ادتاج اتحادیه دمکراتیک ترک آذربایجان جنوبی
گادتب: کؤکو تورکون یاشام طرزیندن قایناقلانان و سونرادان سلجوقلو دؤورونده سلجوقلو-تورک شاهلاری طرفیندن حرفی ترجومه شکلینده تاجیک دیلینه ترجومه ائدیلن نووروز بایرامی حاضردا فارس کیمی تانینان تاجیکلرین تاریخیندن یوز ایللر اؤنجه تورکون تاریخینده یئنگی گون (یئنی گون) بایرامی شکلینده مؤوجود اولوب و تاریخه دوشموشدور.
ائرمنی و فارسین قدیم تاریخی و مدنیتی اولمادیغی اوچون تحریفلره مجبور قالیر. لاکین تورکلرده هر هانسی مسئله ایله باغلی تحریفه احتیاج یوخدور. یئنی گون بایرامینین قدیمدن تورکلرین بایرامی اولماسی ایله باغلی دا “دیوان لغات الترک” کیمی معتبر اثرده دانیلماز فاکتلار مؤوجوددور. بئله کی، همین اثردن اوغوزلو-قیبچاقلی بوتون دونیا تورکلرینین قئید ائتدیگی بو میللی بایرام “یئنگی گون” (یئنی گون) کیمی قئید ائدیلمیشدیر. یئنگی گون بایرامی داها سونرالار فارسجایا حرفی ترجومه ائدیلهرک نووروز شکلینده تورک ایمپئراتورلوقلارینین اراضیسینده ایشله دیلمیشدیر. “یئنی گون” سؤزو تورک سلطانلارینین (سلجوقلو ملیکشاه) گؤستریشی ایله فارسجایا ترجومه ائدیلدیگی اوچون بیر چوخ بؤلگهلرده نووروزی سلطان و سلطان نووروزو شکلینده ایشله دیلمیش و حتی بیر سیرا تورک اؤلکهلرینده بو گون ده بو شکیلده ایشله دیلمکدهدیر. یئنی گونون ترجومه فورماسی اولان نووروز بؤیوک سلجوقلو سلطانی ملیکشاهین تقویم اصلاحاتلاریندان سونرا یاییلمیشدیر.
تورک میللتینین هله اون مین ایل اؤنجهدن فورمالاشدیردیغی یئنی گون- یاز بایرامی اینسانلارین ایلکین حیات طرزی، اکینچیلیک و طبیعتین قیشدان سونرا یئنیدن اویانماسی ایله باغلی اولموشدور. بو بایرام اساس ایکی قیطعهیه یاییلمیش تورکلرین هامیسیندا دینیندن آسیلی اولمایاراق کئچیریلیر. حتی پروتوتورک خالقلار حساب ائدیلن ایکی چای آراسیندا ساویر و شومئرلرده بئله یئنی گون بایرامی کئچیریلمیشدیر.
اوچ قیطعهنین مین ایللر بویو حاکمی اولموش تورک میللتی قانادلاری آلتینا سیغینمیش بیر سیرا خالقلاردان دا بو گؤزل عنعنهسینی اسیرگه مه میش و اونلار دا یئنی گون-یاز بایرامینی منیمسهییب قئید ائتمکدهدیرلر.
گونئی آذربایجان دئموکراتیک تورک بیرلیگی (گادتب) بؤیوک تورک میللتینین قدیم بایرامی اولان یئنی گون-یاز بایرامینین بو گون ده تورک میللتینین اورتاق میراثی کیمی تورک دونیاسینی بیرلشدیردیگینی دوشونور. تورکون بو میللی بایرامی موناسیبتی ایله گونئی و قوزئی آذربایجاندا تورک میللتینی، ائلهجه ده تورک دونیاسینی تبریک ائدیر، میللتیمیزه موتلولوق، آیدین گلهجک، گونئی آذربایجان دا داخیل اولماقلا اسارتده اولان باشقا تورکلره آزادلیق و موستقیللیک دیله ییریک.
یئنی گون-یاز بایرامینیز موبارک!
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
