گادتب: 20 یانوار فاجعهسی معاصر دؤورده آذربایجان تاریخینه عموم میللی حوزن گونو کیمی دوشسه ده، اصلینده موستقیللیگی و آزادلیغی اوغروندا آیاغا قالخمیش آذربایجان تورک میللتینین موستملکهچی ایمپئریا اوردوسو قارشیسیندا مثلسیز قهرمانلیق گونو کیمی تاریخه دوشموشدور. 20 یانوار فاجعهسینده روسلارین آذربایجانیمیزین قوزئیینده موستقیللییه جان آتان آذربایجان تورک میللتینه دیوان توتدوغو کیمسهیه سیرر دئییلدیر. هر زامان تورکه قارشی روس و ائرمنی فیتنکارلیغی، میللتیمیزه قارشی بؤیوک فلاکتلرله نتیجه له نیب.
1990-جی ایل یانوارین 19-دان 20-نه کئچن گئجه ده سووئت-روس اوردوسو و تانکلاری آزادلیغی اوچون آیاغا قالخمیش الی یالین آذربایجان تورک میللتینین اوزرینه هوجوما کئچمیشدیر. فاجعه زامانی باکیدا و قوزئی آزربایجانین دیگر بؤلگهلرینده 146 شخص اؤلدورولدو، 744 نفر آغیر خسارت آلدی، 841 نفر ایسه قانونسوز اولاراق حبس ائدیلدی. سووئت اوردوسونون عملیاتلاری نتیجهسینده 200 منزیل، ائو، شخصی و دؤولت املاکی داغیلدی. لاکین آذربایجان میللتی سووئت-روس اوردوسونا غالیب گلدی.
1990-جی ایل یانوارین 20-ده قوزئی آذربایجاندا آذربایجان تورک میللتی ثبوت ائتدی کی، الی یالین بیر میللت دونیانی قورخویا سالان سووئت-روس ایمپئریاسی و روس قوشونونا سینه گریب، غالیب گله و موستقیللیگینی برپا ائده بیلر. میللتیمیزین قوزئی آذربایجاندا دونیانین ایکی بؤیوک گوجوندن بیرینین تانکلاری قارشیسیندا دایانیب میثیلسیز قهرمانلیق گؤسترمهسی، تکجه قوزئی آزربایجانین موستقیللیک تاریخینده قهرمانلیق صحیفهسی کیمی تاریخه دوشمه میش، هم ده موستقیللیگی اوغروندا موباریزه آپاران گونئی آذربایجانا و عمومیتله تورک دونیاسینا بؤیوک درس اولموشدور.
روسلار تکجه آزربایجانین قوزئیینده دئییل، آزربایجانین گونئیینده ده بؤیوک فلاکتلره سبب اولوبلار. تکجه اورمیه، سالماس و خوی بؤلگهلرینده 200 مین آذربایجان تورکو روسلارین بیر باشا تشکیلاتلاندیریب سیلاحلاندیردیغی ائرمنی-آیسورلارین الی ایله 1918-جی ایلده سویقیریمین قوربانی اولدولار. تبریز و آزربایجانین باشقا بؤلگهلرینده ده یوزلرله آذربایجان اوغلو اؤلدورولوب، آزربایجانین ثروتلری تالانمیشدیر. هئچ بیر دؤورده روس آذربایجان تورکونه فلاکت و بدبخت چیلیکدن باشقا هئچ نه وئرمه میشدیر. گونوموزده ده روسلارین مختلیف بؤلگهلرده تورک میللتینه قارشی دوشمنچیلیگی داوام ائدیر. آذربایجان اوروسونون ایشغال ائدیلمیش آذربایجان اراضیلرینی ایشغالدان آزاد ائدرکن روسون بو مقدس وظیفهیه مانع اولدوغو و بیر داها صلح مراملی آدی ایله یئنیدن آذربایجانا قارشی ایشغال سیاستینی داوام ائتدیردیگی گؤز اؤنوندهدیر. بو ایل یانوارین اوللرینده روس و ائرمنی فیتنکارلیغی ایله تورک اؤلکهسی قازاخیستاندا تورک میللتینه قارشی تؤرهدیلن سویقیریم و ایکینجی یانوار فاجعهسی بیر داها روسون و ائرمنینین هر زامان و هر یئرده تورکون قانینا سوسادیغینی ثبوت ائتدی.
گونئی آذربایجان دئموکراتیک تورک بیرلیگی (گادتب) 20 یانواری قوزئی آذربایجاندا آذربایجان تورک میللتینین روس ایشغالچیلارینا قارشی قهرمانلیق گونو کیمی ده یرلندیریب و بیرلیگین اولدوغو تقدیرده الی یالین دونیانین ان بؤیوک گوجلرینه غالیب گلمه یین مومکون اولدوغونون 20 یانواردا ثبوت ائدیلدیگینی بیلدیریر. فارس ایمپئریاسیندان قات-قات گوجلو اولان روس ایمپئریاسینین تانکلارینین قارشیسینا چیخان الی یالین میللتیمیز گؤستردی کی، دئموکراتیک یوللا دا ایشغالچیلاری یئرینده اوتورتماق اولار. 20 یانوار گؤستردی کی، آزربایجانین گونئیینده ده آذربایجان تورک میللتی فارس ایرقچی-موستملکهچی رئژیمین بئلینی بوکوب اؤز موستقیللیگینی الده ائدهجک.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی