ادتاج اتحادیه دمکراتیک ترک آذربایجان جنوبی
گادتب: ایرانین ایرقچی و ایشغالچی رئژیمی تورکون اساس بئشیگی حساب ائدیلن اورمیا گؤلو حوزه‌سینده قصداً یانلیش ایدار ائتمه و گؤله آخان چای‌لارین قارشی‌سیندا بند تیکمکله اورمیا گؤلونو قورودور. بو ایسه ائکسپئرت‌لرین ده اعتراف ائتدیگی کیمی آذربایجاندا حیاتین محو اولماسی و عمومیتله 15 میلیون اینسانین یاشادیغی بؤیوک بیر اراضی‌نین یاشاماغا مومکون اولمایاجاغی اراضییه چئوریلمه یی دئمک‌دیر. اصلینده موستملکه‌چی فارس رئژیمی سببکاری اولدوغو بو ائکولوژی فلاکتده آنجاق آزربایجانین بوتون ثروت‌لرینی تالاماغی دوشونور و اونون اوچون آزربایجانین محو اولماسی هئچ بیر اؤنم داشیمیر.
بو حاقسیزلیغی و دوشمن‌چی‌لیگی گؤرن آذربایجان تورک میللتی حاقلی اولا‌راق اورمیا گؤلونون ایرانین ایرقچی و ایشغالچی رئژیمی طرفین‌دن قورودولماسینا حساس یاناشیب و حاضردا دا بو حساس‌لیق داوام ائدیر. اون ایلدن آرتیق بیر دؤورده دفعه‌لرله گونئی آزربایجانین موختلیف شهرلرینده اورمیا گؤلونون قورتاریلماسی طلبی ایله اعتراضلار کئچیریلیب. گونئی آذربایجان دئموکراتیک تورک بیرلیگی (گادتب) ده هر زامان آذربایجان تورک میللتی‌نین بو حاقلی اعتراضلارینی دستکله‌یه‌رک، اورمیا گؤلونون قورودولماسی ایله باغلی ایرقچی فارس رئژیمه خبردارلیق ائتمیش‌دیر. لاکین ایرانین موستملکه‌چی فارس رئژیمی بو اعتراضلار قارشی‌سیندا قوروتدوغو اورمیا گؤلونون برپاسینا سؤز وئرسه ده، اؤز سؤزونه ده عمل ائتمه‌ییب، عکسینه گؤلون قورودولماسی پروسئسینی سرعتله حیاتا کئچیرمکده‌دیر. ایران رئژیمی همچینین اورمیا گؤلونو قوروتماماغا چالیشدیغی دؤورده کؤرفزدن فارس‌لارین یاشادیغی صحرا‌لیق‌لارا میلیاردلارین خرجلنمه‌سی ایله سو چکیر.
یوخاریدا قئید اولونان رئال‌لیق‌لاری گؤرن آذربایجان تورک میللتی، بو میللتین گونئی آذربایجان و خاریج‌ده کی حرکات لیدئرلری و فعال‌لاری حاقلی اولا‌راق سون گون‌لرده اورمیا گؤلو ایله باغلی آرتیق دؤزولمز وضعیتین یاراندیغینی و بیچاغین سومویه دایاندیغینی حیس ائدیرلر. اونا گؤره ده، گؤلون قورتاریلمایاجاغی تقدیرده قیام‌دان باشقا یول قالمادیغینی اعتراف ائدیرلر.
گونئی آذربایجان دئموکراتیک تورک بیرلیگی (گادتب) هر زامان اولدوغو کیمی آذربایجان تورک میللتی، بو میللتین گونئی آذربایجان و خاریج‌ده کی حرکات لیدئرلری و فعال‌لارینین طلب و ایستک‌لرینی دستکله‌ییب، اونلارین یانیندا اولدوغونو بیلدیریر. کیمسه‌یه سیرر دئییل کی، موستملکه‌چی فارس رئژیمی هر بیر حالدا دوشمن اولا‌راق آزربایجانین و آزربایجانین تورک میللتی‌نین محوی اوچون چالیشیر. بئله قانلی دوشمن‌دن قورتارماغین یولو ایسه حاقلی موباریزه ایله گونئی آذربایجانی موستقیل‌لییه قوووشدورماق‌دیر. گادتب بو حاقلی یولدا بوتون میللتیمیزی بیرلییه و وطنیمیزله میللتیمیزی قورتاماغا چاغیریر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
