً گونئی آذربایجان تشکیلاتلاری ایشبیرلیگی مرکزی فعالیته باشلاییب.
بو قورومون یارادیلماسینین اساس مقصدی میللی حرکاتلا ایلگی‌لی اورتاق مشورت و موذاکیره‌لر آپارماق، گونئی آذربایجانلا باغلی آپاریلان فعالیتلره بیرلیک‌ده دستک وئرمک، بیل‌دیریلر یایماق، چاغیریشلار ائتمک و کوردینه اولونموش شکیل‌ده تشکیلاتلاراراسی ایشبیرلیینه نایل اولماق‌دان عبارت‌دیر. گونئی آذربایجان تشکیلاتلاری ایشبیرلیگی مرکزی اورتاق قرارلا اؤزونون ۱۴ مادده‌لیک فعالیت پرینسیپلرینی و ایچ دوزویونو هازیرلامیش و بو اساس‌دا دا دفعه‌لرله گونئی آذربایجان میللی حرکاتی ایله باغلی بیرگه بیانات، بیل‌دیری و چاغریشلارا ایمضا آتمیش‌دیر.
گونئی آذربایجان تشکیلاتلاری ایشبیرلیگی مرکزی داوام‌لی اولاراق ایجلاسلارینی کئچیریر، گونئی آذربایجانلا باغلی گون‌ده‌م‌ده اولان مسئله‌لری اورتاق موذاکیره‌یه چیخاریر و زروری اولدوغو حال‌دا قرارلار قبول ائدیر. معلومات اوچون بیل‌دیرمک ایستردیک کی، مرکزه اویه تشکیلاتلاردان بیری اولان گاموح ۲۴.۳.۲۰۲۲-جی ایل تاریخ‌ده اؤز ایسته یی ایله بو قوروم‌دان آیریلمیش‌دیر. حاضیردا گونئی آذربایجان تشکیلاتلاری ایشبیرلیگی مرکزین‌ده ۸ تشکیلات تمثیل اولونور و بو قوروم اؤز فعالیتی ایله باغلی داوام‌لی اولاراق میللتیمیزه بیلگی وئره‌جک‌دیر.
گونئی آذربایجان تشکیلاتلاری ایشبیرلیگی مرکزی اویه‌لری:
آزادلیق جبهه‌سی (گاماج)
آذربایجان مرکز پارتییاسی (آمپ)
آذربایجان میللی دیرنیش تشکیلاتی (دیرنیش)
آذربایجان او̈یرنجی حرکاتی (آزوح)
گو̈نئی آذربایجان دئموکرات پارتییاسی (گادپ)
گو̈نئی آذربایجان ایستیقلال پارتییاسی (گایپ)
گو̈نئی آذربایجان لیبئرال دئموکرات پارتییاسی (گالدپ)
گو̈نئی آذربایجان دئموکراتیک تو̈رک بیرلیگی (گادتب)
