ادتاج اتحادیه دمکراتیک ترک آذربایجان جنوبی
گادتب: یئنی گون – یاز بایرامی قیطعه‌لره (قاره لره) سیغمایان تورکون و بو گون ده بوتون تورک دونیاسینین بایرامی‌دیر. یئنی گون بایرامی تورکون طبیعت‌دن ایلهام آلیب فورمالاشدیردیغی ان قدیم بایرامدیر.
تورک میللتی‌نین هله اون مین ایل اؤنجه‌دن فورمالاشدیردیغی یئنی گون- یاز بایرامی اینسان‌لارین ایلکین حیات طرزی، اکینچی‌لیک و طبیعتین قیشدان سونرا یئنیدن اویانماسی ایله باغلی اولموش‌دور. بو بایرام اساس ایکی قیطعه‌یه یاییلمیش تورک‌لرین هامیسیندا دینین‌دن آسیلی اولمایا‌راق کئچیریلیر. حتی پروتوتورک خالقلار حساب ائدیلن ایکی چای آراسیندا ساویر و شومئرلرده بئله یئنی گون بایرامی کئچیریلمیش‌دیر.
“دیوانی لغات الترک”ده ده بو میللی بایرامیمیز “یئنگی گون” (یئنی گون) کیمی قئید ائدیلمیش و داها سونرا‌لار فارسجایا حرفی ترجومه ائدیله‌رک نوروز شکلینده تورک ایمپئراتورلوق‌لارینین اراضی‌سینده ایشله دیلمیش‌دیر. “یئنی گون” سؤزو تورک سلطان‌لارینین (سلجوقلو ملیکشاه) گؤستریشی ایله فارسجایا ترجومه ائدیلدیگی اوچون بیر چوخ بؤلگه‌لرده نوروزی سلطان و سلطان نوروزو شکلینده ایشله دیلمیش و حتی بیر سیرا تورک اؤلکه‌لرینده بو گون ده بو شکیلده ایشله دیلمکده‌دیر. یئنی گونون ترجومه فورماسی اولان نوروز بؤیوک سلجوقلو سلطانی ملیکشاهین تقویم اصلاحات‌لارین‌دان سونرا یاییلمیش‌دیر.
اوچ قیطعه‌نین مین ایللر بویو حاکمی اولموش تورک میللتی قانادلاری آلتینا سیغینمیش بیر سیرا خالق‌لاردان دا بو گؤزل عنعنه‌سینی اسیرگه مه میش و اونلار دا یئنی گون-یاز بایرامینی منیمسه‌ییب قئید ائتمکده‌دیرلر.
گونئی آذربایجان دئموکراتیک تورک بیرلیگی (گادتب) بؤیوک تورک میللتی‌نین قدیم بایرامی اولان یئنی گون-یاز بایرامینین بو گون ده تورک میللتی‌نین اورتاق میراثی کیمی تورک دونیاسینی بیرلشدیردیگینی دوشونور. تورکون بو میللی بایرامی موناسیبتی ایله گونئی و قوزئی آذربایجاندا تورک میللتینی، ائله‌جه ده تورک دونیاسینی تبریک ائدیر، میللتیمیزه موتلولوق، آیدین گله‌جک، گونئی آذربایجان دا داخیل اولماقلا اسارتده اولان باشقا تورک‌لره آزادلیق و موستقیل‌لیک دیله ییریک.
یئنی گون-یاز بایرامینیز موبا‌رک!
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
